Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наша усадьба

Тиклать колга

Тиклась аф аньцек танцти, но и пяк полезнай. А мезе нинге эряви, кда тялонда азорондай гриппсь и лия вирусне? Ярхцсемс сяда лама витаминда. Вов тянкса тиклась ладяй инь пяк сембе перень серотнень коряс. Эряви аньцек озафтомс ламос ванфтови сортт, конатнень эзда ули кода аноклакшнемс танцти блюдат тундать самс.
Кепотьксонди, «Янтарная» сортсь—танцти, но ванфтови аньцек 40-45 ши, «Московская ароматная»—60 ши, «Нектарная»—90 ши… Тяфтама сортта лама, а вов сяда куватьс ванфтовида—кржа. Азонттама уликснень колга.
Мускатнай сорттне
Хавана. (HAVANA F1). Enza Zaden, Нидерландыста. Ванфтови таргамдонза меле 180 ши.
Ариэль. Enza Zaden, Нидерландыста. Ванфтовихть сембе товарнай качестванза 180 ши.
Оцю тиклань сорттне
Арина. «Седек» агрофирмась, Россияста. Ванфтомань пингсь—150 ши.
Биг Мун. «Седек» агрофирмась, Россияста. Ули кода ванфтомс 180 ши.
Каштанка. «Седек» агрофирмась, Россияста. Урожайностец—квадратнай метраста 5 килограмматненди молемс. Ванфтови 150 ши.
Мечта кухарки. «Седек» агрофирмась, Россияста. Ванфтома пингсь—120-130 ши.
Оранжевая медовая. «Седек» агрофирмась, Россияста. Ванфтови 140-150 ши.
Сластена. «Российские семена» МПФ-сь. Сортсь аф эсь лацонне, ванфтови 270 ши.
Калгода кедень
сорттне
Башка шарфтода мяль тяфтама тиклань аньцек фкя сортть лангс: Золотая семечка. «Седек» агрофирмась, Россияста. Кочкамдонза меле ванфтови 130-140 ши.
Шралангонь
мазоптомбяль
А вов кой-кона сорттне аф аньцек кондястихть танцти блюдань анокламанди, но и шрать лангонц мазоптеманцты. Кепотьксонди, пяк эсь лацоннет «Царевна лягушка» сортонь плоттне. Кедец афкукс шарфты ватракшеннеть лангс, а аф лама видьме мархта  эчке ляпоц пяк танцти.
Эсь лацонь тюсоц «Арина» сортть кеденц. Тиклатне валда сянгярят, вадяфт, сталмосна 3-3,5 килограммань и ладяйхть диетическяй ярхцамбяленди. Тя сортса лама тиклань видьмода, конатнень эса лама полезнай вайда.
Кда кельгсасть тиклань видьмотнень, шарфтода мяль Голосемянка и Миранда                            сорттнень лангс, синь видьмоснон аш кедьсна, керость тиклать—и ярхцада эздонза.
Касфттада тиклат, тясть юксне, синь вешфксуфт лямботи и ведти. Тиклатнень ункссна оцюфт и кемот, сяс коське пингть синь кирдьсазь, но аф ламос. И сяда пара ули, кда валондсасть синь сидеста. Нинге тиклась кельгсы органикать, сидеста сонь озафнесазь компостонь или наземонь марти. Эста урожайсь уленди пяк козя. А вов ляпопнемс модать, коса касы тиклась, аф эряви. Сяс сонь сидеста озафнесазь участкать крайге и кодорксонзон латцесазь кинять шири, штоба опаптомс тоста сор тишетнень.
Сяс нинге весть азсаськ, тиклать пользадонза лама, тянкса тясть нолда пингть, мзярда эряви озафтомс тя культурань перень сероть.

04.06.2020 №21
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин