КОДА АРАЛАМС ПРЯ ОД КОРОНАВИРУСНАЙ ИНФЕКЦИЯТЬ ЭЗДА?

Од коронавируснай инфекция. Ужяль, но мекольдень кофнень ня валхне кемоста сувасть эряфозонк. Эрсь эздонк пели урмаськодомс коронавирусса, сяс мес сон кенерсь ни пачкодемс мирть-масторть сембе уженянзонды. Конешна, кой-мезсь эсь пряньконь и лиятнень шумбрашиснон араламаса ащи эсь эздонк. Мяльса кирдьсайне шамафкснень, перчаткатнень, киськонь антисептикнень, антибактериальнай сапоттнень-меснень. Аньцек аф сембе мес-бди пелькс тя пингть шарфнихть теест сатомшка мяль. Сембода сидеста тянь ули кода азомс шамафкснень и перчаткатнень колга. Кепотьксонди азса тяфтама случайть. Общественнай транспортса работама ардомста вакссон озаф авась пшкядсь цёрати, кона озафоль каршек. «А мес тон аф шамафкссат? Вдь коронавируссь—пелькс урма». Мархтонк арды «ялганьке» мезевок ашезь отвеча, а эцезе кяденц зепозонза, таргась тоста шамафкс и венептезе авати. Улема, тяфта няфтезе, што ули араламань средствац. Мезень колга арьсесь ся пингть цёрась—тейне аф содаф, но зепсонза канневи шамафкссь, конешна, сонь од коронавируснай инфекциять эзда аф араласы.

Мезе тянь колга арьсихть ломаттне и кода синь аралакшнихть пря «коронать» эзда? Тянь колга лувода алува.

Елена Михайловна Рогачёва, Саранск ошень эряй:

—Тяниень пингть эсь пряцень эряви араламс уликс сембе спосопнень вельде. Васендакиге, мяль шарфтома шамафкснень и перчаткатнень лангс. Сапоттне «коронафтомовок», арьсян, фалу ащесть васенце вастса. Кяттне эрявихть шташендомс сиденяста, аф ваномок инфекциятнень и урматнень улемаснон-аф улемаснон лангс. Аф шарьхкодьсайне сятнень, кит мярьгондихть: «Да вов шабразе (аказень щакац, сянь-сянь кудавац, нинге кивок) шамафкс аф канни. А мес мон щаян?» Тя нинге кржа. Хуш шуроста, но кулендень и тяфтама валхт: «Месть каннемс шамафкс, мон вдь вятян шумбра эряф!» Арьсян, што тяфта корхнемс аф эряви, улема, тяфтама ломаттне афкукс аф шарьхкодьсазь коронавирусть пельксонц и, няфтемок пряснон шумбра эряфонь вятикс (порядочнайкс), тиендьсазь эсь пряснон рахафтома вастокс. Монць, кепотьксонди, кунара ни якан шамафксса, перчаткаса. Сидеста синь полафнесайне, нолясайне тевс киськонь антисептикнень и сапоттнень. Эрти эздонк коронавирусть эзда араламста тевс нолдамат уликс сембе средстватнень.

Лариса Николаевна Барашкова, терапевт:

—Нинге и нинге весть тернесайне сембонь шамафксонь и перчаткань каннема! Но тянь тиендема маштозь. Шамафксть аф повфнема улоти, а мархтонза кяшендемат шалхкть, кургть, лиякс азомс, шамать алуце пяльксонц. И шамафксть  сяда сиденяста полафнема. Кда сон ноляви тевс аф весть, то муськома и гладендама пяк пси утюгса. Тяфта тиендема и перчаткатнень мархта. И нинге: кда аш туфтал, аф улендема ся   васттнень эса, коза пуромкшни лама ломань. Сиденяста нолясть тевс киськонь антисептикнень, каннесть синь зепсонт, сумкасонт, эста фалу улихть кядьвидесонт. И тяда пеле, што содафонте, работас коре ялганте, мархтонт фкя подъездса эряйхне аф шарьхкоттядязь, кда мархтост аф суватада пяшксе лифтти, а ляттада учема или тутада ялга. Шумбрашись фалу катк ащи васенце вастса!

* * *

Наталья Ивановна Тюлякова, работай заправкаса:

—Да, коронавируссь ламода полафтозе эряфоньконь, но эрти эздонк шарьхкодема, кода тяфтама пингть вятема прясь, мезе тиема. Работаса, общественнай транспортса улема шамафксса, перчаткаса. Тяфта прясь вятема магазиттнень эса и, кда ули возможность, работаса. Хуш мес кда ули? Ули! Кали работама вастса аш кода щамс шамафкс? Тянь, марнек мирса обстановкать мяльса кирдезь, вешсы сонць эряфсь. Марстонь вийса сяськсаськ семботь. Надиятама, што од коронавируснай инфекциясь ули машфтф. А мзярс кулхцондома мезе корхтайхть медикне, Роспотребнадзорсь.

Т.владимирова.