«Мокшень правдась» фкя инь удалаф изданиясь»

Инсарскяй райононь Мокшень Паевка велень мокшавать Мария Николаевна Морозовать лемоц республикасонк содаф ламотненди. Улема, аф тёждя мумс сонь лацонза ломань, кона тяшкава псиста кельголезе сембе минценнеть. Мария Николаевна лама киза макссь учителень тевти, тонафтсь шабатненди мокшень кяль и мокшень литература. Тяни сон заняф культураса, морси «Поюня» велень ансамбльса. Тяда башка, мокшавась сафтсы стамань-кодамань тевса. Ня шитнень корреспондентоньконди удалась корхнемс М.Н.Морозовать мархта телефононь пачк и максомс теенза кой-кодама кизефкст.
—Мария Николаевна, улель пара, кда азондолеть аф лама эсь колгат, костоннят тон шачемас коре, кодама семьяса касоть?
—Шачень Инсарскяй райононь Пою велеса, тяни сон сувси Кадошкинскяй районти. Касонь простой крестьянонь семьяса. Алязе ульсь шофер, тядязе работакшнесь школаса техничкакс. Ули сазорозе, Светлана. Мзярда шумордайне велень кемонь кизонь школать, тонафнемазень поладыне Н.П.Огаревонь лемса Мордовскяй госуниверситетса. Содамошит пуропнень филологическяй факультетонь мокшэрзянь отделенияса. А аделамдонза меле сань работама Мокшень Паевка велень школав. Колмогемоньда лама киза максонь учителень профессияти.
—Мезьса мяляфтовсь ся пингсь?
—Тя ульсть пяк павазу кизот, сяс мес мон заняфолень эсь кельгома тевсон. Эрь шобдаваня кенярдезь эряскодонь школав и пара мяльса кярьмотькшнень работазон. Арамс учителькс мялезель шабакс пингстокиге. Колмогемонь кизоста тонафтф сядот шаба, и мон павазуван, мес сембе синь арасть цебярь ломанькс. Павазуван сяс, мес учениконенди кельговсь мокшень кяльсь, синь пара мяльса сашендсть урокс, щашендозь лангозост мокшень щамснон. Лисенди, тевозень тиендине аф шавос. Тя кельгомась кемоксневсь олимпиадатнень-меснень эса сяськондемаснон мархта. Районнай, республиканскяй эрь кодама пялькстомаса най занцесть кафта-колма призовой вастт. Шабатнень тонафнемста старандань максомс теест сембе ширдень содамошит, сяс урокта башка етафнень эрь кодама творческяй секцият, кепотьксонди, драматургиянь, поэзиянь и лият. Ученикнень мархта стане жа аноклакшнеме национальнай выставкат, конат няфневсть Инсар ошса.
Тонафтыень тевсон фкя инь мяляфтовикс лядсь Тежянь кизонь илати ётафтф уроксь. Школазонк сашендсь лама оцю инжи Саранскяйста. Урокть пингста эрявсь няфтемс, кода тежянь кизонь кувалмоста ладязь марса эряйхть-ащихть мокшетне, эрзятне, русне, татархне… И тейнек, койсон, тя удалась. Шабатне лувсть стихотвореният, морасть морот, няфтсть театральнай постановкат. Стане жа тя урокть-семинарть пингста кулхцонтфоль-ванфоль «Поюня» велень ансамбльть выступленияц.
—Тонцьке аф фкя киза ни морсят тя коллективса. Кинь лаца туть вайгялюкс?
—Морамазень кельголине ёт мяляфтса прязень. Родсонк-плямасонк аф кржаль морай ломаньда. Тядязе пяк лац маштсь сиде моронянь морама. Шять, лацонза и тунь. Школаса тонафнемста лия тонафни ялганень мархта сидеста макссеме «концертт» шабра велетнень эса. А университетса тонафнемста мон сувсень тостонь хорти. «Поюня» ансамбльса морсян кеветиешка киза ни. Сембоц коллективса кемонь ломатть. Кажнайть сонцень тевонза-заботанза, но минь фалу мушенттама пинге морамати. Пуроптама марс, таргатама седиень токай мокшень мора и эстокиге юкснетяма сизефоньконь, урманьконь-сярятьфоньконь колга, морось максси тейнек вийхть-эрьгат. Эряви азомс, коллективоньке содаф лама вастова. Тейнек удалась улемс Карелияса, Башкирияса, Москуса, Сочиса, кафксть улеме Ульяновскяйса. Эрь кизоня няфнесаськ пряньконь «Шумбрат, Мордовия!» Народнай творчествань республиканскяй фестивальса. Сидеста кеняртьфнесаськ цебярь мороса эсь велеряеньконь, яксетяма кштима-морама шабрань вели, а синь сашендыхть минь ширезонк.
—Тячи тон работат велень клубса. Мезьса заняфат?
—Лангсон культорганизаторонь тефне. Лиякс мярьгомс, работан сянь коряс, штоба мялень салайста ётнель велеряйхнень ётка пингсна, аноклакшнян концертт-месть эрь кодама илатненди, кепотьксонди, 8 мартти, Тядянь шити, Эряфкшу ломанень ковти, Тройцяти, Од кизоти и стак тов. Клубсонк пуроптф национальнай культурань уженя, старандан козякофнемс сонь од экспонатса. Тя аф оцю музейсонк улихть мокшень щапт, сюреса сёрматф нардамат, тодлангакст, сядынгольдень кядьгот-месть, ёмла ожнаняста тиф-кодаф мазоптомбяльхть.
—Ётка пингста мезьса занцят пря?
—Кельгса сюреса сёрмадомазень и бисерста кодамазень. Тядязе маштсь мокшень панаронь стама-тиема и мон най кайсень лангозонза сельме. Авозезевок тя тевса машты кядь мокшава. Эздост и тонадонь. Сёрмадан нардамат и тодлангакст. Пцтай эрь иланди аноклан отт. Лама мезть стафонень-сёрматфонень эзда казендьсайне радня ломанненди, содафоненди. Марса авозезень мархта мокшекс наряжакшнетяма някат. Бисерста сёрматкшнян шкаень ликонят, панчфт, уноконянень Настять и Викториять мархта аф кунара тиеме бисерста ангелнят.
—Идьтот, уноктот лама?
—Мирдезень, Михаил Михайловичень, мархта касфтоме колма шабат, кафта стирьхть и фкя цёра. Сембе синь эряйхть Саранскяйса, эрсь заняф кельгома тевсонза. Касыхть ниле уноконьке.
—Мария Николаевна, «Мокшень правда» газетать лувондсак?
—Лувондса пяк кунара. Сонь тяштьфнезе нинге монь алязе. Меле, мзярда сань работама Мокшень Паевка велень школав, монць кармань сёрматфнемонза. Тя пингста газетась, конешна, ламода полафтсь, сяда удалафокс арась оформленияс коре и козякодсь содержаниянь ширде. Пара мяльса лувондсайне мокшень ломаттнень колга зарисовкатнень, а советтнень, конат макссевихть газетаса, сидеста нолясайне тевс. Тейне-арам, «Мокшень правдась» фкя инь удалаф изданиясь.
О.ЕВДОКИМОВА.