МАШТЫ КЯДЬ МОКШАВА

Газетаньконь тячиень номерсонза азонттама Евдокия Васильевна Липатовать колга. Сон шачсь, касозе серенц и эряй тячемс Ковылкинскяй райононь Сире Сомай велеса. Евдокия Васильевнанди 81 киза. Аф ваномок кизонзон лангс, сон пяшксе эрьгада, фалу весяла, най анок лездомс. Евдокия Васильевна велеса сире койхнень ванфтысна-содайсна. Героиняньке сафтсы кядьтевса, морамаса-кштимаса. Евдокия Васильевнань валонзон коряс, сирешить сюнеда кафтошка киза, кода лоткась сцена лангса выступандакшнемда, гармониянь коряс кштикшнемда. Ронгсь лафчеми, а ваймось аф содай сиредема, тячивок гармониять вайгялец аф кадондсы мокшень бабать озадонь седихть ащема. Евдокия Васильевна аф лядонды ширеса районть культурнай эряфонц эзда. Кда велеса, районнай центраса ётнихть концертт, сон кадондсыне кудъётконь тевонзон, юкснесыне сярятьфонзон и, щамок мазы мокшень щамонц, моли концертонь ванома. И тага сельминголенза ётни одкс пингоц, мзярда «Марлюня» фольклорнай ансамбльть мархта якась выступандама. Яксесть велетнень ланга концерт мархта, морсесть Ковылкинаса, Саранскяйса, Москуса, Оренбургса. Мекольце кизотнень Евдокия Васильевна тонафнезень од ломаттнень мокшень сире моронь морама. Тяда башка, инголи соньфтомонза Сире Сомайса ашезь ётне фкявок свадьба. Кие шутендайсь? Кие моронь ушедысь?—Гришмарясь, Евдокия Васильевна Липатовась. Сонь мянь шабра вели тернезь свадьбань весялгофтома.

Евдокия Васильевна Ковылкинскяй районца содаф кода машты кядь мокшава. Сон стакшнесь мокшень щапт, кода эсь велеряензонды, стане и Од Толку, Зайця велень аватненди, Ковылкино ошса эряйхненди. Мокшавась лятфнесы, кода стякшнесь рана шобдава, ниле часттка ашель, и озсесь стамань машинанц ваксс, а кота частти тушендсь ни фермав траксонь потяма.

Вов кода сонць Е.В.Липатовась азонды кядьтевс тонафнеманц колга:

—Тядязень пяк оцюволь мялец, штоба тонадолень лац стама-кодама, сюреса сёрмадома, сяс кучсемань велень содаф машты кядь аватненди тонафнема. И монценьге ульсь оцю мялезе тонадомс, мезе няян, ся тейне тиема, сянди тонадома. Лятфнеса, кода тядязе макссь тейне нула пакшкя, коза ушеткшнень сюреса сёрмадома, тиендень крескат, кичкорнят. А меле сон мярьгсь, штоба арамс мастерицакс, тя нуланясь тейне сивома. Мон абондонь, кода стане? Сон плхтазе тонафнемань нуланязень, а кулуфнень шорязень чай мархта и кядьстон симфтезе. Пяк мялецоль тиемс эздон машты кядь ломань. (Пееди).

И виде, тячемс Евдокия Васильевнань кудса сембода почетнай вастса ащи стамань машинкац. Валонзон коряс, мзярда эряви лезкс, фалу лезни стиренцты, Зинаида Григорьевна Кимеевати, кона тонадозе и мольфтсы сяда тов тядянц тевонц. Сон стакшни-сёрматкшни мокшень щапт-каряпт.

Сяда тов азонттама Евдокия Васильевнань эряфонц колга. Мокшавась эряфоньберьф работакшнесь Сире Сомай велень «Якстерь знамя» колхозса. 23 киза покодсь дояркакс, 5 кизот андсь тувот, ульсь разнорабочайкс. Мирденц, Григорий Макаровичень, мархта синь шачфтсть-касфтсть 7 итть. Но ужяленди, ёфси одста, 40 кизоса, мирдец тусь эряфста. Мокшавась лядсь ськамонза лама идь мархта, сембода ёмлати ульсь 2 кизонят. Пяк стакаль аляфтома велеса. Колхозса работада башка, эрявсь кирдемс кудонь жуватат, касфтомс перень сёрот.

—Мяляфтса, туян тишень лядема ичкози-ичкози велеть эзда,—азонды Алду баба.—Ломаньда ламоль, Сомайть перьфоц марнек лятьфоль, а тише эрявсь анокламс. Кирнень колмонь тракс. Сявса мархтон кафта кизоса цёранязень, пинезень. Ярхцамбяльть сотнеса копорезон, лафтубрясон пеелемозе и туян лугав лядема. Ёмла шабазень ашель кинди кадомс и фермав работама мархтон сявонделине. Спасиба Шкайти, шабане цебярьхть, лезнесть кудъётконь тевса. Стирне школада меле сашендсть фермав, тейне лездома. Мельган ульсь 23 тракс, и синь кядьса потямат колмоксть шити.

Каргоньжяи якалеме торфонкса. Усктама тракторонь тележка торф. Идненди мярьган: «Шабат, тячи шоподемс тейнек торфсь урядама». Идне кулхцондсть, кода мода максакат шобдавати семботь урядасазь.

Евдокия Васильевна трудонь кельги ломань, сон аф кельгсы стак ащекшнеманц. Аф ваномок кизонзон лангс, кирди куднармотть, пурхцт.  Путни перень сёрот, кизонда кудонц инголе панжихть эрь кодама панчфт.

Т.ПЕТРОВА.