Ю.А.Мишанинонь 60 кизонь юбилеенцты

2014 кизоста сявомок Ю.А.Мишанин—Мордовскяй (мокшень и эрзянь) народть Межрегиональнай общественнай организациянц председателец, Национальносттнень тевснон коряс Федеральнай агентствань Общественнай советонь член, Россиянь финно-угорскяй народонь Ассоциациянь Советонь Президиумонь член, Мордовиянь Общественнай палатань Образованиять, наукать и инновациятнень коряс комиссиять председателец.

Общественно-научнай сфераса няевикс сатфксонзон инкса Ю.А.Мишанин казьф Мордовия Республикань Оцюнять и республикань государственнай премияса, Слава III степенень орденца, «За заслуги. В ознаменование 1000-летия единения мордовского народа с народами Российского государства» и лия медальса, а тяфта жа Российскяй Федерациянь и Мордовия Республикань Почётнай лама дипломса и грамотаса.

«Мокшень правдаса» покодихне седи ваксста поздравляндасазь Ю.А.Мишанинонь юбилеенц мархта и арьсихть  теенза кеме шумбраши и  од  сатфкст общественно-научнай сфераса. Газетаньконь тячиень номерсонза  макстама  сонь од научно-публицистическяй книгастонза пакш. Сон «Они сражались за Крым» («Уроженцы Мордовии—защитники Крыма») лем ала курок пачкоди лувити.

Ули кода азомс, што  Ю.А.Мишанинонь научно-публицистическяй од работац, кона лиси Великай Победать 75 кизонь юбилеенц пингста, арай питнидонга питни казнекс войнань и тылонь ветераттненди, лия лувихненди и, конешна, эстеенза юбилярти.

1942 кизонь май ковть ушетксста немецкяй войскатне, конатнень вятезень генералсь Манштейн, Керченскяй полуостровса тусть контратакас  Крымскяй фронтонь частеньконь каршес. Ётамок ламодонга лама танкаснон, артиллерияснон и авиацияснон вельде Турецкяй валть пачк, синь тусть Керчь ошть шири. Тя операцияти Манштейнонь штабса макссть «Охота на дроф» лем. Степной тяфтама нармонькс, фашисттнень мяльснон коряс, ульсть Крымскяй фронтонь красноармеецне.

Аньцек «охотась» лиссь аф стамкс, кодамкс арьсесть няемс сонь гитлеровецне. Германиянь сухопутнай войскань Генеральнай штабонь начальниксь Гальдер, пачфтемок Гитлеронди докладса Керчть маласа бойхнень квалма, мярьгсь: «Тяфтама кяжи и веры тюрема мон нинге ашень няенде…»

Советскяй войскатнень юмафкссна улельхть нинге сяда оцюфт, кда аф кой-кона офицероньконь ёньцна и воинскяй доблестьсна. Тянь коряс ётксост няевикс вастса ащесь боевой подготовкать коряс начальниксь полковниксь Павел Максимович Ягунов. Самай сонь Крымскяй фронтонь командующайсь генералсь Д.Т.Козлов путозе своднай отрядонь командиркс, кона катфоль 44-це и 51-це армиятнень Керченскяй проливть туркс эвакуацияснон ванфтоманкса-араламанкса. Колма суткаста, мзярс своднай отрядсь ськамонза тюрсь фашисттнень каршес Аджимушкай велеть маласа, Керченскяй проливть омба берякс удалась ётафтомс 100 тёжяньда лама советскяй солдат.

Тяда меле, карьхцямок сембе боеприпасонзон, своднай отрядсь валгсь Аджимушкайскяй каменоломнятнень потмос. 21 майста  тифоль мода алдонь гарнизон, конанди пингта меле максфоль Сталинонь лемса Аджимушкайскяй каменоломнянь араламань полк лем. Командиркс ульсь полковниксь П.М.Ягунов, комиссаркс—И.П.Парахин.

 Мода алдонь гарнизонть эряфоц вятевсь РККА-нь уставть вешфксонзон коряс. Полкса ульсть колма батальотт, разведчиконь командат, радистт, танкань крьвяснихть, интендантскяй часть, госпиталь, ярхцамбялень и ведень добувайхть и лия эрявикс войнать пингста службат. Сяс синь аф аньцек ашезь лоткафта, но сядонга вихонзафтозь тюремать фашисттнень каршес. А сят кружазь-перязь каменоломнятнень колючай проволокаса, китненди-ят-тненди путнесть минат, проволокать фтала латцесть пулеметт и танкат. И тяфта жа каменоломнятнень маласа фашисттненди сашендовсь кирнемс лама солдат, мезсь, конешна, пяк лездсь минь армияньконди, кона вятсь стака тюремат лия фронтса.

Полкти васенце приказса полковниксь Павел Максимович Ягунов сёрмадсь: «Шинек-венек тейнек эрявихть ванфнемс революционнай порядкать и воинскяй ялгаксшить. Мзярдовок, мянь куломать инголевок, аф арьсекшнемс пленть квалма. Эрь пелемать лангс командованиясь ваны кода Родинать миманц лангс и сембе пелихнень и паникёрхнень кармай наказама Советскяй социалистическяй государствань революционнай закоттнень вешфксснон коряс. Сяськтяма или кулотама. Лия ки тейнек аш!»

Аф кувака эряфонц

пингста П.М.Ягунов ульсь солдатокс

Сон шачсь 1900 кизонь 10 январьста Чеберчино велеса, кона тяни сувси Мордовиянь Дубенскяй районти, сокаень-видиень семьяса. 1913 кизоня аделазе велень школать. Од пингста волостной правленияса ульсь сёрмань и документонь канникс.

1919 кизонь июльста сон тусть доброволецекс Краснай Армияв. Служась Туркестанскяй отдельнай батальонца. Сяльде лама киза служась Средняй Азияса, тюрсь басмачнень каршес.

1923 кизоня аделазе В.И. Ленинонь лемса Ташкентскяй объединеннай команднай школать. 1930 и 1938 кизоня аделазень «Выстрел» курснень, коса аноклавсть средняй и старшай звенань командирхт. Ульсь ротань, батальононь, полконь командиркс.

1938 кизоня П.М.Ягунов арестовандафоль и судендафоль 10 кизос сянкса, мес ашезь пачфте власттненди ингольдень рьванц квалма, кона азфоль «шпиононь пособницакс». Но 1939 кизонь июньцта ульсь реабилитировандаф и путф Бакинскяй пехотнай училищань командиркс.

Великай Отечественнай войнать ушетксста П.М.Ягунов кемокстафоль горнострелковай 138-це девизиянь командиркс, кона тюрсь фашист-тнень каршес Керченскяй плацдармаса. 1942 кизонь март ковста полковниксь П.М.Ягунов—Крымскяй фронтонь боевой подготовкань отделонь начальник. А 1942 кизонь май ковста арась Аджимушкайскяй каменоломнянь  гарнизононь командиркс.

1942 кизонь июль ковть кучкаста полковниксь П.М.Ягунов шавовсь. Калмафоль воинскяй почестень мархта каменоломнянь тоннельса.

1987 кизоня мода алдонь гарнизононь командирть калмонц музь поисковикне. Тяда меле  полковникть П.М.Ягуновонь останканза торжественнайста калмафтольхть Аджимушкай посёлкань центральнай скверса.

Материалть аноклазе В.Нестеров.