«ТЕВОНЬКОНЬ МОЛЬФТЬСАСЬК ПИНГТЬ ВЕШФКСОНЗОН КОРЯС»

Мордовиянь Правительствать видеса гуманитарнай наукань научно-исследовательскяй
институтть директороц, Россиянь Военно-историческяй обществать Мордовскяй региональнай отделениянц председателец, историческяй наукань докторсь Г.А.Куршева:
—Галина Александровна, кода работай пандемиять пингста Мордовия Республикань Правительствать видеса гуманитарнай наукань научно-исследовательскяй институтсь?
—Конешна, пандемиясь институтть работас сувафтсь кой-кодама полафткст. Но, кда варжакстомс лия учреждениятнень тевснон лангс, миньцонк синь аф тяшкава ни оцюфт. Сяс мес работаснон,  эсь лацонь ширензон инкса, институтонь кой-кона сотрудникне тяда инголивок сидеста тиендезь кудса. А мзярда ушедсь пандемиясь, сембонь синь ётафтоськ удалённай работань режимс. Институтса работась аньцек дирекциясь.
Ня шитнень, мзярда ограничениятне цютькада лафчептьфт, институтса ушедсть покодема отделонь заведующайхне. Лядыкс сотрудникне кой-мзярс нинге кармайхть работама удаленнай режимса.
Тяда башка, тяниень пингть государственнай экзаметт кирдихть аспиранттне, конат аделазь институтонь аспирантурать. Эздост 19 ломань. Сяс пандемиять инкса тейнек савсь экзаменонь максомань пингть кувалгофтомс. Эрь шиня экзаметт макссихть колма аспирантт. И надиян, экзаметтнень ётафтсаськ цебярьста, ванфтомок аспиранттнень и преподавательхнень шумбрашиснон.
Лиякс мярьгомс, Мордовия Республикань Правительствать видеса гуманитарнай наукань научно-исследовательскяй институтсь, аф ваномок пандемиять лангс, научнай эрь сфераса, коса покоди 44 сотрудник, мольфтьсыне эсь тевонзон маштозь и пингть вешфксонзон коряс.
—Кода содаф, эрь кизоня гуманитарнай наукань научно-исследовательскяй институтсь ноляй лама книга, коза кочкафт сотрудниконзон научнай трудсна. Кода тянь марта ащихть  тефне тядде?
—Книгада башка, институтсь ноляй кафта журналхт—научнай и научно-публицистическяй. «Вестник» и «Центр и переферия» лем ала синь лисендихть нилексть кизоти. Синь лопаняснон лангса печатлакшневихть институтонь и странань лия учёнайхнень, а тяфта жа аспиранттнень и докторанттнень научнай трудсна. Кафцьке журналхне сувсихть ВАК-нь спискас, сяс эсост печатлаф научнай труттне сявондевихть мяльс, мзярда синь авторсна аралакшнихть наукань кандидатонь или докторонь диссертацият.
Башка книгаса нолявихть-лисендихть институтонь и республикань лия ученайхнень марстонь научнай трудсна. Кепотьксонди, «Мордовская мифология», «История и боевой путь 326-й Рославльской краснознамённой стрелковой дивизии», «Культура Мордовии» и лия книгатне тядде лиссть ни или нолдавихть республикань бюджетонь и грантонь ярмак лангс. Сонь минь институтоньке сатозе  Фундаментальнай исследованиянь Российскяй фондса. Тяфта жа ня ярмакнень лангс нолявихть мокшень и эрзянь кялень Толковай валксне-словарьхне, конатнень аноклазь  институтонь ученайхне.
Тяфта жа арьсеви сай кизоня пачфтемс лувихненди «Мордовия—ХХ век» серияса, конань арьсезе институтонь ингольдень директорсь, профессорь Ю.А.Юрчёнков, книгатнень, коса азондови, кода эрясь республиканьке етай векть кувалмоста.
—Кодама научно-практическяй конференцият  арьси ётафтомс институтсь  кизоть аделавомс?
—Конешна, пандемиять инкса кой-кона мероприятияньконь ётафтома пингсна савсь шашфтомс тя кизоть пес или  мянь ётафтомс  сонь сай кизоти.
Кепотьксонди, тяддень  июнь ковста Саранскяйса арьсекшневсь ётафтомс «Россиянь и Австриянь од историконь школа» Международнай конференциять. Но пандемиять сюнеда сонь ётафтома пингоц савсь шашфтомс сай кизоти.
Но тядде  институтсь сяка ётафты республикаса кафта научнай форупт. Васенцесь ётай 16-17 сентябрьста Всероссийскяй научнай конференциянь форматса. Пингстонза Россиянь инь содаф историкне азсазь эсь мяльснон аграрнай кизефкснень квалма.
23 сентябрьста, мзярда профессорть В.А.Юрчёнковонь шачема шиста топоди 60 киза, Мордовия Республикать столицаса арьсевихть ётафтомс Юрчёнковскяй васенце Международнай лувоматне. Пингстост странань и омба масторонь учёнайхне, писательхне, публицисттне максыхть питне В.А.Юрчёнковонь личностенцты, а тяфта жа историконь, писателень, публицистонь наследиянцты.
Международнай лувоматнень  материалсна форумть ётафтомда меле нолдавихть  башка книгаса. И тяфта жа   кармайхть одукс нолдафт башка книгаса В.А.Юрчёнковонь инь няевикс историческяй работанза и инь содаф литературнай произведениянза, публицистикац.
Тяфта жа Юрченковскяй васенце Международнай лувоматнень пингста арьсекшневи панжемс памятникть, кона путови Российскяй Федерациянь наукань Заслуженнай деятельть В.А.Юрчёнковонь калмонц лангс.
—Кодама проектт, Галина Александровна, арьси ётафтомс эряфс тядде Россиянь Военно-историческяй обществать Мордовскяй региональнай отделенияц?
—Республикань Большеберезниковскяй районца, коса тяфта жа ули Региональнай отделенияньконь районнай структурац, сонь председателенц С.А.Косынкинонь мархта минь вяттяма «Сурскяй рубежть» реконструкциянц коряс оцю работа. Сембе работатне вятевихть грантонь ярмакть лангс, конань сатозе Россиянь Военно-историческяй обществать Мордовскяй региональнай отделенияц.
Тяфта жа кизоть аделавомс Торбееваса стяфтови памятник Советскяй Союзонь Геройти, легендарнай лётчикти М.П.Девятаевонди. А сембе лия проектоньке кармайхть ётафтфт эряфс сай кизоть кувалмоста.
—Удалаза сембе арьсефонте.
—Сюкпря.
В.Нестеров.