В.П.Кшнякин: «Эрь тевти малаткшнема кельгозь»

Асу земляконьке, шуфтста керсемать коряс мастерсь Владимир Павлович Кшнякин арси коль сяда содафокс. Аф кунара машты кядь мокшалять творчестванц колга азонтфоль «Волгоград-ТРВ» каналса. Сюжетть пингста няфтьфоль скульпторть музеец, азонтфоль работанзон колга.
В.П.Кшнякин керси шуфтста статуэткат, вазат, скульптурат, тиенди мазыдонга мазы рамат, конат ладяйхть портретонди, картинанди, ваноманди и нльне шкаень ликонянди. Шуфта пакшсь Владимир Павловичень кядьса арси искусствань афкуксонь произведениякс. Размерс и формас коре аф фкя лацонь вазатне шарфтыхть панчф лангс, а статуэткатнень и скульптуратнень эзда содавихть ёфксонь геройхне. Тя или тона работать тиеманцты мастерть кошярясы сонць перьфпяльсь. Владимир Павлович кельгсы вирьге якаманц. Тоса приметаф мазышить сон няфнесы эсь тифонзон эса. Керсеманди старандай нолямс тевс аф касы шуфтонятнень, а сятнень, конатнень веляфтозень вармась. Тянь мархта сон бта максси теест од эряф.
Кода азозе сонць мастерсь, эрь статуэткать, вазать тиемац—аф фкя шинь тев. Васенда кочкама эрявикс материалсь, меле сон косьфтама, лаксемат моргу вастонза, и аньцек тяда меле ули кода кярьмодемс керсемати. Мзярда тифкссь анок, сон эряви архтомс лакса.
Эсь работанзон В.П.Кшнякин аф мишендьсыне, синь ванфтовихть кудботмосонза. Сонцень кудтьке мокшалясь строязе эсь кядьсонза. Нинге ичкозде няевихть маштозь керсеф вальмя наличникне, сельмонь салай узорса мазоптьф кудбрясь. Мастерть валонзон коряс, тяниень пингть кудсонза-музейсонза ванфтови кафта сятта лама скульптура-мезе. Но тя аф сембось сянь эзда, мзяра лиссь кядялдонза. Ламоц тифксонзон сон казендезень радня ломанензонды, содафонзонды.
Шуфтста керсемаса Владимир Павлович заняф колмогемоньда лама киза. Тя тевса маштомась, улема, ётась теенза атянц эзда, кона ульсь цебярь плотникокс, шапондсь срупт, стройсесь кутт, банят. Шуфтть мархта работама маштсь аляцка. Шабакс В.Кшнякин хуш ванондсь алянц тевонц лангс сельмонь каязь, сонць керсемати кярьмодсь аньцек лама кизонь етазь. Одста мокшалясь кельгозе путешествовандаманц, ульсь аф кржа ошса. Весть Ленинградса улемстонза няезень мокшэрзянь содаф скульпторть С.Д.Эрьзянь работанзон. Няйфсь сяшкава токазе седиенц, што эвондась оцю мялец варжамс эсь виензон керсемань тевса. Тиень, кле, фкя статуэтка, тусь мялезон, сяльде—омбоцеть, колмоцеть, нилецеть… Тонафтыец ашель, сонць тонаткшнесь. Лувондсь лама книга, тага и тага весть ванондозень С.Д.Эрьзянь работанзон.
Тячи мокшалять В.П.Кшнякинонь шуфтста тиф вазанза, скульптуранза, раманза содафт лама вастова, а творчествац арси примеркс од мастерхненди. Вов тяфтамот минь мокшень ломаненьке, мезьс аф кундайхть, сембось синь лисенди.
Владимир Павлович гордостень марязь азонкшни эсь мокшэрзянь юронзон колга. Аф ваномок сянь лангс, што эряфоньберьф эряй руз еткса, аф кальдявста и пара мяльса корхтай мокшекс. Аф фкя киза ни В.П.Кшнякин работай «Мокша» творческяй псевдоним ала. Владимир Павловичень родителенза Атюрьевскяй райононнет. Тядяц шачсь и кассь Арга велеса, аляц—Красновкаса. Рьвяямдост меле направленияс коре прважафтольхть Пермскяй области. Тоса и шачсь сай пингонь скульпторсь. Ветешка-котошка кизоль теенза, мзярда семьясна ётась эряма Волгоградскяй области. Тостонь Волжскяй ошса В.П.Кшнякин эряй тячемс. Владимир Павлович аф весть улендсь историческяй родинасонза, кирди соткст земляконзон мархта. Меля мастерсь сашендсь выставка мархта Саранскяи.
Корхнихть, асу ломанць асу сембоса. Тячиень героеньковок аф лоткси шуфтста керсемать лангс. Тяда башка, сон тиенди налхкшкат севоньцта, работай маталлть мархта, сёрмады стихт и морси морот. Фкя инь васенцесь, кле, эрь тевти эряви малаткшнемс кельгозь.
О.КОЛЕДИНОВА.