КОРОДОЗЬ ВАНФТСЫ И ВИИЯФНЕСЫ МОКШЕНЬ КЯЛЬТИ КЕЛЬГОМАНЬ ТОЛНЯТЬ

Торбеевскяй райононь Мокшень Ювня велень мокшавать Л.Н.Никитинать сембе эряфоц сотф велень школать мархта. А тя пцтай 20 киза. Нинге школаса тонафнемста стирнясь пяк кельгозень мокшень кяльть и мокшэрзянь литературать. Ня предметтнень коряс  якась районнай и республиканскяй олимпиадас. И шавонь кятть ашезь сашенда вестевок. То сяськикс лисендсь, то призёркс. Шнакшнезь класснай руководителец В.И.Кашайкин, тонафтыец Е.М.Родина. Хуш Вячеслав Иванович вятезень алгебрань урокнень, но пара мялезонзоль, мзярда ученицац районца, республикаса сявондезень васенце васттнень, тиендезе  содафокс и прянь шнафтома вастокс школанц. Сяс мзярда аделазе школанц, арьсесь молемс тонафнема М.Е.Евсевьевонь лемса МГПИ-нь филологическяй факультетонь мокшэрзянь отделенияв. Содамошит кочксесь тяфтама содаф учёнайхнень видеса кода А.П.Феоктистов, М.А.Келин, Е.И.Азыркина. Примсесь участия вузса ётафневи пуромкснень эса. Кельгозе и шнакшнезе минценнеть, мокшеннеть.

Вузса тонафнемать аделамда меле Мокшень Ювнянь стирсь сась родной Торбеевскяй районозонза. Васенце аськолксонзон тиезень Кулик велень основной общеобразовательнай школаса. Коллективса примазь лац. Иттне кельгозь. Да и сонцьке Лидия Николаевна сембе эсь виензон макссезень кельгома тевонцты. Но седиец сяка ульсь Мокшень Ювнянь родной школанц мархта. И кизода меле мрдась средняй общеобразовательнай школав. 18 киза тонафтсь иттненди мокшень кяль и мокшэрзянь литература. И сонцьке ашезь лядонда ширеса илатнень, пялькстоматнень эзда. 2012 кизоня примась участия «Кизонь инь цебярь тонафтысь» пялькстомаса и занязе васенце вастть. Аралазе районть честенц республикаса, няфтсь урок и ётафтсь аф класснай мероприятия Саранск ошень 19№ гимназияса, сувась инь цебярьхнень ёткс. Цёранц мархта примась участия «Мокшень кяльсь монь семьясон» республиканскяй пялькстомаса и стане жа занязь васенце вастть. Ульсть и лия оцю сатфкст тонафтыть эряфса.

Ётай кизоть сёлгозь Мокшень Ювнянь школать. Но Лидия Николаевна ашезь ляда тевфтома, сявозь работама Торбеева посёлкань 1№ средняй общеобразовательнай школав. Школась рузонне, но мокшень кяльть тонафнеманцты шарфневи башка мяль. Мокшень кяльть тонафнесазь шабатне кода предмет омбоце класста сявомок сисемцети молемс. эрь класса макссеви фкя част недяляти. Содамошинкса путневихть оценкат. Тонафтыти оцю лезкс максси школань дирекциясь. А тяста и цебярьхть сатфксне. Мокшень кяльть коряс олимпиадаса рузонь школатнень ёткса Лидия Николаевнань кафта сяськиенза и сисем призёронза. Республиканскяй олимпиадаса Татьяна Сарайкина занязе васенце вастть, а Валерия Сонаевати ашезь сата фкя балл, штоба лисемс призёркс. Иттнень и тонафтыснон седи ваксста поздравляндазень школань дирекциясь.

—Стирнятне лац тонафнихть, примсихть участия мокшень кялень илатнень эса,—мярьгсь Лидия Николаевна.—Сатфкссна пяк оцюфт. Мон кенярдян инксост. Арьсян теест сяда товга оцю сатфкст.

Лидия Николаевна—кельгома рьвя, павазу тядя. Мирдец, Павел Сергеевич, ветврач, покоди «МАПО «Торбеево»  ООО-са. Кафта цёрасна Вадим и Анатолий. Синь тонафнихть райцентрань 1№ средняй общеобразовательнай школаса, няфнихть цебярь содамошит. Тядясна инксост аньцек кеняртькшни.

Эрь урокти Лидия Николаевна пяк лама аноклай. И тя шарьхкотьф. Национальнай школась—тя национальнай школа. Иттне мокшет. Марстонь кялень мумась пяк тёждя. А рузонь школаса       класснень эса кодама аньцек национальностень шабать аш. Мокшень кяльсь—од кяль. Сембось иттненди васенцеда. Лидия Николаевна старандай аф коламс мяльснон. Эрь урокоц ётни мялень салайста. Шабатненди скушна аф уленди.

И.ВЕШКИН.

Снимкаса: Торбеева посёлкань 1№ средняй общеобразовательнай школань мокшень кялень тонафтысь Л.Н.Никитина.

Фотось авторть.