Атюрьевскяй райононь Мокшень Козловка велеса етай кизоть панчфоль средняй од школа. Эстокиге эвондась кизефкс, кона сотф велеть историянц мархта.
—Пингсь моли,—мярьгсь школань директорсь В.И.Гераськин.—Историясь ляды. Иттненди эряви содамс, кода эрясь-ащесь Мокшень Козловкась революцияда меле, кода тиевсь васенце колхозсь, мзярда велеса панчфоль васенце школась и стак тов.
Аф ламнянь ушедсть кочкама материал.
Кода лятфнесть велеряйхне З.К.Глухова и Т.А.Ведясова, 1908-1909 кизотнень велеса панчфоль церковно-приходской школа. Революцияда меле церькавть селгозь. Панчсть колхозонь од ломанень школа. Тя школаса эстонь кизотнень тонафнесть Р.Р.Федькин, П.К.Торопкин, МАССР-нь Заслуженнай учительсь, школаса тонафнемань книгань сермадысь, войнань ветеранць М.В.Кондрашкин, войнань ветеранць И.И.Кичкаев.
Эряфсь ашезь аще фкя вастса. Вели панчфоль средняй школа. Нилеце классь тусь ветецети. Эста средняй школа ульсь аньцек Мокшень Козловкаса. И тонафнема сашендсть кемоньшка маластонь велеста: Кушкаста, Боражста, Сире Кушкаста, Оцядуста, Пакся Ордажста, Пакся Кярьгоняста, Од Кярьгаста и стак тов.
—Васенце учительницась М.Е.Волкова сашендсь школав карьса, мокшень щамса,—мярьгсь педагогическяй трудонь ветеранць Т.К.Дорожкина.—Тонафтсь иттнень эса сермадома, лувома.
Средняй школань васенце директоркс ульсь Р.С.Пичугин. Сон аф кржа тись Мокшень Козловкань школати. Велеряйхненди лац мяляфтовсть А.А.Головать, М.М.Туляковать и лия тонафтыхнень лемсна.
Разнай пинкт сатнезь Мокшень Козловкать, но мзярдовок аф юкставихть эряфкшу велеряйхненди войнань кизотне.
—Алятнень и од цератнень сявозь фронту,—лятфни войнань ветеранць, Мокшень Козловкань тяниень эряйсь И.И.Кичкаев.—Алятнень полафтозь од стирьхне. Тракторхненди озасть Е.Н.Юкова, А.Е.Ефремкина, Н.К.Волкова и лиятне. Техникась сидеста синнекшневсь, петемс ашель мезьса. Паксятне пяк оцю урожай ашесть макссе.
Стирьхнень кучсезь окопонь шувома, Свеженькаи пенгянь керома. Хуш радио велеса ашель, а сяка марьсезь фронтста кулятнень. Аделавсь войнась. Тя кулять велеряйхненди пачфтезе И.А.Ефимов. Сон школаса военруколь. Ушедсть сашендома фронтста алятне. Кинь кядец аш, кинь—пильгоц.
Войнада меле петевсь эряфсь. Велесь, школась кочкасть вий. Школаса кармасть работама цебярь специалистт. Ведьгемонце кизотнень песта, кодгемонце кизотнень ушетксста школаса работасть А.Г.Вельмова, А.Д.Фролкина, А.А.Юкова, Т.К.Дорожкина. Директороль войнань ветеранць С.М.Кшнякин.
Ульсь пинге, мзярда Мокшень Козловкань школаса тонафнесь 500, 600 шаба.
2009 кизонь васенце сентябрьста панчсть од школа. Сон оцю, валда. Школаса кемонь компьютерхт, интерактивнай доска, мультимедийнай проекторхт. Трудонь кабинетса электропривод мархта стама машинкат, гладендама доска, электрическяй плита, ярхцамбялень керсемс-анокламс шра.
Тонафнемань мастерскойхнень эса—шуфтть и кшнить мархта работамс станокт. Тифт цебярь столовай, спортзал, санузел. Ули школьнай автобус.
Школаса пуроптф трудонь кельги коллектив. Нят П.А.Маланкина, Н.Н.Гераськина, Е.Ф. Маланкина, З.П.Хрущева, В.Н.Исаев, Л.В.Ермолаева и ламотне лиятне.
Пяк пара, што школань директорсь В.И.Гераськин, историянь учительхне, педагогическяй трудонь ветераттне кярьмодсть тя пяк эрявикс тевти. Историясь эряви содамс. И тянь пяк лац шарьхкодьсазь Мокшень Козловкань средняй школаса.
И.ВЕШКИН.
Снимкаса:
Р.С.Пичугин школань ученикнень и
учительхнень мархта.
«ТЕЙНЕК УЛИ МЕЗЕНКСА МАРЯМС ГОРДОСТЬ»
Мордовия Республикань Здравоохранениянь и населениять социальнай ширде араламанц коряс министерстватнень решенияснон мяльса кирдезь, «Мокша» санаторийть видеса пуроптф идень шумбрашинь кемокстамань отряд. Тяза ваймосема, шумбрашинь петема питнефтома путевкат макссевихть оцю семьяста стирнятненди-церанятненди и сятненди, кинь аш тядяц или аляц.
МОРДОВИЯ РЕСПУБЛИКАНЬ ГОСУДАРСТВЕННАЙ СОБРАНИЯСА
Салазгорь велень средняй школась—фкясь инь цебярсь Торбеевскяй районца. Тянь нинге весть кемокстазе оцю илась, кона лемтьфоль мокшэрзянь литературать ушедыенцты З.Ф.Дорофеевонди.
ВИДЕШИТЬ АЗОНДОЗЬ СЁРМАТНЕ
Нина Андреевна и Александр Васильевич Ямщикофне шачфтсть-касфтсть вете итть. И сембе синь арасть цебярь ломанькс. Оцю церасна, Василий, эряй Саранскяйса, трудендай аф кальдяв вастса. Сергей и Саша—Москусот, синцень семьясна. Марина—учительница, эряй Ельникаса. А Геннадий лама пинге эрясь Курташкаса.
Ётай недялять Россиянь Президентсь Д.А.Медведев васетькшнесь легкай атлетикаса Европань XX чемпионатонь чемпиоттнень и призерхнень мархта. Сон поздравляндазень легкоатлеттнень оцю сатфксснон мархта. Барселонаса спортсметтне сатсть 24 медаль: кемонь золотань, кота сиянь и кафкса бронзовайхть. Казнетнень оцюшкаснон сатозь Мордовиянь спортсметтне.
Мордовияса вирень пожархнень сюнеда кудфтома лятфненди строяви 81 эряма васта. Лядыксне, а сембоц республикаса палсь 157 куд, азсть мяль сявомс ярмакса. Виде, педа-пес нинге лац-ряц аф содаф, мзяра куд сави строямс. Но, кода азозь МР-нь Строительствань и архитектурань министерстваса, строительхне тисазь сембе эрявиксть, штоба кенеремс строямс синь 1 ноябрти, тя пингть ладязь Россиянь Президентсь Д.Медведев и странань премьер-министрсь В.Путин.
Мордовияса строямань тевсь кемокстаф 8 организация мельге. Ня компаниянь представительхне ульсть ни райоттнень эса, васетькшнесть велень Советонь оцюнятнень мархта. Тяни специалисттне анокласазь проектно-сметнай эрявикс документациять. 6 августста строительхне прважазь районга эрявикс техникать и решандазь кизефксть рабочайхненди работань пингонди эряма вастонь максомать коряс. Подлясоваса арьсекшневи панжемс палаточнай лагерь. Ваймама шитнень ускфт стройматериалхт, а 9 августста рабочайхне кярьмодсть од кудонь строяма.
Нинге аф кунара ня васттне ульсть Мордовияса инь цебярьхне. Но стихиясь нардазь нардазе тя мазышить и кадсь мельганза седиень ацергофты картина. Сянгяря вирьхнень вастс лама километра кить кувалмова таргавсть равжа палф шуфтт, а велетнень вастс—кулуфт. Колма ломанень жертват, 150 палф куд—тяфтама тячиень пожаронь пелькс статистикась республикань Зубово-Полянскяй районца.
Испанияса ётафтови Европань чемпионатса Россиянь сборнайсь сатсь 5 медальхть и сембе синь—миннет.
Минь тячи гордостень марязь азондсаськ, што Мордовияньке лемневи сембодонга спортивнай республикакс. И тя аф стак. Тянь можна кемокстамс лама примерса. Ваносте, мзяра мекольдень кизотнень Саранскяйса эвондась од спортивнай объектта! Сембе райоттнень эзгавок строяф (или строяви) физкультурно-оздоровительнай комплекст. 
Понедельникста, 5 июльста, Саранскяйса Печатень кудса ульсь легкай атлетикать коряс Россиянь чемпионатти лемтьф пресс-конференция. Эсонза примасть участия Мордовия Республикань спортонь, физическяй культурань и туризмань министрсь В.Г.Киреев, сонь заместителец В.В.Цыбусова, Мордовия Республикань легкай атлетикань Федерациять президентоц, высшай спортивнай мастерствань республиканскяй школать директороц М.Л.Храмов, тренерхт, спортсметт, официальнай лия ломатть.
Исяк, 23 июньцта, Саранскяйса Республикань кудса Мордовия Республикань Оцюнясь Н.И.Меркушкин васьфнесь республикань школань ся выпускникнень мархта, конат шумордазь тонафнемаснон золотань медальса.
