МОРОСЬ ФАЛУ МАРХТОНЗА

Газетаньконь тячиень номерсонза азонттама пара вайме мокшавать М.Д.Рудновать колга. Мария Дмитриевна шачемас коре Инсарскяй райононь Лфна велеста. Шачсь-кассь  Дмитрий Семёнович и Анна Федоровна Мишечкиттнень семьяса, коса сондедонза башка ульсть нинге 5 шабат. Мария Дмитриевнань аляц кулось одста, семьяса  инь ёмла идти ульсь фкя пяле мархта киза. Но тядяц ашезь макса пря ризфти, ськамонза касфтозень шабатнень, макссь теест  образования. Пцтай сембе (кототнень эзда вететне) лядсть эряма эсь шачема Лфна велезост. Мария Дмитриевна школада меле тонафнесь Краснослободск ошень промышленнай техникумса. Меле лиссь рьвакс тяка райононь Селищи велень цёранди. Эряфоньберьф авась работакшнесь траксонь потьникс, ветлечебницаса ветсанитаркс. Тяни мокшавась пенсияса.

2008 кизоня Руднофнень семьяса лиссь зиян. Ки лангонь аварияса шавовсь Мария Дмитриевнань мирдец. Кемгафтува киза кода авась эряй мирдьфтома. Мария Дмитриевнань валонзон коряс, велеса аф тёждя аляфтома, но радня ломаненза сонь вестевок ськамонза ашезь кадонда. Мария Дмитриевнань тядяц касфтозень идензон кельгомаса, тонафтозень эрямс фкя-фкянь мархта ладязь. Сяс, кда велеса эряй браттнень-сазорхнень эзда кивок тише аноклай, сембе сайхть лездома, кие модамарьхть таргай—тага лезксфтома аф ляды. А кда кинь шачема шиц, фкя шра ваксс пуромкшни марнек семьясь.

М.Д.Руднова трудонь кельги ломань, тевфтома вестевок аф ащекшни. Тялонда, мзярда кржа ульцянь тевда, сон сёрматкшни сюреса, ожнаса картинат, Шкаень ликонят, конатнень казендьсыне эсь мала ломанензонды.

Авась пяк кельгсы мораманц, гармониять корява кштиманц. Сон морси Лфна велень «Марлюня»  фольклорнай коллективса. Мокшаватне аноклакшнихть мокшень кштимат-морамат «Морак, гармония!» народнай творчествань республиканскяй конкурсс, «Шумбрат, Мордовия!» Народнай творчествань республиканскяй фестивальс.

Мария Дмитриевна примси участия Лфна велень клубса и  библиотекаса ётафневи сембе мероприятиятнень эса,  арьсекшни илатненди программат. Сонь кельгсазь велеряйхне. Авась машты ломанень весялгофтома, кда эряви, кеподьсыне сембонь мяльснон, кштифтсыне-морафтсыне.

Мария Дмитриевна маряй оцю гордость шабанзон и уноконзон инкса. Сонь колма цёрадонза и кота уноктонза. Сембе эряйхть Мордовияса. Оцю цёрац, Алексей, эряй и работай Инсарса. Дмитрий цёрац служай пожарнай частьса, эряй Ковылкинаса. Евгений работай сварщикокс «Неон» акционернай обществаса, эряй Инсарса.

 Кизоньберьф Мария Дмитриевна заботендай уноконзон перьф. Кода азозе мокшавась, теенза инь оцю павазсь, мзярда шумбрат-тазат цёранза-рьвянянза, уноконза, а лия эряфонь варматне-даволхне сяськовихть.

М.Д.Рудновась пяк кеняртькшни Лилия уноконянц инкса. Стирняти 13 киза. Сонь мазы вайгялец, ули морамати-кштимати смузьшиц. Стирнять аф весть сявондезе бабац мархтонза сценать лангса выступандама. Унокт-бабат кельгсазь «Панжи, панжи лайме порась» мокшень мороть мораманц.

Марианна унокоц стане жа венеми музыкати. Сон тонафни скрипкаса морама. Екатерина и Варвара уноконза кельгсазь рисавандамаснон, якайхть художественнай школав. Юлия унокоц эряй Санкт-Петербург ошса, работай медсестракс. Антон, фкя тяка цёра унокоц, аф кунара сась армияста. Служась Дальняй Востокса, Хабаровск ошса.

Мария Дмитриевна стама ломаттнень эзда, конат аф ащихть озадонь седихть, фалу анок лездомс сембонди. Кда велеса ётафтови кодамовок общественнай тев, мокшавась аф ляткшни ширеса. Кепотьксонди, сон лезни урятцемс велень церькавть. Якай Николай брадонц мельге, кона тяни инвалид. А стане жа, кода афкуксонь мокшава, Мария Дмитриевна кельгсы танцтиста пидеманц-панеманц. Уноконзон каванякшнесыне мокшень пачаса, пярякаса.

М.Д.Рудновась азондозе лувиеньконди кода анокламс симомань янгафтоманди квас, кона пяк ладяй кизонь пси шитнень.

Ламбама квас

Эрявкстыхть вишняксонь и шукшторуксонь лопат, варсибрянь (клевер) якстерь панчфт, косьфтаф марьхть. Лангозост каямс ведь и лакафтомс. Меле кадомс ащема. Компотть кельмомдонза меле сон педяма и эзонза каяма таньфс коре сахар и аф лама шапафтома (квас тустт). Мзярда симомбяльсь ушеды шовияма, путома кельме вастс. Тя симомбяльсь мзярдовок ламос шра лангса аф ащекшни, кельгови сембе кудэряйхненди!

Т.Петрова.