П.К.Торопкинонь шачема шиста 100 кизонь топодемати

Лемоц эвондась литератураса, кода корхнихть, ёфси апак учсек: ашель, ашель и вдруг—П.Торопкин, колма стихотвореният: «Од строитель», «Лихтибря», «Од вийти тозерсь сюконясь».

Лемоц кармась содавома «Сяськома» альманахса 1955 кизоня, а тяда меле васьфневсь «Мокша» журналть пцтай эрь номерсонза.

П.К.Торопкин поэзияв эсь яннянц вешендезе мянь комозьшка киза, коза аньцек ашезе вятне эряфсь, кодама аньцек тевса ашезень варчсе виензон. Павел Кузьмич—и строитель, и каменщик, и маляр, и плотник, и штукатур. Но коса афоль уле, фалу кяденьбецек мархтонза мольсть перац, мастерокоц и оцю надиямац седисонза комболды поэтическяй толнять лангс.

Мольсть кизотне, и Торопкин ушедсь «эсь валонц» азондома сятнень колга, кит теенза ульсть сембода малат, кеподсь мора строительхнень, ялганзон колга, эсь колганза. Тя темась—трудяй ломанть, кона арась теенза главнайкс марнек творчествасонза.

Трудовой эряфонц колга П.Торопкин лама кизода меле сёрмады:

Шабакс алянь тевс

                          кундань,—

Стак изь ётне шизе,

Ульсть монь эряфсон

                          тундат,

Ульсть и сёксень

                           пизепт.

Кепсень шочкт и

                 кепсень кефт,

Тиень кудта лама…

Васенце стихонзон эвондамда меле Павел Торопкинонь лиссь васенце книгац—«Од  толня», конань нолдазе Мордовскяй книжнай издательствась 1958 кизоня. Сяльде лувихне получазь «Тундань зойф» (1960), «Панда пряса толхт»  (1964), «Кие сяда вишкста касы» (1974), «Клянцекса шись» (1980), «Каварксу ки» (1996) книганзон. Сонь стихотворениянзон рузкс васенцекс ётафтозень содаф поэтсь Станислав Куняев. Синь лиссть «Лесные ручейки» (1961), «Огни на горе» (1967), «Лесная застава» (1979) книганзон эса.

Поэтсь эсь стихонзон эса седи ваксста сёрмадсь трудть, перьфпяльть, кельгомать колга. Сон ашезь сёрматкшне сталмотнень-нужатнень колга, конат савсть няемс эстеенза. Аньцек мекольдень кизотнень тянь ширде поэтсь панжезе седиенц. «Каварксу ки» повестьсонза героенц эряфста ламось лятфнесы сонцень эряфонц.

 «Пяшень медь» стихотворениясонза Павел Торопкин азонды вальмалост касы пяшеть колга. тянь, кле, озафтозе алязе, мзярда шачень мон, цёрац. Тядяц спорязевсь, сонь койсонза, эряволь озафтомс тума, штоба цёрац касоль богатырькс, а пяше  озафнихть, мзярда шачи стирь. Сембе сяка аляц изь эльбяде. Кассь-келемсь пяшесь и, кода корхтай поэтсь, тяни сонь алонза скомня лангс «озсихть идне миртть-рьват», а пяше пряти мешне валгондыхть, кочкайхть панчфонзон эзда ламбама сок, «теенть унокт—пяшень медь». Вдь сембось, мезе тият эряфса, ляды иттненди и унокненди, синь инксост сон пичеди, эняльди Шкабавазти ванфтомс. Иттнень и унокнень колга пичедемась П.К.Торопкинонь стихонзон эса сидеста няеви сяс, мес поэтсь ётась эряфонь аф тёждя ки, повондсь оцю нужас и зиянц, но тянь лангс апак ватт, ванфтозе седисонза надиямать, арась виде вайме ломанькс. 

Павел Кузьмич Торопкин аш шиса, но сонь поэтонь толняц палы тячемс. Поэтть книганза ащихть вешендемань ки лангса. Сон  творчествац тонафневи школаса, высшай учебнай заведениятнень эса,  ученайхне, студенттне тяштихть научнай работат.

А.С.Пушкинонь лемса Национальнай библиотекаса башка вастса ванфтовихть поэтть сембе книганза, произведениянза, конат лисендсть рузонь и мокшень кяльса газетатнень, журналхнень, коллективнай сборникнень эса, а тяфта жа лама материалда сонь эряфонц и творческяй кинц колга, конат максыхть лувихненди оцю лезкс.

                                                                                                        В.Пронина,

                                                             А.С.Пушкинонь лемса Национальнай

                                                                                                      библиотекань

                                                                                    главнай библиотекарсь.