Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Национальная тематика

П.Е.Сенькин:«Лувондода тядянь-алянь кяльса лисенди газета»

Ня шитнень телефононь пачк удалась корхнемс мокшень пара ломанть Павел Ефимович Сенькинонь мархта. Павел Ефимовичень пцтай марнек эряфоц сотовсь прокуроронь тевть мархта. Сон Российскяй Федерациянь и Мордовия Республикань Заслуженнай юрист, РФ-нь прокуратурань  почетнай работник, юстициянь омбоце классонь государственнай советник. Но коса афоль труденда, кодамот афольхть уле званиянза, Павел Ефимович мзярдовок ашезе юксне родной кяленц, васьфттянза, пшкяди мокшекс, корхни тядянь-алянь кяльса. Ломанць сон пяк простой, панжада седи. П.Е. Сенькин пара ялга «Мокшень правда» газетаньконди, аф фкя киза ни лувондсы сонь, шнасы, кда сёрматфсь тушенды мялезонза, афсатыксненьге азсыне. Тя мезтьке корхтаманьконь мольфтеськ газетать колга.
—Павел Ефимович, кунара лувондсак «Мокшень правдать»?
—Ёт мяляфтса эсь прязень. Сонь сёрматфнезь тядязе-алязе. Мяляфтса, кандсы почтальонць газетать и эстокиге кярьмотькшнеме морафтомонза. Пингсь эста лияль. Эрь семьясь получсесь разнай лемонь изданият. Трёшникт питнесноль. Но ся ламоть ёткста васендакиге кярьмотькшневоль эсь кяльса-валса лисендити. Мушендовсь сонь лопанянзон лангста ся, мезе тейть эрявсь. Газетась эста оцюволь, сявсак кядезт—пильгонек-прянек кяшеват. Касомок, ашень ява кельгома изданиязень мархта, монць ушедонь сёрматфнемонза. Тяста сотцекшнине мекольдень кулятнень, сянь, мезень одня тиевсь республикасонк, оцю мяльса лувондыне мокшень пара ломаттнень колга зарисовкатнень, писательхнень рассказснон.
Пинкне полафнесть, а «Мокшень правдась», кода и инголе, кандсь ломаттненди аньцек пара мяльхть. И тяфта тячемс. Тяса аш «рдаз», салсемань-пикссемань колга азондомат. Сянкса лама азондови цебярь ломаттнень, труженикнень квалма, конат пара тевснон мархта тиендьсазь содафокс эсь шачема-касома уженяснон.
Тячи газетась арась сяда удалафокс, эсонза эвондасть тюсу лопанят. Полафтсь и оформлениясь. Изданиять мазоптозь аф фкя лацонь рубрикатне, маштозь тиф вёрсткась. Эрь номерса макссеви лама иллюстрацияда, мезсь кеняртьфти сельме.
—Кодама материалхне сядонга пяк тушендыхть мялезот?
—Пара мяльса лувондсайне велень ломаттнень колга зарисовкатнень. Сядонга лад арси седиезон, мзярда газетать лопанянзон лангста мушендан материалхт эсь земляконень, Атерь аймаконь эряйхнень колга, кеняртькшнян синь сатфксснонды. Касфнихть мяль материалхне, конатнень эса азондови машты кядь мокшаватнень квалма. Дивандакшнят маштомошиснонды: синь и стайхть-кодайхть, и кштийхть-морайхть, и кудонь, куд пирьфонь тевса кенерькшнихть. А кодама мазыхть мокшаватнень щамсна! Да вдь синць и стакшнесазь-сёрматкшнесазь тя мазышить!
Или сявсаськ эрявикс советтнень. Синь афкукс пяк эрявикст. Мяльса кирдьса и «Докторсь тонць», и «Минь усадьбаньке» уженятнень. Велень ломанць, а газетать сяда оцюшка пяльксоц моли вели, синь вешсыне и нолясыне тевс.
—А мезе азат газетать кяленц колга?
—Азолине тяфта: кяльсь «Мокшень правдаса» кода шуди ляйня. Эсь ёткованк корхтамста сяда сидеста нолясаськ тевс диалектнай валхнень, а тяса няфтеви мокшень литературнай кяльть сембе козяшиц. Виде, советтнень эса кой-коста повондыхть аф шарьхкодеви валхт, васендакиге, тя тишетнень-меснень лемсна. Синь, шять, улель пара макссемс рузкска.
—Павел Ефимович, койсот, мезсь аф сатни тячиень «Мокшень правдать» эса?
—Мялезель няемс газетать лопанянзон лангста сяда лама оржа материал. Эздост, койсон, макссеви аф сатомшка. Кепотьксонди, сяка жа велень эряфть колга. Мярьктяма, сяда ламоня азонкшнемс тоса уликс прябалатнень колга, штоба лангозост шарфтоволь мяль. Тяда башка, улель пара, кда «Мокшень правдаса» макссевольхть фельетотт.
—Мезе азолеть газетаса покодихненди?
—Васендакиге, эрти мялезе азомс оцю сюкпря мялень салай статьянь сёрмадоманкса. А нинге сянкса, мес синь кельгсазь эсь родной кяльснон, ванфнесазь сонь. Кда аф кармайхть лисендема мокшекс газетат и журналхт, аф карматама корхтама эсь кяльсонк, сон юмай. Юмай кяльсь, юмафтсаськ эсь пряньконьге. Сяс эрь мокшень ломанть кошяряса сёрматфтомс «Мокшень правда», морафнемс тядянь-алянь кяльса. «Мокшень правда»—мокшень эрь семьяти.
—Павел Ефимович, тяниень пингть республикасонк, кода и марнек странаса, ладяф кудса ащемань режим. Тон мезьса занцят пря тя пингть?
—Ули кудняньке Оцю Березники велеса, вов тоса мон и ётафнеса самоизоляциять. А велеса тевфтома аф лядат. Пересонк путоме модамарьхть, шурьхкат, пурьхкат, помидорат, перень лия сёрот. Тяда башка, озафтоме комозьшка акация, марлюфт, сливакст. Тяни рьвязень мархта якатама мельгаст. Ётка пингста лувондан книгат. Тяни, кепотьксонди, мялезень салазе Биографиянь мировой энциклопедиясь, кона нолдаф 12 томса. Эрь шиня лисендян прогулкас маласонк шуди ляйнять ваксс, кеняртькшнян перьфпяльть мазышинцты.
—Сюкпря, Павел Ефимович, корхнеманкса.
О.ЕВДОКИМОВА.

04.06.2020 №21
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин