КАСОМАНЬ И ВИИЯМАНЬ КИГЕ

Комсь ветие киза Мордовиясь эряй Конституциять коряс, кона примафоль 1995 кизоня

21 сентябрьста Республикань Кудса ётафтовсь торжественнай мероприятия, кона лемтьфоль Мордовия Республикань Конституциять 25 кизонцты.

Республикань Оцюнясь Владимир Волков поздравляндамок торжественнай собраниянь участникнень юбилейнай датать мархта, мярьгсь, што МР-нь Конституциять примамац 1995 кизонь 21 сентябрьста путсь ушеткс оцю экономическяй и общественнай полафтксненди. Конституциять арьсеманц-тиеманц и народонь келеса ваноманц пингста пуроптовсть марс республикаса сембе конструктивнай вийхне, кочкафоль государствать целайкс улеманц ширец, законць, справедливайшись и инголи молезь социально-экономическяй вииямась. Владимир Волков лятфтазе, што тя тифоль оцю кризисонь условияса.

«90-це кизотнень ушетксста Мордовиясь ламоц показательхнень коряс занцезень мекольце васттнень Российскяй Федерацияса. Аньцек 1994 кизоня валовай региональнай продуктась валгсь 40 процентта. Ламоц промышленнай предприятиятне лоткасть работамда. Ломаттненди лама ковонь ашесть паннев зарплататне и пенсиятне, вишкста кассь работафтома лятфнень лувкссна.

Эрявсь мрдафтомс властти верондамать, эреклафтомс ломаттнень надиямаснон эряфть цебярь шири полафтоманц лангс. Сяс Мордовияса васендакиге ульсь пуроптф вии и лац тевонь мольфти властень вертикаль, ладяфоль федеральнай центрать мархта марстонь работась, обществать мархта видексонь диалогсь. Правоохранительнай оргаттнень мархта марса тейнек удалась машфтомс организованнай преступностсь, кеподемс марнек безопасностть уровененц. Оцю вийхть эрявкстсть, штоба араламс предприятиятнень, лоткафтомс производствать алу валгоманц, виияфтомс-эреклафтомс промышленностть и велень хозяйствать, обеспечендамс ломаттнень работаса и стабильнай зарплатаса. Республикань властень оргаттне тиендезь сембе эрявиксть сотрудничендамать ладяманкса российскяй и омба масторонь компаниятнень, региоттнень эса власттнень мархта. Тейнек удалась лоткафтомс зиянц вяти сембе ня процесснень. Республикась полафтсь цебярь шири, арась инновационнай экономика мархта тяниень пингонь регионкс»,—мярьгсь Мордовиянь Оцюнясь.

«Тячи промышленностсь и велень хозяйствась няфнихть стабильнай касома. Аньцек мекольдень 5 кизотнень валовай региональнай продуктась кассь 25 процентта, промышленнай производствань объемтне кассть 1,5-крда. Эряфс ётафтф 100-да лама оцю инвестпроект, панчфт од завотт, 10 тёжяньда лама рабочай васта.

Тяниень пингть республикань кабельнай кластерсь—инь оцюсь странаса. Тя токсесыне кода объемтнень, стане и республикать номенклатуранц. Меля «Электрокабель» Ассоциациянь, кона пуропнесыне марс сембе постсоветскяй пространстваса инголи моли предприятиятнень, члеттне официальнайста лувозь Саранскяйть Россиянь кабельнай промышленностень столицакс.

Улихть оцю сатфкст и фармацевтикаса. «Биохимик» заводса нолдаф ни российскяй од антибиотиконь несколька вид. Но мезсь нинге важна, минь васенцетне меки эреклафтоськ субстанциянь нолямать, васенцеда советскяй пингста сявомок. Тя оцю путкс странать лекарствань ширде аралафшинцты. Тяни мольфтеви работа нинге  150  лама препаратонь лангса, конатнень ёткса лекарстват, кодамот аш косовок марнек мирса. Эсь оцю научно-производственнай потенциалонц «Биохимикть» коллективоц кемокстазе тяддевок, арамок васенцетнень ёткс коронавирусть пчкафтомаса препаратонь анокламста. Мордовскяй университетть ученаензон ширень кирдемаснон вельде Саранскяйса арьсеф-тиф «Арепливир» од препарат. Россиянь Здравоохранениянь министерствась сувафтозе сонь лекарствань, конат нолявихть тевс коронавирусть пчкафтоманкса, официальнай спискати, «Азитромицин» антибиотикть мархта, кона стане жа ноляви «Биохимикса».

Минь оцю сатфксоньке—Россияса оптическяй волокнань нолямать коряс фкя и тяка заводть панжемац. Тяни предприятиясь занцесы ни российскяй рынкать пяледа ламонц, ули оцю экспортнай потенциалоц. Лац-ряц виияфтови Технопарксь, кона несколька киза мельцек сувси Россиянь колма инь цебярь технопаркнень лувксс»,—поладозе сяда тов Владимир Волков.

«Тядде Мордовияса кочкаф республикать сембе историясонза рекорднай урожай. Тя 1 миллион 700 тёжянь тонна сёра, средняйста сявф 35 центнер гектарста. Азома сявок, 1 миллион тонна сёроть рубеженц республикась ётнесы 7 кизот ни мельцек. Тя тяфта жа рекорд. Рекордсь, кона сатовсь велень хозяйствать грамотнайста вятеманц инкса, паксятнень эса передовой технологиятнень и тяниень пингонь техникать тевс ноляманкса, федеральнай центрать и Россиянь Президентть В.В.Путинонь ширеньконь кирдеманкса. Сонь участиянц вельде Мордовияса ётафтовихть эряфс важнай оцю проектт АПК-нь сфераса»,—мярьгсь Владимир Волков.

«Мордовиять виияфтомаса од этапсь отмечаф оцю сатфксса и событияса. Мекольдень кизотнень миньцонк ётафтовсь всероссийскяй и международнай значениянь лама мероприятия, тяконь лувксса футболть коряс Миронь чемпионатсь. «Теенза анокламась макссь оцю толхмадема республикать эряфса сембе сфератнень виияфтомаснонды»,—азозе Владимир Волков.

Республикань Оцюнясь азсь благодарностень валхт республикань эряйхненди ширень кирдеманкса и ся сатфкснень инкса, мезенкса регионць тячи маряй гордость.

Тяфта жа мероприятиять пингста торжественнайста максфтольхть казнет разнай деятельностень сферань представительхненди, а од ломаттненди—паспортт.