Кядьсонза тиф мазышись салай мяль

Старошайговскяй райононь Лемдяй велень мокшавать, тостонь библиотекань библиотекарть Марина Борисовна Босинать колга ули кода тяштемс газетав аф фкя материал. Сяс мес аш стама тев, конань сон афолезе машта: библиотекарень тевонц мольфтьсы маштозь, лац-ряц арьсезь, кудса сон—цебярь азорава: пиди-пади—кяльцень нильсак и мзярдовок аф лоткси тя или тона ярхцамбяльть лангс. Фалу вешенди мезевок одня. А кой-коста и сонць арьсекшни танцти ярхцамбялень рецептт. Тяда башка, эрь сёксенда седялоц и бохарямоц улендихть пяшксет тялонди аноклаф консервацияда: клянцеконь оцю и ёмла банкатне ащихть рядонь ряд. Мезе аньцек аш потмосост! Тонатф консервацияда башка, Марина Борисовна тиенди виноград мархта помидорат, нльне панчфне, конатненди рузкс мярьгихть бархатцы, мушендыхть васта банкас тиф перень сёротнень консервацияса.
Но аф аньцек пидемаса-панемаса, тялонди перень сёронь анокламаса сафтсы мокшавась. Сон родной кялень, национальнай культурань патриот, эсь коень кельги и ванфты. Сидеста пуромкснень эса уленди наряжаф мокшавань щамса-карямса. Мордовскяй национальнай костюмть историяц, а стане жа тячиень шиц фалу салсезе Марина Борисовнань мяленц. Пяк лама киза ломаттне сувафнезь щамти национальнай культурать. И тяни эрь щамть ули кода лемдемс искусствань башка произведениякс. Несколька кизода инголе М.Б.Босина кярьмодсь мокшень и эрзянь щамса щаф-каряф някатнень наряжамаснонды. А тя—стакадонга стака, лама пинге, вий, маштомоши веши  тев. Вдь эрь някать лангс щамть-карямть педа-пес аноклама эстейть: сонцень щамть, мазоптоматнень, сюреса сёрмадоматнень, коняфкснень, руцятнень, прянь лия соткснень и стак тов.
Мезе эряви, штоба тиемс, кепотьксонди, няка-мокшаваня? Марина Борисовнань валонзон коряс, тевть ушедома някать эзда. И вов рамаф мяльс туфсь. Меле арьсема национальнай щамонц-карямонц колга.
Мокшавась лавкаста рамси акша котф, акшепнесы сонь и ушеткшни эздонза мокшавань (эрзявань) щамонь стама. Марина Борисовна тя тевть тиендьсы кядьса, а аф стамань машинкаса. Салмоксть эрь «аськолксканцты», эрь стафкскяти путнесы ваймонь лямбонц. И вов панарсь (лия щамсь) анок. Тяни кярьмодема сюреса сёрмадомати, мазоптоматнень анокламаснонды. Кой-коста Марина Борисовна мокшавань панарть сёрматкшнесы сюреса, лисенди  мазыдонга мазыста, а кой-коста панархнень мазопнесыне анок узорхнень, лентанятнень, каёмканятнень мархта. И семботь тиендьсы стане, штоба някать лангса панарсь улель вчёк мокшавань оцю панарть лаца.
Васенце няканц тиезе, штоба варжамс тя тевса виензон. Някась аф ламос ащесь Марина Борисовнань кудса, а меле сонь няезе фкя стирь и эняльдсь мимс Саранск ошень идень саттнень эзда фкяти.
Аф аньцек някат-мокшаванят тиенди Лемдяй велень авась. Работанзон ёткса ули эрзяваня, а стане жа някат-алят, някат-цёрат.
Щамда, мазоптомада (коняфкста, пайгоняда (сёкта) и лама мезе лияда башка, Марина Борисовна няканзонды тиенди кярьсембяльхть: котци ёмла карнят, а равжа изолентаста аноклакшни кямонят.
Тевс нолясыне национальнай ташта щапнень, сявондемок эздост тя или тона пяльксснон. Кода корхнихть, семботи муй васта.
«Аноклаф эрь някась лисенди аф лиятнень лаца, эсь характеронц мархта»,—азозе мастерицась.
Кизонда пингта уленди аф лама,  велень эрь ломанць крга видева заняф перень и паксянь тефнень мархта. Сяс М.Б.Босина кельгома тевонзон эзда фкять—някань наряжамать мархта уленди заняф тялонда.
Козя коллекцияц салси мяль, кода и пирьфоц, кона тяниень пингть вайси панчфнень потмос.
Т.Альшина.