«Коронавируснай инфекциясь сувафтсь лама полафткс эряфозонк»

Краснослободскяй райононь Од Синдру велеса шачф-касф пара вайме мокшалясь Николай Сергеевич Русейкин—газетаньконь цебярь ялгац. Сон лама киза ни лувондсы «Мокшень правдать», изданиясь пяк тушенды мялезонза. Николай Сергеевичень марнек эряфоц сотовсь медицинать мархта. Сон медицинскяй наукань кандидат, профессор, Н.П. Огаревонь лемса Мордовскяй государственнай университетонь Медицинскяй институтонь гигиенань курс мархта нормальнай и патологическяй физиологиянь кафедрать вятиец. Студентонь кизоста сявомок и пенсияс тумозонза Николай Сергеевич нинге работась «скорай помощьса», а тя 37 киза. Тя пингста удалась араламс аф фкя ломанень эряф, мезенкса мокшалясь марясы прянц пяк  павазуста. Эсь тевонц Н.С.Русейкин кельгсы седи ваксста. Тяни, коронавируснай инфекциянь пандемиять пингста, теенза, кода эряфкшу ломаненди, ульсь кода вятемс занятиятнень дистанционнайста, но Николай Сергеевич лядонды студенттнень мархта. Эрь шиня оцю мяльса сашенды университету, штоба макссемс од ломаттненди крхка содамошит.  Ня шитнень удалась улемс Русейкин ялгать ширеса, корхнемс мархтонза тянь-тонань колга.
—Николай Сергеевич, тяниень пингть кода мольфтеви тонафнемась медицинскяй институтса?
—Коронавируснай инфекциясь сувафтсь аф кржа полафткс эряфозонк, тяконь лувксса вузса тонафнемативок. Тунда, няк, мянь колма кофт тонафнеме дистанционнайста, нльне экзаметтневок максфтольхть тяфта. Тянивок кой-кона занятиятне, ламода лекциятне, вятевихть дистанционнайста. А вов практическяй занятиятнень мархта тевсь ащи лиякс. Кепотьксонди, 60 кизода эряфкшу преподавательхненди мярьгондеви ётафнемс паратнень стане жа дистанционнайста, сяс мес, кода содаф, эряфкшу кизосотненди урмась сяда пелькс, сяс теест сяда пара ащемс кудса, аф лисендемс общественнай васттненди. Но, кда тонафтыть сонцень ули мялец сашендомс университету и ётафнемс занятиятнень, кода мярьгонттяма, студенттнень мархта «контактса», эста теенза можна сёрмадомс тянь колга заявления ректорть лемс, и сон кармай работама ингольцекс. Эряви азомс, аф кржа преподаватель тусть тя киге. Монцьке эрь шиня сашендан университету.
-—Мес, Николай      Сергеевич? Вдь тянь мархта тон эвондафнят пелькс шумбрашицти.
—Монь, видеста азомс, аф педи седиезон дистанционнайста тонафнемась. Койсон, ся, мезсь азф студентти сельмоста-сельмос, сяда кемоста сувай мялямозонза. Любой тевсь веши крхка содамошит, а медицинскяй институтса тонафнемась кафтонь-крда сяда ответственнай. Тяса тонафтовихть сай пингонь врачт, конатнень кядьсот ломанень эряфне. Сянь эзда, кодама содамоши мархта од ломанць лиси минь тонафнемань заведениястонк, ащи ся, кода сон кармай мушендомост и пчкафнемост эрь кодама урматнень. Тейне рьвязевок аф весть мярьгондсь ётамс «удаленкас», но мон аф эряскодан тумс куду.
—Тейть эрь шиня сашендови шарондомс лама ломань ёткова, эста кода тяряфнят араламс пря коронавирусть эзда?
­—Кда мяльса кирдьсак вузса улемазень, эста азса, што нльне аудиторияса студент-тнень ёткса улемста старандан кирдемс, кода мярьгондихть, социальнай дистанция. Аф мон теест, аф синь тейне маласта аф нажятькшнихть. Синцьке студенттне озсефт ётка мархта. Тяда башка, аудиторияса мон фалу ащан маскаса, валхнеса сонь аньцек эсь кабинетсон, коса мондедон башка кивок аш. А лия общественнай васттнень эса старандан аф улендемс, аньцек магазину ярхцамбяленкса сувсян. Кядьсон обязательна щафт перчаткат, шамасон—маска.  Куроконяста кочксеса мезе тейне эряви, пандан, и—куду. Пяк сидеста шташендсайне кяднень.
—Николай Сергеевич, кода няеви официальнай цифратнень эзда, кизонда коронавируснай инфекцияса сярядида арсесь сяда кржа, а тяни, сёксеть саманц мархта, синь лувкссна тага кассь. Тя корхтай сянь колга, што урмать вихонзамац ащи пингть и погоднай условиятнень эзда?
—Погоднай условиятнень эзда ащи аньцек кельмофтевомань урматнень вихонзамасна, а коронавируссь—тя инфекция, теенза ульцяса улеза хуш начка, хуш коське, лямбе или кельме—фкя лаца. Сон ётни ломанть эзда ломанти. Ков сяда лама ломань пуромкшни фкя марс, тов сяда лама сярядида. Мес кизонда коронавирусса урмаськотфта арсесь сяда кржа? Да сяс, мес тундаста сявомок сёлкфтольхть кафетне и рестораттне, банятне, весялготкшнемань центратне, ламоц лия общественнай  васттне, ломатть ашесть пуромкшне ламонь фкя вастса. Тяни сембось панчф, сярядихнень лувкссна кассь. Вов тяса, койсон, туфталсь.
—Но вдь фалу семботь сёлкфста аф кирдьсак, тяфта лама ломаненди сави лядомс работафтома. Кода ина тейнек идемс пря урмать эзда?
—Вируссь кармай мархтонк, мзярс аф ушедовихть тиендевома прививкат каршезонза. Миннетне тянь ширде молодецт, васенцекс мусть-арьсесть коронавирусть каршес вакцина. Но сон мзярс педа-пес нинге аф содаф, кода вятьсы прянц, кода ломанть организмац примасы сонь. Тячи вакцинась варчсеви аньцек доброволецнень лангса.
—А мес коронавируссь сембода пелькс эряфкшуфненди?
—Тевсь иммунитетть эса, эряфкшуфнень сон сяда лафча оттнень коряс. Тякоть можна азомс и сятнень колга, кинь улихть хроническяй урмасна.
—Николай Сергеевич, тон пяле векта лама максоть медицинати. Мезсь кошардонзе кочкамс врачень профессиять?
—Васендакиге—алязень пингта инголе эряфста тумац. Сон работась велеса ёмла классонь тонафтыкс. А учительхне, кода содаф, эрь кизоня ётнихть медосмотра. Вов тяфта сонга няфтсь пря враченди, макссь эрявикс аналист, а куду мрдамста, алашаса ардомста, кулось. Мезьсоль туфталсь, киндивок аф содафоль, сяс мон, штоба мумс ответ тя кизефксть лангс, арьсень сотомс эряфозень медицинать мархта. Тияк азса, што семьясонк пцтай сембе учительхть, кафкса сазорнень и браднень ёткста ськамон тунь лия киге и тянь колга нинге вестевок ашень ужяльде. Но, тяка пингть, мон вдь и учителян, лама киза ни тонафтан студентт.
—Сюкпря, Николай Сергеевич, корхнеманкса!
О.ЕВДОКИМОВА.