Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

«ЛЕНИНСКЯЙ РАЙОНОНЬ ПАРКСА ЦЕБЯРЬ ШИРИ ПОЛАФТКСНЕ САЛАЙХТЬ МЯЛЬ»

Шуваланяста, 17 сентябрьста, Мордовиянь Оцюнясь Владимир Волков ванозень Юго-Западса Республиканскяй идень больницять хирургическяй од корпусонц и М.Е.Евсевьевонь лемса    МГПУ-нь уендемань бассейнать строямаснон, а стане жа макссь оценка полафтксненди, конат эвондасть Ленинскяй райононь паркть эса «Формирование комфортной городской среды» проектть рамкаса сонь благоустройстванц шумордамда меле.

 

Идень республиканскяй больницять од хирургическяй корпусоц строяви «Здравоохранение» национальнай проектть эряфс ётафтомань рамкаса, сонь марстонь питнец—2 миллиартта лама цалковай, азома, што ня средстватнень пялесна нолдавихть инь од поколениянь оборудованияса медицинскяй учреждениять пяшкодеманкса. Владимир Волков лувондсы тя объектть инь важнайкс тядде од строяви объекттнень ёткса, сяс сонць лична ваны работатнень мольфтемаснон мельге. Од корпусса кармай макссевома диагностическяй, хирургическяй и реанимационнай лезкс стационаронь условияса, тяконь лувксса одс шачихненди и пингта инголе шачф иттненди. Тя кармай инь тяниень пингонь центра, кона мярьги лисемс республикати иттненди медицинскяй лезксонь максомань од уровеньц.

 

Тяни строительхне строязь ни кафта эташнень, колмоцесь арьсекшневи шумордамс ковть пенцты. Мольфтевихть ульця ширдень и потмоста коммуникациятнень ётафтомаснон коряс работатне, цокольнай этажса шумордафт отделочнай тефне. Марнек объектса, вень сменать мархта, работай 230 ломань. Но Мордовиянь Оцюнясь путсь подрядчикнень инголе задача—касфтомс рабочайхнень лувксснон, пачфтемок 400 ломанти, работама кафта сменаса.

 

«Работатне мольфтемат шинек-венек, фкя пингоня несколька участкава»,—мярьгсь В.Волков.

 

Тяфта жа Мордовиянь Оцюнясь ульсь М.Е.Евсевьевонь лемса МГПУ-ть площадкаса, коса строяви уендемань од бассейна. Тя объектса работатнень темпсна Владимир Волковонь ашесть ту мялезонза. Подрядчиксь сялтфоль и площадкаса работайхнень ёмла лувксснон инкса, и работатнень аф эсь пингстонза срокснон пяшкодеманкса. Тяда башка, кемоста мярькфоль маластонь территориять благоустройстванц коряс работатнень пяшкодемаснон колга, мзярс погодась мярьгонди тянь тиемс.

 

Сяка жа шиня Владимир Волков марса Саранск ошень округонь оцюнять Петр Тултаевонь мархта ванозь «Формирование комфортной городской среды» проектть рамкаса Ленинскяй райононь паркть территориянц благоустройстванц. Ётафтф работатнень марстонь питнесна—пцтай 41,5 миллион цалковай. Тячи ули кода азомс, парксь полафтсь цебярь шири аф азовомшка!»

 

И хуш паркть торжественнайста панжемац нинге инголе, ошень эряйхне активнайста сашендыхть ваймамань, шумбрашинь кемокстамань и спортса прянь занямань территориятненди. Региононь руководительсь корхнесь Ленинскяй паркть ваксса ащи Российскяй правовой академиять филиалса тонафни студент-тнень мархта. Од ломаттне озафтольхть аллеяса ащи беседкаса, коса ваймясть тонафнемда меле, и кизефтезь Мордовиянь Оцюнять дистанционнайста тонафнемати ётафтомать коряс возможностть колга. Владимир Волков отвечась, што улемс марса фкя курсса тонафнихнень и преподавательхнень мархта сяда цебярь видеосвязть вельде тонафнемать и корхнемать коряс. «Сяс тейнек эряви эсь пингстонза—сентябрьста—тиемс прививкат, кочкамс коллективнай иммунитет  и ётамс сёксень-тялонь пингть самоизоляцияфтома и «дистанционкафтома»—карматама молема тянди!»—мярьгсь од ломаттненди республикань Оцюнясь.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022