САМАРСКЯЙ ОБЛАСТТЬ И МОРДОВИЯ РЕСПУБЛИКАТЬ ЁТКСА КЕМОКСТАФ СОТРУДНИЧЕСТВАТЬ КОРЯС СОГЛАШЕНИЯ

Мордовиянь Оцюнясь Владимир Волков видеосвязень режимса примась участия «Инженерия будущего» Научно-образовательнай центрать наблюдательнай советонц келептьф заседаниясонза, конань ётафтозе Самарскяй областень губернаторсь Дмитрий Азаров.

Самарскяй областсь ульсь тя центрать пуроптоманц коряс ушедыкс, стане жа тяза сувасть Мордовия Республикась, Ульяновскяй, Пензенскяй и Тамбовскяй областтне. Лятфтасаськ, «Наука» нацпроектть задачанзон мяльс сявозь, 2024 кизоть самс Россияса эряви пуроптомс мировой уровенень 15 научно-образовательнай центра. Вететне тифтольхть 2019 кизоня, и тяни ушеткс тиф омбоце вететнень пуроптомаснон коряс конкурсти, «Инженерия будущего» НОЦ-сь эсонза примай участия.

Наблюдательнай советть заседаниянц ушедомда инголе ётафтовсь центрать пуроптоманц коряс региоттнень-инициаторхнень правительстваснон ёткса соглашениять подписандамац.

МР-нь Оцюнясь Владимир Волков, путомок подписенц документть алу, азсь спасиба тя проектть коряс сембе коллеганзонды, тяконь лувксса региононь руководительхненди и вузонь ректорхненди, научно-образовательнай центрать пуроптоманц коряс цебярь команднай работанкса. Тя центрась пуропнесыне региоттнень научно-технологическяй и экономическяй возможностьснон.

«Вуснень, властень оргаттнень, экономикань реальнай секторонь предприятиятнень и НОЦ управляющай компаниять компетенцияснон интеграциясна лездсь тиемс проектт, конатнень улихть оцю конкурентоспособностьсна кода региональнай, стане и мировой уровеньца,—мярьгсь Владимир Волков.—Тяконди, Мордовскяй госуниверситетсь арьсекшни сувамс проектти инголи моли исследованиянзон мархта од материалонь, лазернай, медицинскяй и биотехнологиянь, 3D-моделированиянь, интеллектуальнай робототехническяй системань разработкань сфераса».

Самарскяй областень губернаторсь азсь благодарностень валхт Мордовиянь Оцюняти качественнай проектонь анокламать коряс марстонь цебярь работанкса.

«Мордовия Республикать и минь региононьконь наукань и экономикань реальнай секторть представителензон марстонь лац ладяф работасна максси ни цебярь результатт,—отмечазе Дмитрий Азаров.—Кепотьксонди ули кода азомс Н.П.Огарёвонь лемса МГУ-ть путксонц. Университетсь арьсесь-тись лама сквозной компетенцияда, кепотьксонди, эсь лацонь, косовок тяфтама аш приборонь тиемань кизефксса».

Н.П.Огарёвонь лемса       МГУ-сь сувась НОЦ-ти тяддень тунданя и эстокиге азсь несколька проект, конат мусть васта центрать программаса.

Проекттне, конат сувасть центрать программанцты, пуроптфт тяфтама направленияс коре: од поколениянь двигательнай и топливнай систематне, искусственнай интеллектсь, ёню транспортнай систематне, аэрокосмоссь, инженернай компетенциянь од секторхне.

«Инженерия будущего» Научно-образовательнай центрать деятельностенц программанц кирдезь ширенц наблюдательнай советонь сембе члеттне.