Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшавась Г.А.Сярдова: «Ковылкинань Сире Драка велесь козя коензон-обуцянзон мархта»

Галина Александровна Сярдова шачемас-касомас коре Мордовиянь Ковылкинскяй райононь Сире Драка велеста. Эряфонь киц ушедсь Вельмякиттнень лама идень семьясост, а меле пачфтезе мокшавать Тольятти ошу. Но мокшэрзянь масторть эзда ширеса эрямстовок Галина Александровна аф юксни минцень коеньконь-обуцяньконь колга, ванфтсыне синь и пачфни квалмаст содафонзонды.
Г.А.Сярдовать колга «Мокшень правда» газетаса пачфнеме «Мокшаваня» рубрикаса. Морафтыхнень мяльс тусь мазы вайгяль, асу, машты кядь мокшавась и сонь щамоц, конань эзда сельмоце аф явфтови. Тольятти ошса эрямста Галина Александровна ладясь кеме соткст тостонь Мокшэрзянь культурнай центрать и сонь участниконзон мархта, ушедсь морсема «Лайме порась» творческяй коллективса. Кочказень, пуроптозень марс мокшавань щамонзон-карямонзон и тяни гордостень марязь щашендсыне синь ётафневи пуромксненди (ужяль, но пандемиять сюнеда лувкссна ламода кирсь), фотосессиятненди.
Г.А.Сярдовати, кода Тольятти ошень Мокшэрзянь культурнай центрань участницати, удалась примамс участия «Национальнай кши» проектса. Ошень национально-культурнай центратнень представительснонды 9-11 класса тонафнихнень мархта эрявсь анокламс национальнай пидеф-паньф ярхцамбяль.
Галина Александровна ламотненди содаф кода танцтиста пиди-пани кудазорава. Пачанзон варчсезь ламотне. Сафоль мяльс, што Галина Александровна аноклай пачат Тольятти ошень 10№ школаса 11«б» класса тонафнить Ангелина Суховать мархта. Мокшавась содафтсь Ангелинать тядянц и алянц мархта. Алянц, Дмитрий Геннадьевичень, ули кода лемдемс зрнянь кядь алякс—шуфтонь кроватенза содафт ламотненди. Шачемас коре Атяшевскяй районцта, эрзя. Сухофне лац примазь Галина  Александровнань и кенярдсть, што сон и Ангелина примайхть участия «Национальнай кши» проектса.  Мзярда пачатне аноктольхть, семьянь азорсь тись фотографият, конатнень эса Ангелина Сухова и Г.А.Сярдова национальнай щамсот.
Ангелинать тядяц и аляц эняльдсть Галина Александровнанди сяда лама пачфнемс мокшавань щамонц, а стане жа, содамок, што сон шачсь Ковылкинскяй райононь Сире Драка велеса, тя велень койхнень колга. Мокшавати ульсь мезе азондомс, вдь сон аф кальдявста содасыне, лац мяляфтсыне ёмла родинань койхнень-обуцятнень.
Сухофне дивандасть, што Мордовиять эзда ширеса эряй мокшавась тняра содай. Улема, кле, интернетста лувить. Мезть лангс Г.А.Сярдова отвечась, што сянь, мезсь сувась эзт тядянь лофцть мархта—родной кяльть, теенза кельгомать, эсь велень койхнень-обуцятнень аф интернетста, аф книгаста аф морафтсайть.
Тячи миньге макстама кой-мезе Галина Александровнань азондоманзон эзда. Башка мяль мокшавась шарфтсь Сире Драка велети.
Идть шачемац, свадьбас мокшень щамса якамась и рьвянять рьвакс лисемань паршить мимац-рамамац
Галина Александровнань валонзон коряс, Сире Драка мокшень велеса, мзярда тядясь мртцесь шачфтома кудста идня мархта, ушневсь баня. Тяфта, кле, ульсь аф аньцек Ковылкинскяй районца, но и целайнек Мордовияса.
Азондыть ёмла родинасонза тянемс ванфтовсь пара койсь—якамс свадьбас мокшень праздничнай щамса-карямса. И нинге. Кда стирсь и цёрась срхкасть рьвяяма, тевсна моли свадьбати, сай пингонь мирдти сай пингонь рьванц стирь ялганзон кядьста рамама од рьвянять рьвакс лисемань паршиец. Конешна, инксонза цёрась паннесь ёфси аф лама—трёшникт или колмошка литра эсь паньфкя шрать лангс путнесь, но  тиендевсь тя   рьвяямать мархта сотф койть содафокс тиеманц и ванфтоманц инкса.
Инголи улендсь стане, што цёрать или стирть тядясна-алясна ащесть каршек идьснон рьвяямаснонды. Эста рьвяяйсь вятнезе рьвакс туйть куду веть, мзярда сембе удость. Тяда меле сон арсесь од рьвянякс и каршек ащихненди лядондсь аньцек мирендамс тянь мархта.
Лисеть рьвакс—тейть максыхть лия лем
Сире Дракаса, кода и лия велетнень эса, стирти, рьвакс лисемдонза меле, мирденц кудса макссесть лия лем. Г.А. Сярдова азозень кой-кона лепнень смузьснон. Кепотьксонди, Мазай—мазы, Вяжай—вежливай, Павай—павазу. Ужяль, но юмафтф, юкстаф Тязяй лемть смузец. Од рьвянять афкуксонь лемоц юмсесь и лия ломаттнень ёткса. Кда мирдть лемоцоль Николай-Коля, то, мярьктяма, рьвац Елена арсесь Колярякс, Пётр-Петя—Петярякс.
Авань поза
Сире Драка, Алькино и   Морд.Шадым велетнень эса ётафневсь праздник, конань лемоцоль Авань поза. Марс кочксевсть велень аватне и сашендсть мяльс, кона кудса ётафтомс тя праздникть. Меле ся кудти каннесть якстеряпст, почф. Кудть азораванцты позань анокламань и пидемань-панемань тевса лезнесть шабраванза. А велень алятне и цёратне тя пингть стяфнесть нюряпт. Инголи якстеряпсонь квасть (позать) аноклакшнезь недяля или кафта. И вов сон анок. Эста тя кудти сашендсть инжихть марнек ульцяста, а кой-коста и марнек велеста позада симома. Эрсь эздост канды кодамовок казне, ярхцамбяльхть—пуштф сиволь, лия танцтиня. Меле лисендсть ульцяв и гармониять коряс морсесть морот и сиде моронят. Цёратне стирьхнень тернезь нюрямса нюрсема. Илять, праздникть шумордамдонза меле, марса арьсекшневсь кинь ширеса Авань позась ётай сай кизоть.
Тянь и ламонь лиянь колга азондсь Г.А.Сярдова Сухофненди. Галина Александровна макссь теест национальнай ярхцамбялень рецептт. Корязост пидесть-панцесть шрать лангс кода ёмла родинасонза, стане и ламоц лия велетнень эса. «Вашень пилень» пярякат, модамарень шяняпт, суронь пачат, суронь ям и рястаф шурьхкя мархта пярякат мокшавась тиенди аф аньцек праздникста, но и стакшиня. Сембе ня ярхцамбяльхнень рецептснон ускозень мархтонза Тольяттив Мордовияста.
«Национальнай кши» проектса участиянь примаманкса и од поколенияти национальнай койхнень-обуцятнень максоманкса Тольятти ошень Национально-культурнай объединениятнень Единай советсна казезе Галина Александровна Сярдовать грамотаса.
Сяда тов ванфтомс Сире Дракань койхнень-обуцятнень, тиендемс синь содафокс, пачфнемс колгаст коль сяда лама ломаненди—тяфтама цель эсь инголенза путни мокшавась. И сатнесы арьсефонц. Газетать маластонь номеронзон эса макстама национальнай ярхцамбялень рецептт Галина Александровна Сярдовать эзда.
Т.АЛЬШИНА.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022