Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

И.М.Девинонь 98 кизонь топодеманцты

КУРКА

 

 

С

 

янди, кие ульсь ётай недляшинь базарса, ашель кода аф няемс минь ошсонк содаф ломанть, сберегательнай кассань заведующайть Семён Иванович Найбелинонь. Ся базарса сон кафтошка част шарондсь куд нармонень мишендихнень перьф, щупсесь то маци, то яксярга, то сараз, но аш—мялезонза мезевок ашезь тушенда: пяк ни мелкайхть, тварьхне.

 

А нармоттнень, мярьгат, песновок аш. Сяда отькорь аватне шалхкалозт тонгсазь пацяв «жуватаснон»: шнайхть товарснон.

 

—Шити колмоксть алыяй!—ювадсь фкя авась, няфтемок саразонц лангс.

 

А омбоцесь шнай атёкшенц эса:

 

—Колмогемонь фунтфтома пуд таргай, тят вана, што няемшкац аш!..

 

Семён Иванович, хуш и пяк заняфоль рамсеманзон мархта, сякокс марязе, кода кие-бди кундась лафтувозонза:

 

—Мезе вешендят, сосед?

 

—А, Петр Иванович!..

 

Шабратне шумбракстсть кядень кундазь и молембачк азондозь, кинди мезе эряви.

 

—А мон вов тоса ванондонь куркатнень лангс,—пшкядсь Петр Иванович,—ну и штукат! Верондат или аф, но сисемшкань кило ули эсост: во!—Сон лафтувонзон келес яфодезень кядензон.—Эх и куркат! Тя, кода теест мярьгихть, конат нюрьгихть нярьснон ала, пяле килошкань! Страшна ваномс лангозост!

 

Семён Иванович салаване, мярьгат, пельсь кульсазь корхтамаснон, кизефтезе, коса ся вастсь и эряскодозь кадозе ялганц.

 

Афкукс, куркань мишендить ваксса аф сяшкава ламоль рамайда, кода ванондыда. Батюшки, вов нят куркат!

 

—Мзяра анцят, добрай ломань?—кизефтезе Найбелин азорть, сонць афи варжакстсь лангозонза.

 

—Да тон, Семён Иваныч, шумбракстомска аф ёрат ни, штоли?—пеедезевсь куркань азорсь.

 

Семён Иванович кеподезе прянц и содазе эсь велеряенц Архип Сергеевич Начкинонь.

 

—Вай, вай, вай... кинь няйса!—Найбелин люпштазе теенза венептьф кядть.

 

Мишендись пара мяльса мярьгсь:

 

—Сявк вов тянь. Сон, тейне-арам, сяда пукшу и куя.

 

—Эрь вага, варжак атказамс,—мзолгодсь Найбелин.—Мзяра ина тейть?

 

—Мзяра максат, сняра и ули, месть торгавакшнемс.

 

Эрь, эрь...—Семен Иванович таргась кафта каготкат и ингольцекс мзолдозне венептезень синь земляконцты.—Сувак базарда меле ширезон, Архип Сергеич, учтя, калякондатама,—сонць лаподезе курка мархта кяскавонц лафтубрязонза и тусь куду.

 

Куркась, или кувака кить, или шобда кяскавса ащемать эзда, кармась сяшкава противнай вайгяльса юватькшнема, што тротуарга моли ломаттне аерткшнесть Семён Ивановичень эзда шири. «Юмань,—тифтедсь Найбелинонь пряса мяль.—Тяни сембе кармайхть арьсема: аф кие-кие тяфта ранги, а мон. Ирецта, мярьгихть, сберкассань заведующайсь. Нинге начальствативок  пачфтьсазь. А мезе арьсят,—и пачфтьсазь».

 

Рьвац сонь васьфтезе вельф кенярдезь.

 

—Вай, кодама молодецат, Сенечка,—мярьгсь сон, няемок кода кудынголе важнайста якасъ куркась.

 

—Няить?—кизефтезе рьванц Семён Иванович.

 

—Тят и корхта. Коста муйть?..

 

—Коста ашине му, а муйне,—фалендась мирдсь.—Вайгялец аньцек, прахсь сявса, пяк ни...—Семён Иванович шарьхкодсь, што корхтай аф сянь, лоткась, сяльде прибавазе:—А мезенди тейнек вайгяленц, вдь виде?

 

—Чяй, аф морсема рамайть,—мярьгсь рьвясь и пачкалга лангс каясь ямкст.

 

Найбелин велясь кроватти, хуш удомац ашезь сашенда.

 

Кудонь сетьме стенатнень фталда кулевсь кати чакама, кати шямонияф эскса шавф доскань лункфтама шум.

 

Шять, смеказь тячиень рамаф куркать и вов састь уйфтемонза? А, пади, аф куркась эряви ня ворхненди, а трешниконянь ванфтозь пуроптф паршись?

 

«Но ожуда, мон тинь тонафттядязь! Аф стамонди угадяде!»—Найбелин кеподезе телефононь трубкать, прясонза тифтедсь мяль, што тяфта корхтаманц, пожалуй, кульсазь сят, кинди кулемс тя аф эряви. Сон ламос апак арьсек трнаты кядьса фатязе вастть лангста тодувонц, вельхтязе мархтонза прянц, и шобдаса кядь ёжеса кочказе милициянь отделениять номеронц.

 

—Дежурнайсь?—зерняй вайгяльса кизефтсь Семён Иванович.—Дежурнайсь? Монь пирьфсон ворхт. Да, да!.. Пежеть! Ветешканест... Эняльдян лездомс...

 

—Тон месть тоса бормацят?—вайгяленцты сргозсь рьвац.

 

—Тят сере, кие-бди чакай...

 

—Кие чакай? Коза чакай?..—ашезь шарьхкотькшне рьвясь.

 

—Салаване, мярьгонь. Кульсазь вайгяльцень. Ворхт пирьфса.

 

—Мезе?!—рьвац комотсь вастстонза.—Ворхт? Кудынголе афкукс чакасть. Авась эрязста тонгозень пильгонзон комнатнай туфлянзонды и пелезь маладсь кенкшти.

 

—Кие тоса?

 

—Панжесть!—кулевсь эчке вайгяль.

 

—Минуташка ашель кашт моли.

 

—А кие тоса?—трнаты вайгяльса тага пшкядсь азоравась.

 

—Панжесть, кли тернетяда!

 

Семён Ивановиченди мес-бди вайгяльсь марявсь содафокс. Сонь мялезонза эстокиге лядсь базарса куркань мишенди землякоц.

 

—Кизефтьке,—мярьгсь Найбелин кельме ведьса валф ломанень вайгяльса,—аф Архип Сергеевич?

 

—Кодама Архип Сергеевич?—кулевсь сяка эчке вайгяльсь.—Мезенди теенть эрявсь милиционерсь?

 

Найбелиттне крьвястсть тол, лиссть кудынголи, панжезь кенкшть милиционерти и тя пингть цифторгодсть куркать пиндолды сельмонза васенда азорхнень, сяльде милиционерть лангс и оцю няренц пупстадезе кияксти, бта лазондсь грецкяй пяштть. Милиционерсь ширем сельмот варжакстсь куркать лангс.

 

—Та-а-к,—кувакаста таргазе сон.—Кулхцонттядязь... Азондость по-порядку: мезе лиссь? Косот ворхне?

 

—Дак содандярялеськ—кие ворсь, пади, афи терделедязь,—корхтась Найбелин.

 

—Мон ёрань кизефтемс—кие васенцекс няезе или кулезе ворть и коста?

 

—Мон... мон кулине и, можна мярьгомс, няине,—кенордазь отвечась азорсь.—Ётась вальмалга, сяльде коза-бди куцсь...

 

Милиционерсь лиссь пирьфи, валдопнесь зепонь фонарняса, весть аф весть кулхцондсь, ваймонцка ашезе тарксе. Аш, мезевок аф кулеви, аф няеви. Сяльде сувась сон куду, ванондозень сембе уженятнень, шкаф и гардероб прятнень, кулхцондсь седял шири... Стоп!.. Да, афкукс. Коса-бди марявсь калтадема. Так, так... омбоцеда... И марявсь сон кудынголь шире.

 

«Ну-ка, тоза тага мольхтяма»,—мярьгсь эстеенза милиционерсь и сон, Найбелинонди-арам, фатясь пистолетонцты.

 

Кудынголе сембось ащесь станяк: куркась машнезь варжакстсь ломаттнень лангс и—пупст!—няренц мархта пачкалкти. Милиционерсь фонарнянц водендазе сонь ширезонза, учсь, аф пупстади ли тага, и самай тя пингть—тук—тук!—кафксть мельцек эрьхтсь куцьканонь эчке нярсь.

 

—Аф тя ли ворсь? Эк, кода чакай,—сяда маланяв нажядсь куркати милиционерсь.

 

Найбелин васенда варжакстсь милиционерть шамас, бта ёразе няемс—аф пеетькшни ли лангсонза порядкань ванысь, тоса нажядсь куркать ваксс и эсь лангозонза надиязь, атказась:

 

—Аф, аф... Мон, чяй, эсь сельмосон няине...

 

—Месть тага лаборды,—пшкядсь ёфси ни сргозьф рьвясь.—А мон арьсян, мес тетьксесы клдоманц шобда кудса,—мярьгсь милиционерти азоравась и сувась комнатав.

 

«А, пади, и сон, проклятайсь, эвфнесь»,—арьсесь эсь потмованза Семён Иванович Найбелин и милиционерть мельге пякстазе кудынголь кенкшть.

 

Илья ДЕВИН.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022