Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Е.Я.Терёшкинать 75 кизонь топодеманцты

КАЛАДА ВАРЯГАТ

 

Сменада меле эряскодан сяда курок пачкодемс квартиразон, катк содаса: тоса тага васьфтьсамазь аньцек пиндолды шкафне. Сякокс кенордазь куцендян нилеце этажу, панчсеса кенкшть, кона васьфнесамань аф мяль вельде чирназь, и сувсян потму, ниле стенань эшксс. Щакшнеса лямбе халатозень, седиень озафтомс сапоньца аф весть шташендсайне кяднень и путнеса газовай плитать лангс чайникть. Ужин.(...) Кати-мес сашендан мяльс: «Эсь эряфозе ашезь удала. Да. Ашезь удала». Шарьхкодьса—мес. Аньцек эстейневок тянь аф ёраса педа-пес азомс. Тя сяс, мес лядонь ськамон, мес седиезе тоскавай кельгомати, мес ёран кирдемс кядьсон эсь иднязень...

 

Тячивок эрязста сувань автобусти, мунь шава васта, озань. Автобуссь курокста пяшкодсь. Сувасть сумкаснон мархта мзярдовок аф явонды ават, цють копордаф и кятав алят—сумкафтомот, хоккейнай клюшка мархта цёрашабат, весяла стирнят. Шум, жалф.

 

Ёфси инголен арась аля, види кядьса кундась ингольден озама копорти. Вай, тядякай-авакай! Нинге ашень варжакста шамазонза, а седиезе лонтядсь алу. Ванонь алять кяденц лангс и пелень сяда вяри сельмонень кеподемаснон. Кали тняра кизода меле няйса сянь, кинь тяряфнень юкстамс и кие стаки ашезь панев седистон.

 

(...)Да, тя Валера—монь кельгомазе, аердафозе и аердаезе. Вакссонза од ава—мондедон од. Пильгста-пряс ваныне сонь: удалаф ронгс-пондс, сядонга удалаф шамас—юман ваксозонза. Кати-мезе сялгозе мяштезень.

 

(...)Тя ульсь кунара. Валерань васьфтине бал-маскарадса Од кизонь илять. Мяляфтса, молеме Люсять мархта институтонь спортивнай залу, косоль балсь. Народта пяшксель. Мон виздень, кодавок ашень сменда лисемс танцевандама. Люся кяжиякшнесь ни лангозон, кле, марнек иляденц юмафтозе инксон и гразясь оду мархтон козовок аф молемс.

 

Ушедсь вальссь—мзяроцесь ни!—и минь мекольцекс лисеме кругти. Шарондоме вишкста, и афи шарьхкодень, кода лоткась музыкась. Омбоце танецти ёраме ни тага лисемс, тяса ваксозонк маладсть кафта цёрат.

 

(...)—Шаронттама, стирнят?—мярьгсь фкясь, сяда серись, и арась каршезон.

 

Цёрась учсь аф ламос, венептезе кяденц:

 

—Валера лемозе. А тонь кода, мазы стирь?

 

Монга азыне лемозень. Тяда меле ни лисеме танцевандайхнень ёткс. Шарондсь тёждяста, вятнемань стане, бта тяшка залса аньцек кафонектолеме. Конашкава эста пароль мялезон! Сон кизефнесь, мон отвечсень и салава варжакснень лангозонза—цебярь цёрась, мезевок аф азат.

 

Тяда меле нинге ламоль танецта, и Валера тернемань аньцек монь. Общежитиявга туме марса. Кармань содамонза: работай заводса, аделазе тяка институтть, коса тонафнян мон. Тядянза-алянза эряйхть велеса.

 

Комнатазонк сувань ёфси пялевень карша, мзярда курсстонк стирьхне и синь якай ялгасна цингорфтозь шампанскяйда пяшксе бокалснон Од кизоть инкса. Тейневок куроконе венептсть бокал. И катк тяда инголе вестевок ашень копоря, лиятнень мархта симине шампанскяйть.

 

Симф шампанскяйсь юкссезе кялезень, и мон пялес рахазь азыне:

 

—Эх, стирнят, няелесте, кодама цёра прважамань!

 

—Ваносте,—дивандазевсь Лиза.—Аф стак русне мярьгондихть: «Сетьме эрьхкса шяйтанда сяда лама». А минь сетьмонякс лувондсаськ.

 

(...)Няендеськ: ялганьконь ули аф цебярь промозоц—пяк ни сембонь эса тонафтсь. Мярьгат, фалу пельсь—киньге мархта лиси кальдяв. Сувай ломанць комнатав кенярдезь, а сон лаподи вал, бта пря ланга эрьхтьсы, коза юмай сянь кенярдемац.

 

Моньге эста колавсь мялезе, аньцек мезьге ашень кашторда. «И афкукс,—арьсезевонь,—кеняртькшнян, а, шять, Валера оду аф няфти прявок. Валера... А стама, шта, сонь лемоц? Можна вдь всякайкс лемдемс пря...»

 

Омбоце шиня тердемазь телефонти. Звонясь Валера. И минь мархтонза туме кинос. Тяда меле кафоненк ётафнеськ сембе иляттнень.

 

(...)Весть мархтонза повоме палас. (...) Минь нажятькшнеме ни общежитияти, мзярда инголенк эвондасть ся колмотне. Фкясь эздост вельф кувакаль, нльне тарвазкс мяндевсь. Кяденза цють аф плманжанзонды токсихть. Кувакать ваксс лоткась омбоцесь и прянь няезь венептезе инголи пильгонц.

 

(...)Эстокиге ся кафттне, кода вача врьгаст, комотсть лангозонза. Мезе лиссь сяда тов, кальдявста мяляфтса. Васьфтихнень эзда фкясь цяткофтомань шири, и сембе умборондасть Валеранди. А сон сембе вийса аралась пря.

 

(...) Тяда меле мон киньге эзда ни ашине сепонда павазозень, мезсь пяк кеняртьфнезе сонь. Стирь ялгане каясть лангозон сельме и пяк мяльсноль, штоба Валера вестьке суваль комнатазонк.

 

И вов сон пялонк. Стирьхне каванясть эсонза чайда, корхнесть-пеетькшнесть, а синць салаване ванондозь. Сембода пяк перьфканза шарсь Лиза. Сон кизефнезе Валерань, коса работай, мзяра получай... И пялендсь, пялендсь эсонза оржа сельмоса. Мон няине: Валерань тя аф мялезонза, сяс сон курокста срхкась тумс.

 

Конашкава пароль мялезон, мзярда тумдонза меле стирьхне ушедсть шнамонза: и конашкава мазы, и конашкава сетьме, и машты прянь вятема. Ашезь кашторда аньцек Лиза. Мзярда сембе лоткасть, сон рахазь и кичкорязь мярьгсь:

 

—Цёрась ничаво! Аньцек кати-мес варяганза каладот.

 

Ялгане сетьмость, а мон ашень шарьхкоде, мезень колга моли корхтамась. «Мезенди лятфтазень варягатнень?» Ну и катк каладот, сяви зарплата—отт рамай. Вдь варягатне калаткшнихть»,—арьсень мон. А Лиза стаки изгордсь:

 

—Ванан, ванан, стирь, ёфси шаракодсь пряце. А пинголь ни ёньц кундамс. Кенярдеть, цебярь жених муть. Эх, ялгай, авардемс тяза сав,—и сяда сетьмоста ушедсь:—Тячи якань почтав, кудста ярмаконя сась. Арань очередьс, ванан, тоннесь ащи инголен, колмошка ломань вельф. Кинди-бди ярмак кучсь. И, содасак, мзяра? Мянь ведьгемонь цалковай.

 

—Катк кучсь. Пади, тядянцты или киндивок шумонц пандсь,—мярьгонь мон.

 

—Волясь тонь, аньцек ёран сельмотнень панжемс. Тон ваттака, пальта лоскодонц, мярьган, кемоньшка киза ни каннесы. А вдь зарплатац, улема, аф ёмла—инженер. Ботинканзовок—бта крокодилонь кургс повондсть... Афоли иднянзон тряй...

 

Стакаста тусть шитне. Васетькшнеме Валерань мархта ингольцекс эрь илядня. Сон рамась од перчаткат, но мялезон ашесть ту—можналь аф ужяльдемс ярмаконзон сяда цебяренди. Пальтацка таштоняль, кунара ни полафтомаль.

 

—Валера, а мес тёждя пальта аф щаят, аф эендамда пелят?

 

Мзярс сон мезевок ашезь корхта, сяльде азозе:

 

—Аш, сяс и аф щаян. Рамань—оцю. Савсь ательев максомс кирьфтафтомс, а тоса, тонць содасак, кода работайхть, кизоти тисазь...

 

—Васькафнят,—ашень кирде мон.—Тейть аш мезень лангс рамамс од пальта. Фкя моднай вещаце аш, якат кода... Коза тиендьсак ина зарплатацень? Кинь эса тряят? Шабатнень?—вайгялезе трнатозевсь кяжть эзда.

 

Валеранди, мярьгат, пря ланга каясть. Лоткась и ламос ашезь кашторда. Меколи казямста азозе:

 

—Мон ванан, тряпкатненди пяк прафтат. Тряпкатнень эшксста ломанть ваймонц аф няйсак. Сокорат, а тя сембода пелькссь... Мяляфтк, аф лоскоттнень эса тевсь. Вещась, кодама пара афоль уле, эжттянза аньцек аф ламос, меле калады-тии, кода монь варягане, сави ёрдамс. Пальта и варягат рамавихть, а вов паваз... Соньфтемонза фалу кельме,—мярьгсь тяфта, шарфтсь и эрязста тусь.

 

Валерань валонза, бта эскт, пезсть прязон. Сялгондсть эсон. Ванонь мельганза и эста ашень веронда: васедень мархтонза мекольцеда.

 

И вов тячи тага няйса. Косоль сон тянемс? Месендсь? Эрясь. Эрясь эсь эряфсонза...

 

Автобуссь лоткась. Валера и од авась валгсть, аф эряскодозь тусть сери куттнень шири.(...)

 

Евдокия ТЕРЁШКИНА.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022