Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Тема дня

Владимир ВОЛКОВ: МИНЬ ГЛАВНАЙ ЗАДАЧАНЬКЕ—ТИЕМС РЕСПУБЛИКАНЬ СЕМБЕ ЭРЯЙХНЕНДИ МЕДИЦИНСКЯЙ ЛЕЗКСОНЬ МАКСОМАНЬ ЦЕБЯРЬ УСЛОВИЯТ"

Кода мярьгсь республикань Оцюнясь, ня специализированнай машинатнень получамасна  лездыхть медицинскяй лезксть доступнайшинц касфтоманцты.

 

«Тяфтама задача путсь Россиянь Президентсь В.В.Путин, и минь сонь пяшкотькшнесаськ,—азозе Владимир Волков.—Российскяй производствань од техникась максови 20 пчкафтомань заведенияти республикань 16 райоттнень эса и Саранскяйса. Вастста вастс пачфневи комплекснень тевс нолямасна тии возможность максомс васенце медицинскяй лезксть республикань 245 тёжянь эряйти, конат эряйхть 1200-да лама населеннай пунктова. Тяконди, ня велетнень пялеснон эса аш васенце звенань медицинскяй организацият. И комплекснень работаса башка мяль кармай шарфневома ичкоздень велетнень эса, коса лувондови 100 ломаньда кржа, эряйхнень обслуживанияснон лангс».

 

Од техникась инь тяниень пингонне. Вастста вастс пачфневи ФАП-сь—тя шары лангса поликлиника. Эсонза ули сембе эрявикс оборудованиясь урматнень муманкса, курокстонь лезксонь максоманкса. Медицинскяй комплексне кармайхть пачкотькшнема велетненди диспансеризациянь, профосмотрань, прививкань ётафтоманкса, пекихнень, одс шачихнень, эряфкшу и хроническяй урма мархта ломаттнень мельге ваноманкса. Пчкафтомань-диагнозонь лезксть тяфтама поликлиникаса ули кода получамс шити 50 ломанти.

 

«Прием кармайхть вятема аф аньцек терапевттне, но и узкай специалисттне. Специальнай бригадатнень лувксс сувсихть офтальмолокт, ЛОР-врачт, акушер-гинеколокт, кда эрявксты, педиатрхт и хируркт,—мярьгсь Владимир Волков.—Тяфта жа ванондсаськ кизефксть, штоба вастста вастс пачфневи      ФАП-нень эса улельхть аптекат. Тя мярьгонди ичкоздень велень эряйхненди получамс рецептт и тозк рамамс лекарстват».

 

Аф сяда ёмла мяль шарфневи курокстонь медицинскяй лезксонь максомань автопаркть одкстоптоманцты.

 

«Штоба ванфтомс ломаттнень шумбрашиснон, врачненди эряви сашендомс эрь серьгядемать коряс, аф юмафнемок минутатнень,—мярьгсь Мордовиянь Оцюнясь.—Мекольдень 5 кизотнень республикав сась курокстонь лезксонь максомань 100-да лама машина. И тячи минь макстама панжемат нинге транспортонь 10 единицать эзда. Сембось тя арась возможнайкс Российскяй Федерациянь Президентть В.В.Путинонь ширень кирдеманц вельде. Мон эняльдян, штоба сембе од техникась, пингонь апак тарксек, ушедоль работама, пачкодель велетненди, коса аш стационарнай пчкафтомань учрежденият. Минь главнай задачаньке—тиемс условият республикань сембе эряйхненди качественнай медицинскяй лезксонь максоманкса. Тя приоритетсь, Президентть инициативанц коряс, кемокстаф тяни Российскяй Федерациянь Конституцияса».

 

Кода отмечазе Мордовиянь Оцюнясь, питнефтома и массовай здравоохранениясь, медицинать доступнайшиц, населениянь сембе группатнень профилактикасна арасть оцю сатфксокс коронавирусть каршес тюремаса. Тянкса тейнек удалась аф пачкодемс критическяй сценарийти, кирдемс тя стакать-сталмоть и ванфтомс тёжятть ломанень эряф. Тяни республикась ушедсь виияфнема плановай и специализированнай лезксонь максомань объемтнень. Медучреждениятне фкя-фкянь мельге лихневихть ковиднай госпиталень режимста.

 

Республикань Оцюнясь азсь благодарностень валхт медицинскяй работникненди коронавируснай инфекциять келемоманц пингста стака работанкса и башка азозе, што здравоохранениянь васенце звенать кемокстамац кармай мольфтевома сяда тов. Тядде республикаса кармай панчф 70 стационарнай ФАП и врачебнай амбулатория. Оцю мяль шарфтови «Бережливая поликлиника» проектти. Сяда тов рамсеви медицинскяй техника, ИВЛ-нь аппаратт, лекарстват, курокстонь лезксонь максомань машинат.

 

«Тядде минь панжеме идень поликлиника Химмашса, ушедозе работанц оцю ломаненди од поликлиникась «Юбилейный» микрорайонца, ковда инголе минь кярьмодеме оцю проектти—Юго-Западса Идень больницять хирургическяй комплексонц строяманцты,—мярьгсь Владимир Волков.—Тя больницясь кармай пяшкотьф тяниень пингонь оборудованияса, тянкса минь тонафнеськ российскяй и мировой медицинскяй центратнень опытснон. Тяда башка, тядде минь панчсаськ онкодиспансеронь поликлиникать и ушедсаськ сонь ташта корпусонзон одкстоптомаснон. Тяфта жа ушеттама строяма Рузаевкаса идень поликлиника. 2024 кизоти самс минь пяшкодьсаськ марнек республикать эзга здравоохранениянь васенце звенать».

 

Мордовиянь Оцюнясь максозень панжематнень од медицинскяй машинатнень эзда республикань пчкафтомань учреждениянь главнай врачненди.

 

Курокстонь лезксонь максомань 10 автомобильхне максфтольхть курокстонь лезксонь максомань Станцияти, Мордовскяй республиканскяй клиническяй больницяти, Зубово-Полянскяй, Краснослободскяй, Комсомольскяй и Рузаевскяй районнай больницятненди.

 

Мордовиянь Оцюнясь ванозе од техникать и макссь оцю оценка сонь возможностензонды. Республикань здравоохранениянь министрть Олег Маркинонь инголе путсь задача, штоба ня медицинскяй комплексне работальхть сембе вийса, тянкса эряви ладямс работань системать ломаттнень вешфксснон коряс.

 


16.07.2020 №
 
 
 

 
НОВОСТИ

Синь арьсесть народоньконь сай пингонц колга

13.08.2020  № 31
 

«Сурский рубеж» фестивалень конкурсс максф 250-да лама заявка

Шумордавсь «Сурский рубеж» патриотическяй моронь фестивалень конкурсс заявкатнень примамасна. Мордовиянь сембе райоттнень эзда и Чувашия Республикаста максф 250-да  лама заявка. Кеняртьфти ся, што конкурсанттнень ёткса улихть и вете кизоса шабат, и 80 кизода сире ветератт. Сембе моротнень эса, конатнень синь морасазь, шарьхкотькшневи странаньконь, сяськоманьконь инкса гордостень марямасна!
«Сурский рубеж» проектсь—гражданскяй обществать виияфнеманкса водендаф Президентскяй грантонь фондть 2020 кизонь васенце этапонц панжада конкурсонь сяськись. Тя военно-патриотическяй моронь фестиваль, кона ётафтови 1941-1945 кизотнень Великай Отечественнай войнаса советскяй народть Сяськоманц 75 кизонь топодеманц и 1939-1945 кизотнень омбоце мировой войнать шумордаманц праздновандамаснон мяльса кирдезь. Водендаф фестивальсь Мордовиянь ломаттнень оцю подвигснон колга историческяй мялямть ванфтоманкса.
13.08.2020  № 31
 

Е.С.Кирдяпина:«Мзярс ванфтови кяленьке, снярс кармай эряма нацияньке»

Ивановка велеса героиняньке шумордазе начальнай школать, а меле содамошит пуропнесь Морд-Полянаса. Школаса Ленась тонафнесь  лац. Пяк кельгозень мокшень кялень и литературань урокнень. «Литературань учителеньке най путнелезе Ленать тейнек примеркс,—лятфнесы Кирдяпинать фкя класса тонафни ялгац Е.И.Чекмарёва.—Урокнень пингста минь сембе старандаме лац-ряц азомс лувфть, максомс характеристика геройхненди, и сембоса кати-мезе ашезь сатне. Тяса терневсь доскати Ленась. Азы фкя вал, и марнек шарьхкотьф, сембось кода эряви. И эзк Нина Павловнаньке юватькшнель: «Молодецат, Лена!».
Нинге шабакс Е.С.Кирдяпинать салселезе мяленц учителень тевсь. Сяс школать шумордамда меле мялецоль тонафнемс тя профессияти. Но вов коса прябалась: сянкса, штоба тумс тонафнема Саранскяи, эрявсть ярмакт, а коста синь сявомс? Эста од стирсь, аньцек получазе аттестатть, лиссь работама. Киза покодсь Зубуса ламповай заводса, кочкась ярмаконя и сембе сяка пяшкодезе мяленц—поступась тонафнема Н.П.Огарёвонь лемса МГУ-нь филологическяй факультету.
13.08.2020  № 31
 

Аш стама тев, кона улель теенза аф вийс коре

Мзярда сань мяльс тяштемс Рузаевскяй райононь Мокшень Пишля велень эряйть, зрнянь кядь алять Фёдор Иванович Юдинонь колга, абондонь, сяс мес ашине сода мезьста ушедомс. Фёдор Иванович канневи стама ломаттненди, конат маштсазь семботь. Аш стама тев, кона улель теенза аф вийс коре. Нят аф шава валхт, а афкукс тяфта. И эрь тевсь, конанди  Мастерсь кярьмоди, кода корхнихть мокшень тя велеса, налхкозь налхки кядьсонза.
Аф кунара Мокшень Пишля велень клубть видеса панжевсь «Мастера и рукодельницы» творческяй мастерскойсь. Ламотнень эвондась мяльсна варжамс вийснон кядьтефнень, тяконь лувксса и кодамать (ткачествать) эса. Но тя ремеслась, аф ваномок рамаф од и кунардонь уликс кодамань статтнень лангс, аф эстокиге макссь пря, сяс мес пцтай юкстафоль и аф курокста мувсь ломань, кона шарьхкодель тя тевса.
Фкя шиня Фёдор Иванович Юдин сувась велень клубу, ванозе тостонь музейста кодамань кунардонь  станть, кона кунара ни ащесь пяльксонь пялькс. Тевонь содай мастерсь эстокиге азозе, кодама пялькст аф сатнихть, а кодама уликсне полафтомат ни, сяс мес таштомсть пингть сюнеда. И аф аньцек азозе, кодама пялькст аф сатнихть, а тиезень синь, кандозень клубу и кочказе станть! Тяфта и арась содафокс, што Фёдор Иванович машты кодамань станца работама. Коса и мзярда тонадсь тянди? Валонзон коряс, тя ремеслась ётась теенза бабанц Устиния Павловнань эзда.  А алянц, Иван Афанасьевичень, мархта лама кизода инголе сон кочксесь кодамань стан.
13.08.2020  № 31
 

АНОКЛАВИ памятник Михаил Девятаевонди

Торбеево посёлкать паркса путови бронзаста монумент легендарнай лётчикти, Советскяй Союзонь Геройти Михаил Петрович Девятаевонди.
Михаил Девятаевонди скульптурнай композициянь тиемать коряс 2019 кизонь мартста Мордовиянь Оцюнясь Владимир Волков пшкядсь Российскяй военно-историческяй обществати, кона, кода азондови РВИО-ть официальнай сайтсонза, кирдезе тя мяльть ширенц.
«Культура» национальнай проектть рамкаса РВИО-сь февральста макссь старт Советскяй Союзонь Геройти М.П.Девятаевонди памятниконь инь цебярь проектонь  арьсемать коряс международнай конкурсти. Коронавирусонь пандемиясь сувафтсь кой-кодама полафткст конкурсти итогонь тиемань пингти. Но аф кунара эксперт-тне ванозь максф творческяй заявкатнень и инь цебярькс лувфоль скульпторть Андрей Коробцовонь и архитекторть Константин Фоминонь проектсна.
13.08.2020  № 31
 
 

Торжественнай собраниясЬ лемтьфоль Строителень шити

13.08.2020  № 31
 

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин