КИ—АСУ ШАБАТНЕНДИ

2019 кизоня Н.П.Огарёвонь лемса Мордовскяй госуниверситетть видеса панчфоль лицей. Сон тифоль-арьсефоль «Образование» национальнай проектть рамкаса Мордовия Республикань Оцюнять В.Д.Волковонь мярьгоманц коряс. Тяса тонафнихть асу шабат «Информатика. Математика» и «Физика. Химия» кафта профильнай направлениятнень коряс. Минь корреспондентоньке васетькшнесь лицейть директоронц, информатикань учительть, РФ-нь Президентть премиянц лауреатонц И.А.Бачковать мархта, кона пара мяльса отвечась кизефксонзон лангс.

—Ирина Александровна, азонтт, пожалуйста, лувиеньконди лицейть колга. Мезьса МГУ-нь лицейсь аф фкя лаца общеобразовательнай школать эзда?

—Лицейса тонафнихть      10-це и 11-це классонь шабат. Тядде минь кафта 10-це класстонк. Марнек миньцонк тяни тонафни 100 асу идь. Синь сафт аф аньцек Саранскяйста и Мордовиянь райоттнень эзда, улихть шабат Пензенскяй и Нижегородскяй областьстовок. Тя пяк пара, мес лицееньконь колга содайхть и лия региоттнень эсовок. Миньцонк тонафнемась профильнай. «Информатика. Математика» и «Физика. Химия» профильхне сявфт лицейса аф стак. Васенце целеньке—республиканьконди асу од специалистонь анокламась. Мордовияса улихть оцю технологиянь предприятият, конатнень тевсна сотфт вяре азф профильнай направлениятнень мархта. Сяс тевонь содай специалисттне эрявихть фалу. Лицеисттне шить васенце пялестонза тонафнихть общеобразовательнай предметтнень коряс, а обедта меле касфнесазь содамошиснон профильнай предметтнень коряс. Сембе тонафниеньке заняфт исследовательскяй тевса, практическяй занятиясна ётнихть университетонь лабораториятнень эса. Тяда башка, лицейса фалу мольфтеви эрь кодама пялькстоматненди, олимпиадатненди, а стане жа ЕГЭ-нди анокламась. Эряви азомс, занятиятнень лицеисттненди ётафнесазь университетонь инь асу преподавательхне и учёнайхне. Оцю мяль шарфневи дополнительнай образованиянь программатненди. Шабатне пуропнихть содамошит мяльс туф направленияс коре Е.М. Диановонь лемса «Дом научной коллаборации» центраса. Тяда башка, университетонь эрь факультетсь аноклакшни лицеисттненди дополнительнай образованиянь программат.

—Лицейса тонафнеманкса сави пандомс?

—Марнек тонафнемась питнефтома! Тяда башка, лицеисттнень улихть возможностьсна примсемс участия университетса ётафневи сембе мероприятиятнень эса, кепотьксонди, якамс панжада лекциятненди, мастер-классненди, творческяй иляттненди. Лицейса минь педа-пес анокласаськ шабатнень университетса тонафнемати. Тяса синь ётайхть цебярь профориентация, вузу поступамда инголе ни кармайхть козят содамошисна.

—Лицейть эряфстонза мезсь сембода пяк кеняртьфтедязь ётай кизоня?

—Улема, васенцесь, мезсь лядсь мялямозон—тя лицейть илац, конань минь васьфтеськ 19 октябрьста. Мзярда лицеисттнень  поздравляндама сашендсь    МР-нь Оцюнясь В.Д.Волков. Конешна, аф юкстави кенярдемась олимпиадатнень эса васенце сяськоманьконь эзда. Аф ваномок сянь лангс, што меля лицейса тонафнесь аньцек 50 шаба, минь сатоме пялькстоматнень муниципальнай этапсост 75 призовой васта. Улихть и республиканскяй этапса сяськиеньке. Тяда башка, ламоц тонафнихне примсесть участия перечневой олимпиадатнень эса и няфтсть пяк цебярь результатт. Минь эрь шабаньке эсь лацонза асу. Улихть од изобретательхть, цебярь химикт, спортсметт, моронь морсихть и музыкань сёрмадыхть, омба масторонь лама кялень содайхть, литературань кельгихть и стак тов.

—Ирина Александровна, азонтт нинге аф лама эсь колгат. Мес кочкайть педагогонь профессиять?

—Мон аделайне Торбеевскяй райононь Варжеляй велень средняй школать. И, конешна, васендакиге профессиянь кочкамазти оцю путкс тисть монь учительне, конат ащихть тейне примеркс тячемс. Лятфнесайне васенце тонафтыезень В.В.Волгинать, математикань учителезень Л.В.Федосейкинонь, географиянь тонафтыть В.С.Маскаевонь, класснай руководителеньконь, химиянь и биологиянь учительть Е.Ф.Роговать. Мялямсон лядсть пяк цебярь лятфнемат школань кизотнень колга. Фалу лямбоста и спасибамань вал мархта лятфнесайне Варжеляень учительхнень. Тяда башка, семьясонк ульсь аф кржа педагог. Сяс фалу мялезель арамс тонафтыкс.

—Мезе азолеть педагокненди, тонафнихненди, а стане жа синь тядяснонды-аляснонды тонафнемань од кизоть ушетксста?

—Минь арьсетяма, што сай пингсь нинге  ичкозе, и аф эряви инголькиге арьсемс ламоть колга. Най ули кода семботь полафтомс. Но  профессиянь кочкамань тевса сай пинкт аш. Сяс фалу венемома содамошитненди, апак лотксек  молема инголи и путнема сатови цельхть. Ну и, конешна, арьсян сембонди шумбраши!

—Сюкпря!

Т.Петрова.