Оксана БЕЛКИНА:«КАТК ЭРЬ СЕДИСА ПАЛЫ РОДНОЙ КЯЛЬТИ КЕЛЬГОМАНЬ ТОЛНЯСЬ»

Аф шуроста сашендови васьфнемс од ломатть, конатнень аш мяльсна корхтамс эсь родной мокшень кяльсост, синь мес-бди виздихть тянь эзда. Мезьса туфталсь, аф шарьхкотьф, но кизефкссь тя пяк пичефти. Тяни вов ушедсь тонафнемань од кизось, Саранскяйсь тага пяшкодсь студентта, конатнень еткса лама мокшень велеста сафта. Тяка пингть автобусса ардомста, общественнай лия вастса улемста мокшень валсь ефси аф кулеви, сембе мокшетне корхтайхть рузкс. Сась од ломанць ошу и эстокиге сембе мокшеннесь эздонза нардазь нардавсь. Арьсезеват тянь лангс ванозь и  ризфта-пичефкста пяшкотькшни седице. Кали юмай-арай масторть лангста минцень роднойняньке—мокшень кяленьке? Аф, аф, сонь ули сай пингоц—макссихть кемама сят, кит, мярьгат, марнек ваймоснон путнесазь кяленьконь ванфтоманкса. Фкясь ня ломаттнень еткста «Вайгель» национальнай радиопрограммань корреспондетсь, мокшень од стирсь Оксана Белкина. Оксана арась ушетксонь путыкс тяниень пингть пяк эрявикс тевонди—сон тиенди видеоблокт мокшень кяльса и лихнесыне синь социальнай сетьтненди. Ютубса стирть ули сонцень каналоц, лемоц «Мокшень блогер». Ня шитнень Оксана ульсь редакциясонк, коса корреспондентоньконь мархта корхнемста азондсь тевонц и сатфксонзон колга.

—Оксана, мезсь кошардонзе кярьмодемс блогерствати, аноклакшнемс видеот мокшень кяльса?

—Тяфтама мяльсь сась тейне кунара нинге. Васенце аськолксокс арась «ВКонтакте» социальнай сетьса «Варма» лем ала эсь группазень пуроптомац. Тяза мон кармань лихнема аф фкя лацонь весяла картинкат-месть, конат полаткшневсть мокшень кяльса серматфксса. Кизошкада меле шарьхкотьфоль, што тя, улема, кржа, сяс мес пингсь моли инголи, и тячи од ломаттне сяда оцю мяль шарфнихть видеоблокненди. Видеоблокне пяк келиста нолявихть тевс. Ютубса, «Одноклассники», «ВКонтакте», «Instagram», «Facebook» и лия социальнай сетьтнень эса эздост тиендеви пяк лама. Шарфтонь мяль сянди, што лия финно-угорскяй региоттнень эса видеотне серматкшневихть национальнай кяльса. А минь республикасонк тяфтамот аш. Арьсень, мес аф варжамс? Шарьхкотькшнине, што од, аф содаф тевса кинь тапамась ули аф теждя, но сань мяльс тяряфтомс, а сяльде лиси, мезе лиси. Вийхть макссесь надиямась, што ня видеоблокнень вельде, шять, удалай шарфтомс од ломаттнень мяльснон родной кяльснонды, штоба синь няелезь, што мокшекс тячи корхнихть аф аньцек ичкоздень велеса эряй атятне-бабатне, но и оттневок, конат састь ошу. Ванода, мон, тяниень пингонь од ломанць, корхтан мокшень кяльса и тянь эзда ефси аф виздян, тиендян мокшекс видеот, няфнесайне лиятненди. Тячи аф сембе лувондыхть газетат, ванондыхть телевизор, сянкса од стирьхне-цератне лама пингта етафнихть интернетса, сяс социальнай сетьтнень вельде ули кода сяда курокста пачфтемс теест тя или тона мяльть.

—Мезень колга видеоблокне?

—Кда азомс нюрьхкяняста, няфнеса мокшень ломаттнень эряфснон. Сань, кепотьксонди, вели, тяса тядяне-аляне заняфт мешень кирдемаса, мон няфнеса тянь. Листяма перень тефненди, тянь колга аноклан-сермадан видео. Мзярда улендян лия райоттнень эса, няфнеса, кода эряйхть-ащихть тостонь велетне, мезьса заняфт эряйсна, кодама тефт мольфтихть национальнайть ванфтоманкса. Мекольце видеоблогонень эзда фкясь, кепотьксонди, лемтьфоль паксянь тефненди. Видеось снимандафоль Зубово-Полянскяй райононь Од Потьма велень колхозонь паксятнень лангса. Мзярда эрянь Финляндияса, тонафнень тоса студенттнень еткса полафтомань программать коряс, тиендень видеоблокт фиттнень эряфста, няфнине кодама университетсна, кода мон эрянь лия масторонь студенттнень мархта, мезьса занцеськ пингоньконь и стак тов.

—Кодама сталма мархта сашендови васьфнемс тевцень мольфтемста?

—Васенцесь, тя темань кочкамась. Вдь эряви лац-ряц арьсемс сянь лангса, мезе няфтемс ломаттненди, штоба саламс мяльснон. Пара, што блогерствась тя аф обязательнай работазе, и мон тиендян видеот снярда, мзярда ули пингозе. Но сембе сяка старандан, штоба недяляти хуш весть блогозе лисендель.

Омбоцесь. Аф теждя сонцень видеоть тиемац. Фкя блокть анокламанкса эрявксты колмошка част. Сермадомдонза меле сон эряви «керсемс», латцемс снимандаф пакшнень фкя-фкянь мельге. Сембе монтажть тиендьса монць. Тевс ноляса видеонь тиеманкса специальнай приложениять, кона тяни ули телефонцон.

Колмоцесь. Ужяль, мес аф фалу мушендан шарьхкодема ломаттнень ширде. Уленди, маладат ломанти, а сон аньцек няйсы телефонцень, кульсы, што мяльце снимандамс сонь, и эвотькшни. Арьси, бта мон еран мезеньге кальдяв азомс колганза, няфтемс сонь аф цебярь ширде.

—Оксана, кода удалси фкя пингста работамс и занцемс пря кельгома тевцень—блогерствать мархта?

—Эряви азомс, што «Вайгель» радиопрограммаса покодемась тя аф аньцек работазе, васендакиге, тя стане жа монь кельгома тевозе. Эрь шобдаваня сашендан редакцияв кепотьф мяльса, сяс мес тиендян эфирхт родной кяльсон—мокшекс. Кафцьке тефнень фкя пингста мольфтемасна ефси аф арси тейне сталмокс, меколанкт, фкясь лезни пяшкотькшнемс омбоцеть. Основной работас коре сидеста улендян интервьюса, васетькшнян лама ломань мархта, сяс тяка пингть ули кода снимандакшнемс-серматкшнемс видеоблоктка.

—Кода шарьхкотькшнесак, тусь-аш видеоце ваныхнень мяльс?

—Тя няеви тяфта лемдеви просмотратнень (мзяра ломань ванозе видеоблокть), а стане жа Ютубса каналозон серматфнень (подписчикнень) лувксснон коряс. Вов   фкя пример: Од Потьма велень колхозть колга видеоблогозень аньцек «Одноклассники» социальнай сетьса ванозь 12 тежянь ломань. Тя, конешна, касфнесы мялезень, лисенди, од ломаттне шарфнихть мяль мокшень кяльса видеотненди, теест тя интересна. И кда удалась хуш фкя ломанть седиса крьвястемс родной кяльти кельгомань цятконя, эста тевозень тиендьса аф стак.

—Спасиба, Оксана! Сяда товолдонь сатфкст тейть!

О.ЕВДОКИМОВА.