Мазыхть мокшень стиреньке

Газетать «Мазыхть мокшень стиреньке» рубрикасонза содафттядязь мокшень мазы нинге фкя стирь мархта. Тячиень героиняньке эряй лия регионца—Самарскяй областьса, но аляц шачемас коре Атерьста, сяс мокшэрзянь масторть мархта сотксонза пяк кемот, сидеста уленди тяса.

Кафтонь-крда лад арси мялезт, мзярда удалси мумс лия региононь мокшень ломатть, конат кородозь ванфтсазь сембе минценнеть, хуш возможностьсна Мордовияса эряйхнень коряс кой-коста сяда ёмлат.

Тольятти ошень эряйсь Мария Панина—мокшень стирь. Сафтсы аф аньцек тонафнемаса. Вов ни лама киза Маша тяшни стихт. Нинге сон пяк кельгсы мораманц, мезсь вятезе сонь «Прялица» идень фольклорнай ансамбльти, конань мархта 10 кизот ни уленди эстраднай, народнай, патриотическяй моронь районнай пялькстоматнень эса. Фкя кизоня сатозе колмоце вастть «Мирсь культурать пачк» фольклорнай моронь конкурсса, коса моразе «Пандо прясо» мороть. Жюрись и ваныхне башка мяль шарфтсть Машань кайги, мазы вайгяленц, а стане жа—национальнай щамонзон лангс.

Мокшень стирсь кирди кеме соткст Тольятти ошень Мокшэрзянь культурнай центрать мархта. Тядяц, Ирина Владимировна, шачсь-кассь Тольяттиса, сонь аляц (Машань щятяц)—Мордовиянь Зубово-Полянскяй райононь Умёт посёлкаста. Машань аляц, мокшалясь Андрей Николаевич Панин, Атерь велень. Кудса фалу корхтай мокшекс, сяс Маша лац шарьхкодьсы мокшень кяльть. Тяда башка, содамошинзон мокшень кяльса козякофнесыне мокшэрзянь мастору раднянзон шири сашендомста.

Ирина Владимировна морсесь Мокшэрзянь культурнай центрать «Лайме порась» ансамбльсонза, сяс моротненди, сиде моронятненди тонафтозе стиренц. Маша оцю мяльса нолясыне синь тевс сценав лисендемста.

Пялькстоматнень эса Мария аф весть лувондсь мокшень стихт: «Очижинь куд», «Сёксе» и лиятнень. Мяль шарфни «Валенки», «Гармонь моя», «Ой, то не вечер» рузонь моротненди. Якась музыкальнай школав фортепианоть коряс занятияс. Примсесь участия православнай лагерьса, теенза удалась улемс конкурсса Владимирса и Суздальса. Кельгома моронзон эзда фкясь—«Мокшень крайняй». Аф ваномок Мордовиять эзда ширеса эрямать лангс, Мариянь эса палы минценнети кельгомань толнясь. Стирсь оцю мяльса пачфни алянц ёмла родинанц колга ялганзонды.

Мария Панина кемонь кизода инголе сась «Прялица» ансамбляв и прязонза вестевок ашезь сашенда музыкальнай тя коллективста тумать колга мяльсь. Меколанкт, сон ёрай сотомс эряфонц музыкать мархта. Сяс тядде, Тольятти ошень 71№ школать 9 классонц шумордамдонза меле, поступась Р.К.Щедринонь лемса Музыкальнай колледжу. Надияй, што сяда товга кармай морсема «Прялица» ансамбльса.

Меля, 2019 кизоня, мокшень стирсь якась Сочи ошу, коса занязе I-це вастть «Мелодии моря» конкурсса. Региональнай конкурснень лувкссна, конатнень эса сон примсесь участия и сявондсь тоса вастт, сембе афи лятфтавихть.

Маша пяк кельгсы сценать, выступандаманц. Вайгялец мазы, тушенды кулхцондыхнень мяльс. Сяс фалу кайгихть лемозонза кядень вии цяпамат. Нинге ёрай тонадомс балалайкаса морама. Алянц, Атерень мокшалять Андрей Николаевич Панинонь, мархта илять кудса морсихть сиде моронят гармониять коряс. Минь, кле, аф профессиональнай музыканттама, а любительхтяма, но тевоньконь тиендьсаськ седи ваксста. Семьянь концерттнень васенце ванысна—Мариянь тядяц Ирина Владимировна и щавац Валентина Ивановна. Атерьса эряй атяц Николай Павлович, конань шири Паниттне, ётксост и Маша, сашендыхть оцю мяльса. Николай Павлович кельгсы кулхцондомс кода морай Мария.

Мокшень стирсь тяштсь стих рузонь кяльса Великай Победать 75 кизонь топодеманцты. Нинге варчсесыне виензон моронди музыкань сёрмадомаса.

Мокшень щапнень-каряпнень Паниттне стирьснонды стафнесазь синць. Тяда башка, тя тевса Ирина Владимировнанди лезни ялгац. Сценав лисендемс кой-кона платьятнень аноклакшнесазь кафонест. Ирина Владимировна машты ёмла ожнаса мазыста сёрмадома. Вов тяфта, эсь вийснон мархта, тиендьсазь мазы щапнень.

Тяни Маша ушеды тонафнема Музыкальнай колледжса. Инголе сонь учсесы лама мезе одня. Сон сяда тов кармай касфнема музыкальнай искусствать, морамать мархта сотф содамошинзон.

Самоизоляциять пингста мокшень стирсь ашезь аще тевфтома. Сон фалу примсесь участия интернетть вельде ётафневи акциятнень, флешмопнень эса: морсесь морот, лувондсь стихотвореният, няфнезе мокшень щамть мазышинц. Тянь коряс фотографиянзон, видеороликонзон ванозь соцсетьтнень ламоц пользователенза и макссть оцю питне.

Арьсесаськ мокшень стирти Мария Панинати сембе цебярть!

Т.АЛЬШИНА.