Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Тема дня

СЕДИСТА МОЛИ ВАЛХТ И КАЗНЕТ МЕДИЦИНСКЯЙ РАБОТНИКНЕНДИ МОРДОВИЯНЬ ОЦЮНЯТЬ ЭЗДА

 «Тейне оцю кенярдема лична васьфтемс тинь—минь пингоньконь афкуксонь героензон мархта,—мярьгсь Владимир Волков.—Ётась 12 недяля ся пингста, мзярда республикаса официальнайста кемокстафтольхть коронавируснай инфекциянь васенце кафта случайхне. Кирдемок мяльса ся сталмотнень, конат лаподсть медицинать лангс, ня колма кофне врачненди арасть фкя лацоннекс работань несколька кизотнень мархта».

 

Эпидемиять ушедоманцты Мордовияса ульсь аньцек фкя специализированнай медицинскяй больниця. Тяни ковиднай госпиталенди тиф 17 пчкафтомань учреждения. Аноклаф пцтай 2 тёжятть  инфекционнай койка-васта, ётафтф пяк оцю работа синь кислородса, ИВЛ-нь аппараттнень мархта оснащенияснон коряс. Пцтай нульста тиф ПУР-тестированиянди базась. Тяни коронавирусть лангс тестть мархта фатяф Мордовиянь пцтай эрь кемонце эряйсь. Ётафтф антителатнень лангс пцтай 6 тёжятть тестт, 14 тёжяньда лама КТ-исследования. Удалась пуроптомс инфекциянь пчкафтомань оцю опыт, тиемс лекарствань цебярь запас.

 

«Тяни здравоохраненияньконь возможностензон вельде ули кода тюремс эрь эряфть, инь стака сярядихнень инкса,—китькстазе Владимир Волков.—Сяс, аф ваномок сембе стакатнень-сталмотнень лангс, здравоохранениянь системаньке кирдезе тя испытаниять. Кирдезе враченьконь, медсестраньконь, скорай помощень работникнень, больницянь, лабораториянь, поликлиникань,       ФАП-нь,  внештатнай специалисттнень профессионалкс улемаснон и сембе виень-эрьгянь максомаснон вельде. Оцюдонга оцю спасиба теенть и работас коре ялгантенди трудонтень инкса! Минь нинге ушедомста шарьхкотькшнеськ: кда аф вантфтсаськ медицинскяй работникнень, аф кирдьсаськ ширеснон, то юмафтсаськ семботь. И аф стак Россиянь Президентсь В.В.Путин инголи примась дополнительнай пандоматнень сувафтомаснон и военнослужащайхнень уровеньц медицинскяй работникнень страховой гарантияснон кеподемаснон коряс решения. Сяс мес сембе тя пингть враченьке работайхть повышеннай анокшинь, а кда азомс лиякс—военнай пингонь режимса».

 

Тяниень пингть медикнень вельде Мордовияса коронавирусть эзда пчкясь 1800 малава ломань. Ётксост—90 кизода оцю 4 пациентт (инь оцюти—99 киза).

 

«Конешна, республикань медицинскяй организациятненди улема анококс коронавирусть возможнай омбоце волнанцты. Но тяни минь ваттама эпидситуациять молеманц лангс надиязь и цебярти верондазь»,—мярьгсь республикань Оцюнясь.

 

Сяда тов кармай мольфтевома здравоохранениять материально-техническяй базанц кемокстамац. Июнть пенцты С.В.Катковонь лемса Республиканскяй клиническяй   больницяса и Рузаевскяй межрайоннай больницяса улихть ладяфт компьютернай томографиянь ётафтомс 2 од аппаратт. Маластонь пингть учсеви ЭКМО од аппаратть и 21   ИВЛ-ть самасна. Велетнень эса работамс рамафт 9 мобильнай маммографт и  стоматологиянь вастста вастс усксеви 4 кабинетт. Тяда башка, скорай помощень  автопарксь тядде пяшкодеви нинге 10 од автомобильса—тя инь кржась.

 

Мордовиянь Оцюнясь седи ваксста азсь благодарностень валхт республикань медицинскяй сембе работникненди.

 

«Оцю спасиба и карксэземга сюконяма теенть!—мярьгсь Владимир Волков.—Ёран, штоба содалесть: тинь аф ськамонт, мархтонт  марнек Мордовиясь! И минь карматама тиендема семботь, штоба лездомс теенть».

 

Медицинскяй работникнень стане жа поздравляндазень МР-нь здравоохранениянь министрсь Олег Маркин.

 


26.06.2020 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин