А.БАТЫРЕВ: «ТЕАТРАСЬ ВЕШСЫ АКТЁРТЬ ЭЗДА ПЕДА-ПЕС ПРЯНЬ МАКСОМАТЬ»

21 августста Мордовия Республикань Оцюнясь В.Д.Волков нолдась полафткс 78№-сь Указти, кона водендаф од коронавируснай инфекциять келемоманц каршес. Мордовияса панжевсть театратне и кинозалхне. Синь работасна ётнихть санитарно-эпидемиологическяй сембе вешфкснень мяльс кирдезь. Театрав сайхнень ункснесазь температураснон. Обязательна эрявкстыхть маскат и перчаткат. Залса ваныхне озафневихть кафта озама вастонь вельф. Залсь пяшкотькшневи аньцек 30 процентс. Спектакльда меле театраса ётафневи дезинфекция.

Мокшэрзянь Государственнай Национальнай драматическяй театрась карантинть пингста ётафтсь 35 онлайн-спектакль. А 28 августста ётась васенце спектакльсь залу пуромф ваныхнень мархта.

86-це театральнай сезонць панжеви тячи, 17 сентябрьста, 18:30 частста «Саня, Ваня, мархтост Римас» народнай драмаса, кона лемтьф Великай Отечественнай войнать 75 кизонь юбилеенцты. Актерхне кармайхть корхтама эрзякс, а кялень аф содайхненди ули кода нолдамс тевс наушникт, конатнень вельде кулеви спектакльсь рузкс. Омбоце премьерась ётай 20 сентябрьста. «Золушка. В ожидании чуда» спектакльсь-ёфкссь пуроптсыне залу иттнень.

Газетаньконь тячиень номерсонза мяленьке содафтомс лувиеньконь Мокшэрзянь театрать асу актеронц Александр Батыревонь мархта. Сон пара мяльса азондсь эсь колганза и отвечась корреспондентоньконь кизефксонзон лангс.

А.Батырев аделазе Н.П.Огарёвонь лемса Мордовскяй    госуниверситетонь Национальнай культурань «Актерское искусство» отделениять. 2011 кизоста сявомок покоди актеркс Мокшэрзянь театраса. Цебярьста эсь тевонц тиендеманкса казьф благодарностьса и эрь кодама дипломса.

—Александр, мзярда сать мяльс арамс артистокс и ульсь-аш лия кельгома профессияце?

—Мон тячемс, уленди, кафтолдан: а театраса ли монь вастозе? Сяка пингть, тя, улема, сяда пара сянь эзда, кда арьсемс эсь колгат прянь няезь. А шабакс мялезель арамс дворникокс. (Пееди). Мес дворникокс, сяс мес кельгса арушить. Идень шарьхкодемаса дворниксь тя уряднайста щаф ломань, кона ваны перьфпяльть арушинц мельге. Да и актеронь профессияське, катк аф видеста, но сотф арушить мархта. Эсь тевсон мон тяряфнян кандомс ломаттнень ваймос мезе-мезе ару и валда.

—Кода эвондась эсот актёронь тевти кельгомась?

—Оцю класса тонафнемста   ушедонь отькорьста примсема участия школаса ётафневи мероприятиятнень эса: морань-кштинь, сценкаса налхконь. ИЗО-нь и черчениянь тонафтыезе Вероника Александровна Кулькова няйсь эсон артистонь асуши и фалу корхнесь, кле, тейне эряви кочкамс творческяй профессия. Мзярда сась пинге арьсемс, коза молемс тонафнема, Вероника Александровна маладсь тейне и мярьгсь, што тядде (а тя уленди 5 кизоти весть) национальнай культурань факультетсь примай студентт «Актерское искусство» отделенияв. И мон максыне документонень коза мярьгсь тонафтыезе. Тяда башка, строительнай факультету и Механикань и энергетикань институту. Но математикаса экзаменць тейне ашезь максов, а соньфтомонза кись перяф вяре азф специальносттненди. И мон тунь тонафнема актеркс. Университетть аделамда меле мялезель варжамс оцю ошень эряфть таньфонц. Салсезе мялезень Санкт-Петербургсь. Тя вдь творческяй ломанень васта! И аф содаф ошть казямошиц вишкста ётафтозе эздон Питерти кельгомать. Мон мрдань Саранскяи, и университетонь ялгане сергядемазь театрав. И вов 9 кизот налхкан рольхть Мокшэрзянь театраса.

—Кият тон национальностьс коре?

—Монь санган шуди и рузонь, и эрзянь вер. Тядязе, Татьяна Федоровна Кисняшкина, мокшава. Сон шачемас коре Краснослободскяй райононь Зайця велеста. Сяс,  мзярда стякшни кизефкс национальностезень коряс, фалу мярьгондян, што мон мокшан. И тя аф аньцек сяс, мес эзган шуди сяда лама мокшень вер. Кепотьксонди, мзярда улендят разнай национальностень ломань ёткса (а минь театрасонк национальностьта лама), марявихть-няевихть эрь народть эсь лацонь ширенза, коенза, прянь вятемац. И няйфозень коряс шарьхкодень, што мон пильгта пряс мокшан.

Эряви азомс, мон тонафнине-вешендине эсь шачема юрнень и сань мяльс, што сембе Кисняшкиттне, конат эряйхть Мордовияса, и аф аньцек, тусть фкя юрста, Зайця велеста и савихть тейне раднякс. А вов Батыревда Россияса лама. Кда пован татархнень ёткс, синь мярьгихть: «Тон миннят! Татарияса эрь районца Батырефт эряйхть». Сякоть азсазь калмыкне, башкирхне.

—Александр, мяльцень коряс, мезсь сембода стакась актеронь тевса?

—Театрась вешсы актерть эзда сценати педа-пес прянь максомать. Тяниень пингонь эряфса тянь тиемс стака. Вдь театрась аф стама васта, коса лама пандыхть и кда тонь ули семьяце, эряви тяка пингть тага косовок покодемс. Тяда башка, кда сембе пингцень максомс работати, ули кода лядомс семьяфтома. Хуш минь театрасонк тя прябалась пцтай сяськф. (Пееди). Ламоц актерхне мусть эстеест полат, пуроптсть семьят эсь ётковаст. А кода лиякс, косовок бокста полань вешендемс пинге аш.

—Кодама рольхне тонь сяда мялезт? Кодама герой налхколеть?

—Пцтай фалу монь героезе—тя од цёра, кона  пильгта пряс ваяф стиренди кельгомас. Мон налхкине Ромеонь «Ромео и Джульетта» спектакльса, «Стакшинь историяса» Алексеень велень од цёрать роленц. Стане жа монь героезе, тя сембе ширде удалаф, цебярь ломань. Кепотьксонди, тяни мон налхкса принцть «Золушка. В ожидании чуда» ёфксса-спектакльса, конань премьерац кармай 20 сентябрьста. Мон ёралень налхкомс сяда характернай рольхть, коса улель кода няфтемс пря сембе ширде, аф аньцек кельгомаса палы седи од цёракс. Кепотьксонди, пара мяльса варжалине прязень кодама-бди кяжи героень налхкомаса.

Сидеста актерхне ёрайхть налхкомс главнай рольхть. Кда актерть главнай ролец, сон фалу, лядыхнень коряс, сяда кельгови ваныти, ляды сонь мялямозонза, теенза фалу кармайхть сяда виихть кядень цяпаматне. Койсон, сяда питнись актерти, кда сон нльне эпизодическяй рольть налхксы стане, што сонь героец педи ваныть мялямс-седис.

—Тяни ломанти ули кода няемс лама мезе-мезе мялень салайда. Тя и кинот, ТВ-передачат, интернетса мезе аньцек аш. Но, аф ваномок тянь лангс, ломанць аф юмафнесы театрати кельгомать. Кода арьсят, мес?

—Театрась сембе пинкнень ляды театракс. Кинось ули кода ваномс кудса, ётконьшовор, мянь работав ардомста телефон вельде. А театрась—тя башка васта, коса ломанць сявонди актерхнень эзда эрек мяльхть-арьсемат, кенярдемат-ризнамат. Мялезе, штоба театрась фалу улель искусствакс, а аф аньцек весялгофтомань-ваймамань тевкс.

—Сюкпря, Александр, корхнеманкса. Арьсян тейть творческяй од сатфкст, мялень салай рольхть.

Т.ПЕТРОВА.