Саратовскяй областень «Шумбрат» мокшэрзянь региональнай Национально-культурнай центрать председателец В.И.КРИВОШЕЕВА: «ИДЕНЬКЕ И УНОКОНЬКЕ ТЯНКСА ТЕЙНЕК АЗЫХТЬ СЮКПРЯ!»

—Валентина Ивановна, кода пандемиять пингста эряй Саратовскяй областень «Шумбрат» мокшэрзянь региональнай национально-культурнай центрась?

—Кизефксцень лангс отвечан тяфта, минь эрятама странать мархта фкя эряфса. Тяни, мзярда Россиясь тюри коронавируснай эпидемиять каршес, минь активистоньке, конатненди 18-50 киза, арасть «Молодёжь плюс» региональнай центрань волонтёркс. Сон панчф Саратовскяй областень Од ломанень политикань и спортонь министерствать видеса.

Кода содаф, самоизоляциять пингста ломаттнень инголе кой-мзярда стякшнихть стама прябалат, конатнень ськамост теест сяськомс уленди стака. Сембода пяк—инвалиттненди и эряфкшу ломаттненди, конатненди волонтёроньке рамсихть и пачфнихть ярхцамбяль, лекарстват и тиендихть теест лия эрявикс тефт.

Интернетонь ресурснень вельде минь тяфта жа макссетяма ня ломаттненди психологическяй лезкс, мезсь самоизоляциянь условияса теест питни кшить и лекарстватнень лаца. Кода психолог, мон лац содаса, эрь цебярь валсь, кона азф ломанти эсь пингстонза, максси теенза вийхть сяськомс эряфонь сембе стакатнень-сталмотнень. Сяс тя работать, лия тефнень лаца, «Шумбрат» центрань активсь кармай вятема Саратовскяй областьса пандемиять аделавомс.

Тяса нинге ёран азомс, волонтёрскяй работась макссь тейнек од опыт. Сон няфтезе, конашкава эпидемиять пингста маласькодсть фкя-фкянди разнай национальностень и культурань ломаттне. Сяс ули кода азомс: афкукс, васенцекс—минь сембе россияттама, а сяльде ни эсь народонь ломаттяма!

—Кодама тевса васьфтесть Великай Победать 75 кизонь юбилеенц?

—Нинге ётай кизоть песта ушедоме аноклама мероприятияньконь, конат арьсекшневсть ётафтомс тяддень Славань и Мялямонь кизоня, Великай Победать 75 кизонь юбилеенцты. Конешна, пандемиять сюнеда аф сембе синь тейнек ётафтовсть тяфта, кода арьсекшневсть инголи. Но минь, возможностьс коре, пяшкодеськ эсь долгоньконь войнань и тылонь геройхнень инголе.

Васенцекс ня мероприятиятнень эзда ётафтоськ «Минь пингоньконь героенза» лем ала мероприятиять тяддень 23 февральста Саратовскяй областень Краснокутскяй райононь Первомайское велеса. Пингстонза минь Краснай Кутошень и Первомайское велень администрациянь представительхнень мархта чествовандаськ войнань и тылонь ветераттнень, воиттнень-«афганецнень» и лия солдаттнень, кит воявасть «пси точкатнень эса», а тяфта жа ся од ломаттнень, кит тячи служайхть Российскяй Армияса, тядяснон-аляснон.

Койсон, тя мероприятиять вельде, кона ётафтовсь лямбоста, тейнек удалась няфтемс ломаттненди народоньконь аф фкя лацонь поколениянзон ёткса ся духовнай сотксть, кона тиендьсамазь минь народкс-победителькс.

Тяда башка, онлайн-форматса Саратовскяй областень лия эряйхнень мархта 12 апрельста ётафтоськ мероприятиять, кона лемтьфоль Авиациянь и Космонавтикань шити. Сяс мес, кода сембонди содаф, Ю.А.Гагарин космосу лиемда меле валгсь Саратовскяй модать лангс. Миньцонк сембе мероприятиятне тя илать лемс фалу ётафневихть келиста и мялень салайста. Но тяфта жа, койсон, сембе минь шарьхкодьсаськ, кда народоньконди афоль сатов Великай Победась, космосу лиемаське афоль уле. Сяс тя илать минь тяфта жа сотнеськ Великай Победать 75 кизонь юбилеенц мархта.

Тяфта жа онлайн-форматса минь ётафтоськ «Георгиевская ленточка» акциять, «Бессмертный полк» шествиять и поздравляндаськ ветераттнень Великай Победать 75 кизонь юбилеенц мархта.

Кода мярьгсь 9 майста Великай Победать мархта поздравлениясонза Россиянь Президентсь В.В.Путин, Победать лемс Парадсь, «Бессмертный полк» шествиясь странасонк ётафтовихть пандемиять аделавомда меле. И минь сембе учсесаськ ся пингть, мзярда Великай Победать 75 кизонь юбилеенцты лемтьф мероприятиятне ётафтовихть стане, кода синь минь тонадоме ётафнемс.

Тянкса минь сембось ни аноклаф.

—Валентина Ивановна, кода содаф, тяддень сёксеня странаса арьсеви ётафтомс населениянь Всероссийскяй переписсь. Койсот, мезе эряви тиемс Саратовскяй областень и мокшэрзянь лия региононь общественнай организациятненди сонь цебярьста ётафтоманксонза?

—Инь оцю вешфкссь, койсон, кона ащи мокшэрзянь общественнай организациятнень инголе—тя Всероссийскяй переписть итогонзон коряс аф прафтомс мокшэрзянь народть марстонь лувксонц. И тянь сатомс можна аньцек народоньконь национальнай самосознаниянц кеподеманц вельде.

Саратовскяй областьса тя работать минь ушедоськ нинге ётай кизоня: Мордовскяй (мокшень и эрзянь) народть Межрегиональнай общественнай организациянц VII съездонц ётафтомда меле. Сембе метоттне тейнек, кода и лия общественнай организациятненди, содафт кунара ни. Сяс, аф тарксемок пингть, эряви тиемс тя пара тевть. Арьсян, иденьке и уноконьке тянкса тейнек азыхть сюкпря!

—Мокшэрзянь общественнай региональнай организациянь кой-кона руководительхне мекольдень пингть азондыхть тяфтама мяль: кле, тейнек, мокшэрзятненди, Россиянь лия нароттнень лаца сась пинге тиемс-панжемс мокшэрзянь Всероссийскяй национально-культурнай автономия. Кода тон ванат тя мяльть лангс?

—Койсон, тя мяльсь—цебярьдонга цебярь. Тейнек тя кизефксть пяшкодемста аф эряви лядондомс лия нароттнень эзда, сяс мес тяфтама автономиясь странасонк народти максси оцю прават и возможностть.

Мярьктяма, ванфнемс и виияфнемс Всероссийскяй масштабса мокшень и эрзянь кяльхнень, мокшэрзянь национальнай культураньконь, литератураньконь, печатеньконь, промысланьконь и ремесланьконь.

—Удалаза сембе арьсефонте.

—Сюкпря.

В.НЕСТЕРОВ.