РЕСПУБЛИКАСА ТИЕНДЕВИ СЕМБОСЬ КОВИД-19 УРМАТЬ КЕЛЕМОМАНЦ ЛОТКАФТОМАНКСА

Ётай недялять, 19 ноябрьста, Мордовия Республикань Пресс-центраса ётась пресс-конференция, коса корхтамась мольфтевсь регионца санитарно-эпидемиологическяй обстановкать колга. Пуромксса примасть участия Мордовия Республикань Правительствать Председателенц заместителец Г.А.Лотванова, МР-нь здравоохранениянь министрсь О.В.Маркин,    МР-ть эзга Роспотребнадзоронь Управлениять вятиец Т.П.Харитонова.

Кода азфоль, 19 ноябрти республикаса ладяф 2430 инфекционнай койка-васта COVID-19 урмаса сярядихнень пчкафнеманкса, 1713 вастсь—кислород мархтот. Коечнай фондть 92 процентоц заняф. Коронавируснай инфекция мархта 142 пациентсь ащихть реанимацияса, 28 ломанць ёткстост кирдевихть ИВЛ-нь аппаратса. Кода азозе О.В. Маркин, больницятнень эса ули сембе эрявикссь стакаста сярядихнень пчкафнеманкса. Ётафневихть телемедицинскяй консультацият федеральнай центрань ведущай специалисттнень мархта.

Стане жа азфоль, што 3 тёжяньда лама ломанць пчксихть кудса, мельгаст ваныхть медицинскяй работникне. Теест, медицинскяй работникненди, тяниень пингть сашендови пяк стакаста. Кой-кона шитнень медицинскяй учреждениятненди поступакшни 600-та лама вызов. Сембонь шири эряви молемс, сяс аф шуроста участковай врачне сашендыхть сярядихнень пяли поздна илять ни. Г.А.Лотванова кошардозень республикань эряйхнень шарьхкодезь малаткшнемс тянди. Сяс мес уленди лама вызовда, кой-коста аф эстокиге удалси гайфтемс поликлиникав. Штоба петемс тянь ширде тефнень, медицинскяй работникненди лезксонди водендакшневихть медицинскяй институтонь студенттне.

МР-нь здравоохранениянь министрсь тага весть шарфтозе республикань эряйхнень мяльснон сянди, што компьютернай томография тифтема аньцек эста, кда тиемс тянь мярьги участковай терапевтсь, аф эряскодомс КТ-с эсь мяльс коре, туфталфтома.

Пресс-конференциять пингста корхтафоль коронавируснай инфекция мархта амбулаторнай сярядихнень эрявикс лекарстваса обеспечендамаснон колга. «Пси линияв» сашенды лама кизефкс республикань эряйхнень эзда, кинди максовихть ня препараттне. О.В.Маркин азозе, што лекарстватнень получасазь аф аньцек ся сярядихне, конатненди путф ПЦР-исследованиять вельде «коронавирусная инфекция» диагнозсь, но и КТ-нь результаттнень, а стане жа клиническяй признакнень коряс. Диагнозть путсы участковай терапевтсь. Азфоль, што Мордовияти нолдаф 29 миллион цалковаень лувксса субсидия, штоба рамамс сембе эрявикс препараттнень кудса пчксихненди.

Стане жа республикань эряйхне пеняцякшнихть, што аптекатнень эса аш кой-кона лекарстватне. Здравоохранениянь министрсь азозе, што аньцек мекольце недялять «Фармация» аптекатненди пачфтьфоль 79 тёжянь 500 упаковка лекарственнай препарат. Тя цефтриаксонць, арбидолсь, гриппферонць, арепливирсь, азитромицинць. Аптекатнень эса лекарстватнень улемасна фалу кирдеви контроль ала.

Г.А.Лотвановать валонзон коряс, 19 ноябрти, Мордовияса идень садса колма группаттне сёлкфт карантинц: Ромодановскяй и Теньгушевскяй райоттнень эса, Саранскяйса. Школатнень эса карантинцот ниле класст—колмотне Саранскяйса и фкясь Ковылкинскяй районца. Кода азозе Галина Алексеевна, сяда товга кармайхть сёлгондовома классне школатнень эса и группатне идень садса, кда эсост муви коронавируснай инфекцияса хуш фкя сяряди.

Ульсть кизефкст и сянь коряс, сёлговихть-аф маластонь пингть парикмахерскяйхне, рестораттне и рынкатне. «Тя ащи эрть эзда ёткстонк. Кда руководительхне, работникне и республикань сембе эряйхне кармайхть пяшкотькшнемост социальнай безопасностень мератнень, эста сембось сяда товга ушеды работама штатнай режимса»,—мярьгсь Г.А.Лотванова.

О.ЕВДОКИМОВА.