Поиск по сайту: 
 

Архив
 август 
 2020 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наши мокшанские сыновья и дочери

НОЛДАСЬ КУВАКА ЮРХТ МОКШЭРЗЯНЬ ЛИТЕРАТУРАТИ

Старошайговскяй райононь Сарга велесь аф оцю. Но макссь мокшэрзянь крайти лама содаф ломаньда. Нят писательхть, журналистт, учёнайхть, общественнай деятельхть. Сембонь лемснон лятфтамс аф саты газетань страницась. Но кода аф лятфтамс писательть-фронтовикть Г.А.Пьянзинонь, кона литературав васенце аськолкснень тиезень нинге ётай веконь колмогемонце кизотнень ушетксста. Тястоннет писательсь и журналистсь Ф.Ф.Пьянзин, Мордовия Республикань Заслуженнай поэтсь Р.К.Орлова, учёнайсь, филологическяй наукань кандидатсь Н.С.Алямкин, «Мокшень правдать» главнай редактороц И.С.Лушкин, содаф журналистсь В.В.Пьянзин и ламотне лиятне.

 

 

Ёфси аф кунара оцю илацоль Мордовиянь содаф писательть Ф.Ф.Пьянзинонь. Теенза 10 июньцта топодель 80 киза. Фёдор Фёдорович фалу ульсь эрьгав, отькорь ломанькс. А содамонза ушедонь ётай веконь кафксогемонце кизотнень кучкаста. Эста сон покодсь «Мокша» журналса, вятезе прозань отделть. Редакциясь ульсь Советскяй ульцяса, 55№ кудса. А мон эрянь Демократическяй ульцяса квартираса. Шуфтонь кудсь лац няевсь редакциять вальманзон эзга. Фёдор Фёдорович сидеста сувсесь корхнема, ваймама и ськамонза, и ялганзон мархта. Нят ульсть И.М.Девин, Г.И.Пинясов, С.В.Кинякин, Н.Б.Голенков. Сувсесь и В.В.Пьянзинонь, И.Н.Кудашкинонь мархта. Эрь самста мольсь оцю корхтама мокшень кяльти, литературати кельгомать колга. Конашкава сонць кельгозень кяльть и литературать, валса тя аф пачфтеви, эряволь кулемс, няемс сонцень Пьянзинонь. Ломанць пяк простоель, ару ваймоль, панжада седиель. Сёрмадсь пяк лама цебярь произведения. И сон вестевок ашезь ласьконде-панце аф казнетнень, аф титулхнень, аф славать мельге. Сонь ульсть лувиенза, конат содазь и кельгозь. Ульсть писатель и учёнай ялганза, конат макссесть сёрматфонзонды пяк оцю питне. Тяшнесть творчестванц колга П.И.Левчаев, В.М.Лобанов, Н.И.Учватов, А.П.Тяпаев, И.Н.Кудашкин, Н.Б.Голенков и лиятне. Но монь койсон, Ф.Ф.Пьянзинонь творчествац педа-пес апак тонафнек, афкуксонь питне теенза апак макст. Но тяни кассь писателень, учёнаень од поколения. Ёфси лия ванфсь литературать лангс. Арьсян, эвондайхть сяда крхка од работат и Ф.Ф.Пьянзинонь творчестванц колга. Приметаса, што учёнаень работат сонь творчестванц колга пцтай аш. А сёрмадсь сон пяк лама. Улихть и башка книганза. Синь лемсна тяфтапт: «Кда кенерят поездти», «Васедемат», «Мук эряфса вастцень», «Азк аньцек видеть», «Седить тердеманц коряс», «Сязьф арьсемат». А мзяра произведенияц лиссь марстонь сборникнень эса, «Мокша» журналса, «Мокшень правда» газетаса. Сембонь лемсна аф лятфтавихть.

 

Кой-кона писательхне и поэттне пяк сидеста васьфнихть эсь лувиснон мархта. Аф тяфтапнень эздоль Фёдор Фёдорович. Эсь лувиензон мархта пцтай ашезь васетькшне. Повондсь, конешна, писателень делегациятнень ёткс, но шурода весть. Кода сонць корхнесь, тя аф сонне, тоса маштома. Да и трудендакшнесь разнай районца разнай районнай газетава.

 

Эряфонь киц Ф.Ф.Пьянзинонь панчфса апак ацаколь. Тянкса ульсь и эсь муворшиц. Но писателень раднятне, землякне аф кельгсазь, мзярда содаф ломаньцнон колга тяштьсак видешить.

 

Фёдор Фёдорович—войнань пингонь идь. Шабакс пингоц ульсь пяк стака. Мольсь Великай Отечественнай войнась. Да и войнада мелевок эряфсь аф тёждятнень эздоль. Аф ваномок стакатнень-прябалатнень лангс, венемсь содамошитненди. Тонафнесь, пяк кельгозе лувоманц. Пяк мялезонзольхть Ф.М.Достоевскяень, Л.Н.Толстоень, А.С.Пушкинонь и рузонь лия писательхнень произведениясна. А мокшеннетнень эзда пяк кельгозе эсь земляконц Г.А.Пьянзинонь творчестванц. Оцю мяльса лувондозень стихонь и поэмань пусмонзон «Эряфть мораса», «Кафксть герой», «Чивгоксть ала». Аф весть васьфнесь, седикс-ваймокс корхнесь поэтть-фронтовикть мархта. Можна мярьгомс, Георгий Абрамович и бславазе тяштемань тевти.

 

Омбоце учителькс сай пингонь писательти ульсь Мордовиянь Народнай поэтсь, фронтовиксь И.М.Девин. Сон ванондозень Пьянзинонь работанзон, макссесь питни советт. И фалу корхнесь: «Штоба арамс цебярь сёрмадыкс, Федя, эряви лама содамс, лама тонафнемс». Вов мес, аф ваномок мезеньге лангс, васенда сисем кизот тонафнесь Саргань школаса, тоса аделазе Сире Шайгавонь средняй школать. Работась лама вастса. Но инь мяляфтовикс ульсь эряфсонза М.Горькаень лемса Литературнай институтса тонафнемац. Прянь шнафтозь и гордостень марязь Фёдор Фёдорович лятфнезе тяса тонафнеманц. Аф эрти удалась тяза поступамс, аф кажнайти сафтовсь тяса тонафнемс. Пьянзин ялгась ульсь примернай студентокс. Тонафнема пингонь эряфоц пяк интереснаель, козяль событияса. Ульсь практикаса центральнай газетатнень, журналхнень эса. Васьфнесь странань лама содаф журналист, писатель мархта, седикс-ваймокс корхнесь мархтост, няфнезень тяштьфонзон. Мезе-бди печатлакшнесть рузонь кяльса лисенди изданиятнень эса. Тя   макссесь мокшень церати вийхть, пацят, вандыень шити верондама. Тя пяк лездсь сяда товолдонь работасонза, тяштемань тевсонза. Кепотьксонди, Фёдор Фёдорович фалу лятфнезе А.Б.Чаковскяень, «Блокада» романть авторонц лемонц. Сон ульсь творческяй васедемасонза, тяфтак васьфнесь мархтонза. Лама пингонь ётазь Александр Борисович ульсь и Мордовияса, мзярда ульсь Верховнай Совету депутатонди кандидатокс. Монга сонь няине, улень, кочкайхнень мархта васьфтемасонза.

 

—Тон аньцек няить,—шутендазь корхнесь Фёдор Фёдорович.—А мон сонь мархтонза васьфнень, корхнень, азонкшнень мокшэрзянь литературать колга. Макссезе кудонь телефон номеронц. Гайфтть, кле, кда эряви кодамовок лезкс.

 

—И гайфнеть?

 

—Вестевок аш. Лезкс, конешна, эряволь. Но смелшизе ашезь сата. Киель сон и киян мон.

 

Демократическяй ульцяса эрямстон Ф.Ф.Пьянзин сувсесь ширезон пяк сидеста. А кой-коста лядондсь удома. Квартирань азоравась Т.М.Вильянова вестевок ашезе панце, ашезе сюцекшне сонь. Ломанць простоель, трудонь кельгиель. Кафксогемонце  кизотнень кучкаста шуфтонь кудсь ушневсь пенгаса. Сась Фёдор Фёдорович, кудса ашан. Таня баба мусь тев. Макссь узерь, пиланя, водендазе пенгянь керсема. Омбоцеда марса сотозь сиренять помидоранзон. Колмоцеда сёвоньца вадезе голландканц.

 

Няендине, кода трудендакшнесь Ф.Ф.Пьянзин «Мокша» журналса. Кабинетсна фалу пяшксель ломаньда. Сашендсть и сире, и од писательхть. И сембонь мархта мушендсь пинге корхтамс, ваномс сёрматфснон, максомс эрявикс советт, тиемс кой-кодама петькст.

 

Мекольдень пингонь эряфонц колга мон содан аф лама. Няендине пяк шуроста. Весть васьфтине «Мокшень правда» редакцияса.

 

—Кода эряфсь, Фёдор Фёдорович?—кизефнеса писательть.

 

—Кизос коре,—отвечась сон.

 

—Мес-бди кржа кармать сёрмадома.

 

—Сиредень, ялгай, сиредень.

 

Омбоцеда васьфтине «Мокша» журналть редакцияса улемстонза.

 

—Од произведения кандоть, Фёдор Фёдорович?

 

—Сувань корхнема,—отвечась сон.

 

А тоса ёфси юмась. Да и коста сон можналь няемс. Эрясь сон то Саргаса, то эряфкшу ломанень кудса.

 

Ф.Ф.Пьянзин мокшень оцю писатель, нолдась кувака юрхт мокшэрзянь литературати. Сон кармай эряма снярс, мзярс улихть библиотекаса книганза, мзярс одукс кармайхть нолявома сёрматф произведениянза.

 

Конешна, тяниень пингсь аф илань тиендема пинге, кода содаф, тевоньконь тапарязень пандемиясь. А вов тонафнемань од кизоть ушедомстонза школатненди эряви лятфтамс Ф.Ф.Пьянзинонь юбилеец. Эрявихть ётафтомс выставкат, творческяй илат, васьфтемат ся ломаттнень мархта, конат сонь лац содазь. А содазь сонь ламотне.

 

Илья ВЕШКИН,

 

Россиянь Писателень

 

Союзонь член.

 


16.07.2020 №
 
 
 

 
НОВОСТИ

Ушедсь сёронь урядама пингсь

Эрь гектарста ули кочкаф 50 центнер сёра

 

Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса инь оцю мяль шарфневсь и водендафоль лама вий кормань анокламати,  тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз—Левженский» ООО-нь механизаторхне.

 

 

—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста сяфтяма аф ведьгемоньда кржа центнер сёра. Кда кармай цебярь погодась, сембе  ня площаттнень  урядасаськ кафта-колма недяляста.

 

30.07.2020  № 29
 

МОРДОВИЯ РЕСПУБЛИКАНЬ ОЦЮНЯСЬ ВЛАДИМИР ВОЛКОВ ВАНОЗЕНЬ РЕСПУБЛИКАНЬ РАЙОТТНЕНЬ ЭСА СОЦИАЛЬНАЙ ОБЪЕКТТНЕНЬ СТРОЯМАСНОН КОРЯС РАБОТАТНЕНЬ МОЛЬФТЕМАСНОН

Краснослободскяй районца

 

 

24 июльста МР-нь Оцюнясь Владимир Волков ульсь Краснослободскяй районца, коса ванозе, кода мольфтевихть Бобылевские Выселки велеса «Комплексное развитие сельских территорий» программать коряс комплекснай компактнай строямать коряс проектть эряфс ётафтомац.

 

Проектть коряс арьсекшневи строямс спортивнай комплекс и  модань 132 участкаса эряма кутт. Бобылевские Выселки велесь ащи маласа Краснослободск ошти, сяс тя пцтай фкя агломерация.

 

Кода няезе Мордовиянь Оцюнясь, спортивнай сооружениять строямац мольфтеви сембе вийса и нльне графикта инголе. Республикаса тя фкя и сяка спортивнай объектсь, коса фкя вельхкс ала кармай ледовай арена, оцюфненди и иттненди бассейнат, тренажернай и фитнес-залхт. Лама функцияса спортивнай сооружениясь арай межрайоннайкс.

 

Кда сявомс проектть омбоце пяльксонц—комплекснай компактнай застройкать, тячиень шити площадкаса аделсеви газопроводонь и водопроводонь ётафтомась, тиф 1,4 вайгяльбень кувалмоса ки, лядыкс 1,7 вайгяльбесь—сай кизонь планца.

 

Владимир Волков путсь Краснослободскяй районть оцюнянц Алексей Буйновонь инголе задача—сяда виияфтомс аноклаф  территорияса куттнень строямаснон, тяконь лувксса льготнай велень ипотекать вельде.
 

 

 
30.07.2020  № 29
 
 
 
 
 
 
 

ВЛАДИМИР СУШКОВ ВЕШСЬ СЯДА ЭРЕКЛАФТОМС ТЕФНЕНЬ И КЕМОСТА ВАНОМС КАЧЕСТВАТЬ МЕЛЬГЕ

6 июльста Мордовиянь Правительствань члеттнень мархта совещанияса ванондовсть национальнай проекттнень эряфс ётафтомаснон коряс кизефксне. Республикань Правительствать Председателец Владимир Сушков отмечазе, што социальнай ширде важнай кой-кона объекттнень эса заняф аф сатомшка ломаньда и аф марнек нолявихть тевс графикнень ванфтозь работатнень пяшкотькшнеманкса строительнай механизматне.

 

 
Ётай ваймама шитнень региональнай кабминонь премьер-министрсь ванозень Идень республиканскяй клиническяй больницять хирургическяй корпусонц и Республиканскяй онкологическяй диспансерть поликлиническяй отделениянц, конат строявихть «Здравоохранение» нацпроектть рамкаса, строямаснон. Владимир Сушков мярьгсь работамс        объекттнень эса сутканьберьф и кемоста ваномс тиеви работатнень качестваснон мельге. Тяфта жа Правительствать Председателец мярьгсь анокламс уликс онкодиспансерть зданиянц петеманкса сембе документациять. Тядде нацпроектть рамкаса кармайхть одкстоптфт 70 фельдшерско-акушерскяй пункт и фкя врачебнай амбулатория.

 

09.07.2020
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин