ТОНАФТЫ МОКШЕНЬ КЯЛЬТЬ КЕЛЬГОМА

Сидеста уленди тяфта: кона профессиять колга арьсекшнесь ломанць шабакс, сянь мархта и сотовсь марнек эряфоц. Тяфта лиссь тячиень героиняньконь, пара вайме мокшавать Н.В.Чикаревать мархта. Нина Викторовна—учитель. Комсь кизода ламос ни сон вяти мокшень кялень урокт Зубово-Полянскяй райононь Каргал велень школаса.
Тонафтыень аф теждя, но пяк ответственнай тевсь кельговсь Нина Викторовнанди ёмластокиге. Коста сявовсь сон, тя кельгомась, азомс аф теждя, аньцек ялга мархта налхксемста Нинась най ульсь учителькс, коль тонафтсь-азондсь. Аф шуроста ученикокс теенза арсесть няканза: озафнелезень стулнятнень лангс, а сонць ётковаст якаль, тонафтоль тянди-тонанди.
Шачсь-кассь Н.В.Чикарева тяка велеса простой рабочаень семьяса. Аляц покодсь колхозса, тядяц ульсь техничкакс. Васенце содамошитнень Нина Викторовна получазень Каргалонь школаса. Тонафнесь сон лац, аньцек «ветес». Школать шумордамда меле, шарьхкотьф, ламос ашезь арьсекшне, коза молемс тонафнема сяда тов, кочказе Зубово-Полянскяй педагогическяй училищать. И тясовок фалу сатнесь цебярь сатфкст тонафнемаса, тяда башка ашезь лядонда шири общественнай эряфть эздовок. Мзярда дипломсь кядьсонзоль, Чикаревась марязе прянц пяк павазукс, вдь тяни сон ульсь афкуксонь учителькс. А аф лама пингта меле од тонафтыти лиссь работама васта—Каргашино шабра велень школаса. Тяса Нина Викторовна работась ёмла классонь учителькс. Пингонь етазь, мзярда лиссь рьвакс, сась покодема шачема велезонза—Каргалу, васенда ульсь пионервожатайкс, а сяльде ушедсь тонафтома мокшень кяль.
Уроконза тевонь содай учительницать пяк мялень салайхть, козят дидактическяй материалса, няевихть крхка содамошинза эсь предметсонза и инь главнайсь—тядянь-алянь кяльти кельгомась, мезсь ётни ученикнендивок. Эрь урокти Нина Викторовна старандай арьсемс мезень-мезень одня, штоба саламс шабатнень мяльснон. Кепотьксонди, ёмла классонь тонафнихнень мархта тевс сувафневихть налхксематне, пялькстоматне, а оцюфненди занятиятне ётафневихть КВН лаца.  Иднятне кельгсазь Нина Викторовнань, урокозонза сашендыхть пара мяльса.
Каргал велень школаса мокшень кяльсь тонафневи 1 класста сявомок 9 классти молемс. Сонь тонафнесазь аф аньцек мокшень семьяса шачф-касф шабатне, но и русне. Школаса ули краеведческяй уженя, тяса Нина Викторовна и ётафнесыне уроконзон. Национальнай культурань тя «музейса» пуроптф оцю козяши мокшетнень сядынгольдень эряфснон колга: кядьгонят, щапт, кудъётконь эрь-кодама паршихть. Синь кочказень Н.В.Чикаревась эсь учениконзон мархта.  Школаса сидеста ётафневихть аф фкя лацонь илат, панжада урокт. Пингстост Нина Викторовна и сонь тонафниенза наряжакшнихть мокшень щамса.
Н.В.Чикаревать учениконза сидеста примсихть участия мокшень кяльть коряс олимпиадаса. Райононь школатнень ёткса синь най занцихть призовой вастт. Сонць Нина Викторовна аф весть няфнезе мокшень кялень учителень маштомошинц «Родной кялень инь цебярь учительсь» муниципальнай конкурсса. А тядде сон васенцеда примай участия республиканскяй конкурсса. Арьсетяма теенза сяськома!
Н.В.Чикарева пяк павазу, мес музе эряфса эсь вастонц и кда тячи нинге весть мярьгольхть кочкамс профессия, улема, минутавок афоль арьсе. Мокшавать сяшкава мялезонза учителень тевоц, што кодамовок лия профессиянь лангс афолезе полафта. Сон фалу эряскоды классу, сяс мес тонафнихнень ёткса улемась, мархтост корхнемась, канни теенза афкуксонь кенярдема, потафнесыне фталу сталмотнень, максси од вийхть аф теждя тевсонза. И мезсь аньцек шнама, машты ломаттненди маладома, аф стак иттневок венемкшнихть, педезь-педихть теенза.
О.ЕВДОКИМОВА.