СЛУЖАСЬ ЭСЬ НАРОДОНЦТЫ

Сарга. Тяфта моронь мазы валкс кайги минь мокшень веленьконь лемоц. Кда варжаксттама Мордовиять картанц лангс, велеть мусаськ ёфси сонь кучкастонза.

Самай тяса 1916 кизонь 17 мартста сокаень-видиень, мокшень оцю семьяса шачсь-кассь А.С.Чалдаев. Кассь и лиссь оцю кис. Мокшэрзянь крайсонк занцесь служебнай оцю вастт, должностть, тись лама цебярьда республикати, кадсь эсь колганза пара лятфнемат.

Алексей Степановичень биографияц ламода похожай ся пингонь ломаттнень ётаф пингснонды. Нинге шабакс савсть содамс кудъётконь и паксянь тефнень, тиендемс ряцок оцюфнень мархта оцювонь тефт.

Корхтаманьконь шарфнесаськ тоза, што сай пингонь оцю рангонь руководительсь аф аньцек рана кундась сокати, но и кельгозень синь, велень ломаттнень, пефтома заботаснон. И катк сяда товолдонь эряфонь кисонза ульсь аф кржа шаркста, сембе сяка сембе эряфоц и тевонза сотфтольхть Мордовиять, сонь касоманц-вииякшнеманц мархта. А.С.Чалдаев лац шарьхкодезе эсь роленц и ответственностенц республикань эряйхнень инголе. Сон тиендезе семботь сянкса, штоба миньцонк эряфсь улель сяда тёждя и сяда пара.

Кода азоськ ни, Алексей Чалдаев рана арась лездыкс кудъётконь лама тевонь тиемста. Алянц лангс ваномста, сон сась кеме мяльс, кда ёрат эряфса мезьге сатомс, эста эряви виень аф ужяльдезь трудендамс, шудефтемс лама ливозь, юкстамс топодемс удомать колга. Школаса тонафнемстовок сон пяк старандась, сатнесь цебярь оценкат сембе предметтнень коряс. Сисем классонь аделамда меле Алексей туй тонафнема Зубово-Полянскяй педагогическяй техникуму. 1935 кизоня сонь шумордасы и кучеви работама учителькс Рыбкинскяй средняй школав. Нинге эста кармась венемома общественнай работати, фалу старандась улемс ломаттнень ёткса. Аф стак 1937 кизоня мокшень цёрась кочкави ВЛКСМ-нь Рыбкинскяй райкомонь васенце секретарькс. Тяса пуроптозе ломаттнень мархта работань, организаторскяй и управленческяй тевса васенце опытть. Сяльде, кода од и перспективнай работник, ётафтови           ВЛКСМ-нь Мордовскяй обкомть аппаратс. Кемокстави организационнай отделонь заведующайкс.

Мзярда ушедсь Великай Отечественнай войнась, А.Чалдаев эстокиге тяшти рапорт фронту тумать колга. Васенда ашезь нолне, но омбоце рапортта меле комсомолонь вожаксь щась воинскяй форма. Саранскяйса ся кизонь июль ковть песта фронту срхкафтфоль 1005 стрелковай полксь. И курокста капитанць Алексей Чалдаев воинскяй эшелонца пачкодсь эсь полконц мархта Западнай фронтонь окопненди. Тяни мокшень цёрась путфоль полконь комсоргокс, няфнесь пример лиятненди и оборонительнай бойса, и атакас молемста. Брянск ошть инкса тюремста стака бойса ранендафоль. Аньцек пчкясть рананза—одукс фронту. Теенза стане жа савсь воявамс Южнай, Сталинградскяй, 3-це Белорусскяй и 1-це Прибалтийскяй фронттнень эса. Ётазень войнань толу китнень и сяськикс мрдась эсь шачема-касома краезонза. А сяда товолдонь киц пяшксель кельгомада эряфти и ломаттненди. Сон прафтсь работати, маштсь ломаттнень пуроптомост, пара тевс водендамост.

Исяконь воинць васенда покоди КПСС-нь Зубово-Полянскяй райкомонь омбоце секретарькс, а аф лама пингонь ётазь, сявови партиянь Мордовскяй обкому. А.С.Чалдаев путови партийнай, профсоюзнай и комсомольскяй органонь отделть заведующаенцты заместителькс. Тя вастсовок эсь прянц няфтезе аньцек цебярь ширде.

Тяда меле Алексей Степанович кочксеви партиянь Пурдошкинскяй и Большеигнатовскяй райкомтненди васенце секретарькс. Аф кржа пара тев тись сон ня кафта райоттнень эса: строяфтольхть эряма кутт, фермат, ламолгофневсь сёронь, сиволень, велень хозяйствань лия продукциянь получамась.

Аф случайна паронь тии-ладяй партийнай вожакть куватьс ашезь кирде районца, сон меки серьгядеви столицав—Саранскяи. Алексей Степановиченди максови пяк оцю доверия и честь—кочкави КПСС-нь Мордовскяй обкомонь секретарькс. Лиякс мярьгомс, лафтувонзон лангс веляфтфоль стака канкс. 1954 кизоста сявомок 1966 кизоти молемс тя оцю и пяк ответственнай вастсоль. Сонь девизоцоль—вестевок аф лотксемс сатфть лангс, фалу молемс инголи. Чалдаевонь ашель кода лемдемс кабинетнай руководителькс. Сон кельгозе арнеманц республикать келес. Сембода пяк кельгозе васьфнеманц и корхнеманц простой ломаттнень—сёронь касфнихнень, жуватань тряйхнень мархта. Улема, Мордовияса аш стама веле, коса афоль уле Чалдаев ялгась. И улендсь аф стак ащемда якай-шяяйкс, а сотцезень синь эрямаснон-ащемаснон, пичефксснон-заботаснон. Сонь оцюволь авторитетоц кода руководящай работникнень, стане и рядовой ломаттнень ёткса. Работань оцю опытоц, тевть содамац и кельгомац, эряфонь активнай позицияц лездсть теенза путомс аф ёмла вклад республикать экономиканц виияфтоманцты.

Обкомда меле А.С.Чалдаев лама киза стане жа сатфксонь сатнезь работай Мордовскяй АССР-нь Народнай контролень комитетонь председателькс. Тя вастса нинге весть пяк лац няфтевсть сонь организаторонь способностенза, принципиальностец и кемошиц общественнай интереснень аралакшнемста.

Военнай и трудовой заслуганзон инкса А.С.Чалдаев казьф Якстерь Звездань кафта орденца, Отечественнай войнань колма орденца, «Знак Почёта» кафта орденца, Трудовой Якстерь знамянь орденца, боевой и трудовой лама медальса. Алексей Степанович лац содафоль и кода общественнай деятель. Сон аф весть кочксевсь Мордовскяй АССР-нь Верховнай Советонь депутатокс.

А инь оцю казнекс теенза ульсь народонь кельгомась. Кунара ни аш шиса А.С.Чалдаев. Но Сарга велень ломаттне тячемс пара мяльса лятфнесазь эсь землякснон, маряйхть оцю гордость инксонза. И аф аньцек сянкса, што сон занцесь республикаса сери вастт. Ламотненди Алексей Степанович ульсь нежедема вастокс, советчикокс, пара лездыкс. Эняльдема, пеняцяма мархта, а сяда сидеста советонкса сувсесть велеряйхне эсь велень ломаньцнонды.

—Сашендсть теенза, конешна, аф аньцек Саргаста, но и марнек республикаста. Шарьхкодеви, Саргастонк сембода лама,—азонды велеряйсь, трудонь ветеранць В.М.Алямкин.

—А местема, кодама лезксонкса сувсесть ширезонза?

—Кизефкста, эняльдемада, пеняцямада ламоль,—полаткшнесы ветеранць.—Аф ваномок сянь лангс, што Чалдаев ялгась оцю вастсоль, сякокс ляткшнесь скромнай, добрай и аф прянь няи ломанькс и старандась кажнайти мезьсовок лездомс. Ашезе юксне сон мокшень кяльтьке и фалу аноколь эрь мокшеть мархта корхтамс родной кяльса-валса.

Тячемс аф юкстави лятфнемань илядсь, кона ётафтфоль Саранскяйса военнай и трудовой подвигонь Мемориальнай музейса Великай Отечественнай войнань участникть, содаф партийно-хозяйственнай руководительть А.С.Чалдаевонь шачема шиста 100 кизонь топодемати. Васендакиге азома ся, што тяса панчфоль «Человек долга и чести» лем ала пяк цебярь выставка. Лятфнемань илядьса примасть участия  МР-нь Оцюнять видеса ветеранонь Консультативнай советонь члеттне, ошень ветеранонь советонь представительхне, Чалдаевонь раднянза и маластонь ломаненза.

Лямбе, седиста моли лама вал азсть Алексей Степановичень колга республикасонк содаф ломаттне, ингольдень руководительхне В.С.Учайкин, В.Ф.Барсуков, лиятне, стиренза Светлана и Лариса.

«Алексей Степанович Чалдаев путсь пяк оцю путкс республикать социально-экономическяй ширде виияфтоманцты»,—мярьгсь В.С.Учайкин.

Кода азозь А.С.Чалдаевонь стиренза, алясна, аф ваномок вельф заняфшинц лангс, фалу мушендсь пинге семьяти и иттненди. Кле, тейнек аляньке ульсь сембоса примеркс, а тяни сон—пример минь иденьконди и уноконьконди.

Нюрьхкяняста азозь, Алексей Степанович Чалдаев модать лангса эряфонь кинц ётазе честь мархта, кода афкуксонь патриот, кода мокшэрзянь народть достойнай цёрац. Сяс сон эрясь и сембе пингть кармай эряма минь седисонк и ваймосонк.

Иван ЛУШКИН.