Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Обратная связь (Газета - Читатель)

КУРТАШКАСЬ АРАСЬ ТЕЕНЗА РОДНОЙКС

Старошайговскяй райононь Сире Теризморга велень мокшень стирсь Зоя Ямашкина мзярдовок ашезь арьсекшне сянь колга, што сотсы эряфонц Курташка велеть мархта. Шачсь сон трудонь кельги оцю семьяса, коса касфтовсть мянь вейхкса итть. Тядяц и аляц трудонь кельги ломаттельхть. Иван Дмитриевич сембе эсь эряфонц максозе Сире Теризморгань колхозти. Мезькс аньцек ашезь труденда: ульсь и трактористокс, и комбайнеркс, и  кузнецокс. Фотографиянц сидеста ульсь кода няемс Почётонь доскать лангста. Рьвац, Мария Григорьевна, аф аньцек вейхкса итть шачфтсь, но и кенерькшнесь покодемс колхозса. Трудонь кельгомац ётась и идензонды, конат кассть, срадсть мокшэрзянь краеньконь разнай уженяванза. Эряйхть синь и Саранскяйса, и Торбееваса, и Атюрьевскяй райононь велетнень эса.

 

Зоя Ивановна аделазе Сире Теризморгань средняй  общеобразовательнай школать. Тонафнесь Саранскяйса поваронь тевти. Сисем кизот трудендась «Биохимик» предприятиянь столовайса, пидесь-панць ярхцамбяль оцю коллективонди.

 

Атюрьевскяй райононь Вольно-Никольск велеса эрясть-ащесть сазороц Валентина и брадоц Семен. Зоя Ивановна сидеста сашендсь пялост инжикс ваймама шиста, отпускста. Тяста и васьфтезе сай пингонь мирденц В.И.Левановонь. Крьвязсь ётксост кельгомань цятконясь. Аф лама пингта меле Зоя Ивановна ётась эряма Курташкав. Тя ульсь 1992 кизоня. Васенда оттне эрясть лац, шачсть шабасна. А меле од мокшалясь ушедсь сярядема. То Атерень больницяса пчксесь, то Саранскяйса, но урмась ашезь сяськов. 39 кизоса Виктор Иванович тусь эряфста. 16 киза ни Зоя Ивановна удава. Аф ваномок сембе стакатнень-сталмотнень лангс, ськамонза касфтозень эсь идензон: стиренц и цёранц. Макссь теест цебярь воспитания, тонафтозень трудть кельгома. Анастасия эряй Торбеева поселкаса. Сонцень семьяц, эряфоц-ащефоц. Касыхть кафта цёранянза—Стас и Кирилл. Иван стане жа эряй Торбееваса, покоди мясокомбинатса. Ётай кизонь августста рьвяясь.

 

Фкя ширде, Зоя Ивановна кельгома тядя, щава. Омба ширде, авань павазоц ётась ваксканза. Ашезь кенере марямс эсь прянц кельгома рьвакс. Тянивок кизодонза аф кати мзяра, а эряй ськамонза. Сонць тиендьсыне и авань,  и алянь тефнень. Зоя Ивановна пцтай 18 киза трудендась Курташкань колхозса дояркакс. Шнама ломанель хозяйстваса. Сяльде ётась тинголангу разнорабочайкс.

 

З.И.Левановати Курташкась арась родной велекс. Тясот сонь раднянза, ялганза. Скучендама, ськамонза ризносема вестевок аф кадондсазь. Финцне сайхть седикс-ваймокс корхнема, омбонцне—пара советонь кизефтема. Зоя Ивановна—ломанць пяк простой, пара вайме и лямбе седи. Кажнайти муй мезе азомс, сембонь мархта мушенды марстонь кяль.

 

И.петров.

 


09.07.2020 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин