Юбилей мархта, Иван Фролович!

Мзярда ульсь велеса школа, пуромкшнесть школав. А тяни школась сёлкф. Лисемска аш коза. Сайхть Атерьста, Саранскяйста, лия оцю ошста учениконза. П.В.Савкин эряй Атерьса, трудонь ветеран. Сонць ни шаржу пря атя. А аньцек сай Пичепулоняв, аф раднянзон шири, а васендакиге сувай Иван Фроловичень варжама. И пяле ши седикс-ваймокс корхнихть, лятфнесазь, кода эрясть-ащесть, тонафнесть школаса ётай веконь 60-70-це  кизотнень. Учительть—моронь ваймоцоль. И кштимонга маштсь, и морамонга маштсь. А велень стирнятнень, цёранятнень эзда кочксесь-пуропнесь фольклорнай ансамбльхть, конат морсесть седиень токай мокшень морот. Синь ётксост ульсь и Пётр Владимирович. Тянемс азонды шнамань валхт эсь учителенцты. И, эряви азомс, мокшаляти эряфса тя кондястсь. Тонафтыенц лаца пяк кельгсы пеетькшнеманц-сингоряманц, сиде моронянь латцеманц-морсеманц. А содаф учёнайть, философть Н.С.Савкинонь мархта марса тонафнесть школаса. Кда Николай Степановичень кодамовок кизефксоц, васендакиге гайфти Иван Фроловиченди. Сондедонза содай и смузю ломань аш. А кда сай вели, сувай кода эсь кудозонза. Аф стак Брындиттнень кудса инь няевикс вастса ащи марстонь портретсна. Кафцьке лиссть ашу семьяста. Кафцьке арасть пяк достойнай ломанькс, Пичепулоняти гордостекс и прянь шнафтома вастокс.

Мон Иван Фроловичень кармань содамонза ётай веконь вейхксогемонце кизотнень ушетксста. Васенцеда няине мокшень кялень и мокшэрзянь литературань учительхнень методическяй пуромксстост. Ся тяни синь ётнихть сетьмоста. А эстонь кизотнень спорясть и кялень, и литературань кизефкснень колга. И.Ф.Брындинонь мялец фалу ульсь васенце вастса. А мзяра панжада урок ётафтсь оцю пингста. Сембе синь ётнесть мялень салайста, тевс нолявсть пяк козя материалхт.

Педагогическяй трудонь ветеранть учениконза фалу занцезь васенце васттнень олимпиадатнень, пялькстоматнень эса. Синь ётксост ульсь и эсь стирец Вера Ивановна, кона тяни Главнай редактор «Якстерь тяштеня» идень журналса. Тяфтама асу алять видеса теенза ашель кода аф кярьмодемс тяштемань тевти. Вера Брындинась ламоксть лисендсь сяськикс мокшень кялень и мокшэрзянь литературань олимпиадатнень эса. Школаса тонафнемста тяшнесь стихт. Кой-конатне лисендсть мокшень кялень периодическяй изданиятнень эса. Лувондозень Малькинскяй лувоматнень эса. А школаса тонафнемать аделамдонза меле теенза кись фкяль—журналистикав. И тяса оцю путксоц Иван Фроловичень.

И.Ф.Брындин шачсь 1940 кизонь 6 майста. Семьясна эрясь ашуста. А кинди эста тёждяль. Сон инь ёмласель иттнень ёткста. Сондедонза башка кафта оцю сестранзольхть, Анна и Матрёна, нинге фкя брадоцоль. Фрол Прокопьевич и Марфа Васильевна семботь тиендезь сянкса, штоба кеподемс эсь идняснон, топодемс андомс, щамс-карямс. Кизоняцоль Иван Фроловичень, мзярда ушедсь Великай Отечественнай войнась. Алянц сявозь фронту, меки куду ашезь мрда, юмась куляфтома. Пялес урозкс лятф иттнень касфтозень тядяц. Оцю сазорхне сембоса лезнесть ёмлатненди. Тяфта ни ладявсь эряфса, меле Иван Фролович лядсь юрхтозост. Фкя кудса эрясь тядянц мархта, ужялязе, калмазе. Тя кудса эрясь и акац, Анна Фроловна. Сон тусь эряфста аф сяшкава кунара. Тейне аф весть удалакшнесь васьфнемс тылонь труженицать мархта. И сон фалу карксэземга сюконякшнесь брадонц семьянцты.

—Монь Шкайсь ужяльдемань,—фалу корхнекшнесь Анна Фроловна.—Брадозень пяк цебярь семьяц. Вакссонза эряфоньберьф баярава рьвац, колма стиренза. Конашкава кельгсамазь, конашкава честь путыхть. Вестевок ашемазь обжсе, вестевок ашесть аза каршезон кальдяв вал.

И тя афкукс тяфта. Иван Фроловичень рьвац, Мария Ивановна, Кяшалонне. Шачсь и кассь Агутиттнень оцю и трудонь кельги семьясост. Конашкава кельгсыне велеряензон. Ломаненди мезецка аф ужяль. Улеза кши сускомоц, сонць аф сивсы, но ломаненди венептьсы. Тяфта и касфтозень эсь стирензон. Иван Фроловичень мархта марнясот ведьгемоньда лама киза. Тянемс кельгихть фкя-фкянь. Иван Фролович шнакшнесы сонь и сиде мороняса, и мокшень седиень токай мороса. А стирьсна, овсна, уноксна кеняртьфнесазь синь эсь сатфксснон мархта. Нина Ивановна эряй Краснослободскяйса, покоди населениять социальнай ширде араламанц коряс отделса, специалист семьятнень мархта работать коряс. Лидия Ивановна эряй-ащи Явас поселкаса, трудендай УФСИН-нь системаса. Вера Ивановна, кода ни азфоль вяре,—минь коллеганьке, «Якстерь тяштеня» журналть главнай редактороц. Колмоцьке идьснонды макссть цебярь образования, воспитания. Стирьсна аф азовомшка кельгсазь эсь тядяснон-аляснон, эрь шиня гайфнихть, пяк сидеста сашендыхть инжикс. Кодама аньцек поздравленият, лямбе валхт, питни казнет ашесть аза и казе эсь кельгома аляснонды 80 кизонь юбилейстонза.

А мзяроль илань карша, илань пингста седиень токай лятфнемада. Сонць Иван Фролович аф верондай, што тяфта мялень салайста, мяляфтовиста ётась эряфоц. Эряфонь кинц лангса васьфтсь лама цебярь, паронь арьси ломаньда. Васенда тя ульсь класснай руководителец А.С.Беляева, кона тонафнезе Кяшалонь средняй школаса. Анна Степановна вятсь рузонь, мокшень кялень и литературань урокт. Боражень мокшавась, кона тянивок шиса и эряй Краснодарскяй крайса, приметазе, што Иван Брындин—пяк смузю, асу цёрашаба. И теенза эряви тонафнемс. Сонцьке педагогическяй трудонь ветеранць, кода аньцек маштсь, лезнесь, кирнезе ширенц. Тянемс кирдихть кеме соткст. Иван Фролович корхтай, што Анна Степановна ульсь теенза тядянь вастс.

Мзярдовок аф юкстасы и  А.Д.Аверинать. Тя тонафтысь ульсь Шкайть эзда. Покодсь завучекс Пичепулонянь школаса. Од цёрать приметазе и пяк мялецоль, штоба молель тонафнема учителькс. Кле, аньцек школаса, аф косовок лияса тонь вастце. Иван Фролович кулхцондозе Анна Дмитриевнань. Васенда Темников ошса аделась начальнай классонь учителень курст. Тоса заочна шумордазе М.Е.Евсевьевонь лемса МГПИ-нь филологическяй факультетонь национальнай отделениять. Васенда покодсь начальнай класснень мархта. Тоса вятсь рузонь, мокшень кялень и литературань, пениянь урокт. Трудендась Пичепулонянь основной общеобразовательнай школаса. Мзяра-бди пинге покодсь Колапонанянь школаса. Казьф лама оцю казнеса. Ужяленди, тяни кафцьке школатне сёлкфт.

Ванат Иван Фроловичень лангс и аф верондат, што теенза кафксогемонь киза. Тяфтама жа од, отькорь, кода корхнихть мокшетне, «пикст нинге кодай». И тя афкукс тяфта. Мокшалясь кирди жуватат, путни пере, якай вири пангс, пчкафты тишень кочкама. А кда тердьсазь пиравама, петьсы марнек илать. Сонь лацонза мазы вайгяль аф муят сембе округаста. Ламоц сиде моронятнень латцесыне сонць. Катк фалу тяфта и ули. Юбилей мархта, кельгома Иван Фролович! Кеме шумбраши тейть и ламоняс эрямс.

И.ВЕШКИН.