АФ ЭСЬ КРАНДАЗСА

Мзярда работань рядовой инженеркс, мезеньге пичефкс ашень сода. Максы шефсь тев, тисак и учат указаният. Максыхть—работат, аф—ваймосят.
Бта цярахматт тапазь эряфозень, кодак путомазь отделонь начальникти заместителькс. Сувань весть ширезонза, Мирон Васильевич и кизефтемань:
—Купоросов, тон мзярда мекольцеда театраса улеть?
Видеста азомс, мекольцеда улень ветешка кизода инголе торжественнай собранияда меле концертса.
Мторгодонь мезе-бди, а шяйтаттне кялезень ускозь, телевизорть лятфтайне.
—Телевизорть унокозе Антошкавок ванондсы,—мярьгсь Мирон Васильевич.—А тон ломанць руководящаят, лангозт лиятне ваныхть, пример эздот сявихть. Мон, конешна, аф мярьган, штоба эрь илядня театраса шаролеть, но недяляти весть якак.
—Да мон монцьке тяфта арьсян,—эстокиге фатяйне.—Вандыкиге молян, Мирон Васильевич.
—Ванды, пожалы, аф эряви,—ляпомсь шефсь.—А вов ёткшиста премьера ули, балет няфтихть. Тон ни архт, Купоросов, ванк лацкас и, пожалняста, понедельникста аф оцю отчёткя кантт.
—Отчёт... театраста?—дивандань мон.
—Ну, аф отчёт,—машнезь мярьгсь Мирон Васильевич,—заметкат или, кода нинге мярьгихть, рецензия.
Мирон Васильевич шарфтсь вальмяти и ламос ванць пирьфи, коса алятне грузясть автомашинать кузовс кодама-бди оборудования.
—Понимаешь, Купоросов,—тага ушедсь сон,—недяля кучкаста начальствать мархта ёратама калонь кундама молемс. Кие содасы, мезе сонь прясонза!  Ухада коршамста вдруг да кизефтьсамань: мялезон ли од балетсь и лац ли комотнесь прима-балеринась. А мон, брат, премьерас аф молеван, срочнай тевозе ули...
Лисень кабинетстонза и арьсян: васендакиге, билет эряви театрав добувамс... Кода ина мон рецензия тяштян, кда служебнай запискада башка мезевок ашень сёрмада? Ну и задача макссь. Звонян рьвязти, корхтан:
—Клава, нармонняй, инезиень панчфкяй. Тячи илять штасайне киякснень, муськсайне муськопнень, аноклан ужин, Федьканди колма книгат луван, аньцек добувак билеткя театрав, тоса балет няфтихть.
Кулелесть, мезе кеподсь Клавазе. Мон, кле, аф сяшкава ни шава прян, штоба ащекшнемс очередьса кодама-кодама Эмилиянди. Кле, кунара ни приметайне, што пчкясь илять кудувок афолеть са!
И ёрдазе трубкать. Мезевок аф тият, савсь тумс эстейне кассав. Очередсь—мярьгат, рана тунда иможенкса ащихть. А фкя пенсионер атясь, конанди сядошка кизоль, нльне табуретка фатясь кудста.
—Кунара, атяй, ащат?—шаштонь ваксозонза.
—Да ниле частшкаста шобдава сань.
—Кали балетти тяшкава лажадоть?
—Да тон месть! Мон одстовок балетс ашень яка вестенге. Тя унокозти билет ёран добувамс.
—Отец,—комань ёфси пилезонза,—монь пингозе ёфси аш, а билет эряви, тянь эзда марнек эряфозе ащи. Эняльдян, сяфть тейневок фкя билеткя. На вага ярмакт, сдачавок аф эряви.
Люкафтозе атясь прянц: шарьхкотте, кле, вдь аф фалу тяфтама калада крандазолень.
Ласьконь маластонь телефоннай будкати, гайфтень рьвязти.
—Кие кизефни?—кулине телефоннай трубкаста Клавазень бта аф эсь вайгяленц.
—Тон мес, матаняй, али законнай мирдцень аф содасак?
—Законнай мирттнень улихть законнай рьвасна,—отвечась сон.—А моннесь бралги кати-коса, милицейскяй пинесовок аф муви. Мон ни колмоксть службазонза звонцень, духоцка тоса аш. Сембе!
Балетть, конешна, ваныне. И, азомс видеста, кржа мезе шарьхкодень. Куду сань пцтай пяле веть. Эстокиге ушедонь отчётонь... фу ты, рецензиянь тяштема. Шавонь-шавонь, колма строчкат сёрмадонь. Сятненьге сявине брошюраста: «Пластическяй танецть вельде героинясь няфтезе сонцень потмаширдень натуранц...» И пец, монцень прязон мезевок ашезь са.
—Матк ни толть,—уркстомань Клава.—Бралгат кати-коса, а меле киндивок покой аф максат. Ленгянь писатель!
Ангоряса шрать ваксса касомозень, арьсян. И апак учсек исяконь газетаста няень объявления: «Макссян консультация музыкань коряс. Балетть коряс тнярда-тнярда, операть—тнярда...»
Операцень мархта воляце, кенярдень мон, а вов балетть инкса спасиба. Шобдава сявонь такси и—консультантти. Азыне нужазень.
—Тянди лездомс аф стака,—мярьгсь сон и венептсь машинкаса печатлаф листкат, коса корхтавсь балетть колга. Мон тонгонь учительти ярмакт и ласькозь.
Статьясь сёрматфоль лац, аньцек эрявсь кой-коза путомс балетть лемонц и геройхнень, конатнень мон и сявине театрань программаста.
Рабочай шить аделама  карша сувань шефти и венептине стряпшафозень. Мирон Васильевич озась шрать ваксс и ушедсь лувома.
—Кали тонць тянь раштайть?—дивандась шефсь и люпштазе кядезень.—Молодецат, молодецат! Эк, кодама талант отделсон покай! Ай да Купоросов!
Арьсень, тяда меле мучендамане аделавсть. А синь, ватта, аньцек ушедовсть. Коса аньцек ашезь сав улемс, коза аньцек ашемань кучсе Мирон Васильевич: фкя ковонь потмоста савсь улемс и сёрмадомс породистай пинень пялькстоматнень, поваронь конкурсть, циркть, тялонда аньцемаса эшеляень слётть квалма, маркань кочкайхнень и тага мезень-повсь квалма. Тяни мон энциклопедиять пцтай сембонь содаса, разнай журналхнень эзда листкат керсян, эрявикс валнят да сведеният пуропнян.
Павел ВЕЛЬМАТОВ.