«Ялганень эсь ёткстонт тясте юксне»

Ётасть VII Девинскяй лувоматне
А.С.Пушкинонь  лемса национальнай библиотекась–тя информационнай и просветительскяй площадка, коса ётафневихть аф аньцек илат, конат лемтьфт мокшэрзянь писательхнень и поэттнень творчестваснонды, но и писатель мархта васедемат, эрь кодама конференцият и лия мероприятият.
Арась цебярь койкс эрь кизоня ётафнемс Девинскяй лувомат, конат лемтьфт  Мордовскяй Народнай поэтти, Государственнай премиянь лауреатти Илья Максимович Девинонди.
27 ноябрьста А.С.Пушкинонь лемса Национальнай библиотекаса  ётафтовсть «Ялганень эсь ёткстонт тясте юксне» лем ала VII Девинскяй лувоматне, конат тядде, пандемиять сюнеда, ётасть онлайн-режимса.
Илья Максимович Девин покодсь поэзиянь и прозань жанраса. Лувити кельговсть сонь мялень салай стихонза, поэманза, баснянза. Инь кеняртьфти произведениякс поэтти арась «Шобдавань заря» книгац, кона лиссь 1945 кизоня. Оцю васта сонь творчествасонза занци «Нардише» романоц. Писательть произведениянза фалу лядыхть мокшэрзянь литературать зрнянь коллекцияса, сяс мес синь кельговихть кода ёмлатненди, стане и оцюфненди.
Девинскяй лувоматнень аноклазь и ётафтозь А.С.Пушкинонь лемса Национальнай библиотекась, Сире Теризморга велень Национальнай культурань центрась, школась, МР-нь Писателень союзсь. Илать вятезе библиотекать главнай библиотекарец В.И.Пронина. 
Мероприятиясь ушедсь И.М.Девинонь колга видеосюжетста, конань тейнек пачфтезе  «Сияжар» редакциясь.
Девинскяй лувоматнень панжезень  МР-нь Писателень союзть председателец Н.И.Ишуткин. Сон крхкаста азондозень эсь мялензон-арьсеманзон И.М.Девинонь колга.
И.М.Девинонь литературнай творчестванц колга стане жа азондсь Н.П.Огаревонь лемса МГУ-нь филологиянь наукань кандидатсь Н.Н.Левина. Сон эсь докладсонза крхкаста няфтезень писательть творчестваса прозань и поэзиянь башка ширетнень.
И.Д.Воронинонь лемса Мордовскяй республиканскяй объединеннай краеведческяй музеень научнай сотрудниксь Г.С.Самаркина  азондсь И.Девинонь личнай коллекциянц колга, кона ванфтови музейса.
 Илья Девинонь литературнай ингольдень сатфксонза ванфтовихть Национальнай библиотекать национальнай и  краеведческяй литературань отделса, конат занцихть эрявикс и  оцю васта сонь фондонзон эса.  Тянь колга азондсь ведущай библиотекарсь Л.Н.Гаршина.
2014 кизоста сявомок Девинскяй лувоматне ётафневихть поэтть шачема-касома велесонза—Сире Теризморга велеса. Национальнай культурань центрать директороц С.А.Видясова эсь выступлениянц ушедозе И. Девинонь «Теризморга велесь» стихотворенияста.

Севонь ляйнясь аф крхка,
                                    аф кели
Малаванза паксят и лугат.
Ули тоса мокшень сире веле
Эряенза, марнек, сазорхт-
                                         братт.

Цёранза тя велеть пачк
                                   удалафт
Кинь тят сяве—таза и
                                    шумбра.
Лисихть паксяв—мельгаст
                              аф судардат.
Кельгихть—мярьгат,
          мяштьсост най тунда.

Стиренза Теризморгать—
                              ой, мазыхть
Стама мазыхть
             вешентть—аф муят.
Тевса докат, валснон стак
                                аф азыхть
Масторть келес мороснон
                                        кулят.
«Мон павазуван сяс, мес нинге шабакс няине стихотворениять шачеманц. Тяса, Севонь ляйть трваса, коса минь шабань келеса юмсеме кизоньберьф, няень аля. Лангсонза щафоль акша панар, конань сивоц сёрматфоль мокшень сёрмаса. Прясонза путфоль акша картуз. Кядьсонза—карандаш и кагод. Ванць коза-бди ичкози, сяльде арьсесь ламос, а меле сёрмадсь. Арьсень, алясь аф минь веленне. Мзярда шоподемшовор сань куду, азондонь васьфтемать колга бабазти. Ся эстокиге шарьхкодсь, кинь колга моли корхтамась: «А-а, Ся Ильгя. Сон Девин Пятань пяли сашенды ошста, содаф ломань, стихса шнай веленьконь эса, сонць тяса шачсь». Тя ульсь васенце васедемазе Илья Максимовичень мархта. А меле, пингонь ётазь, мокшень кялень урокста тонафтыеньке лувозе «Теризморга велесь» стихть, конань мархта мон содафтонь Севонь ляйть трваса»,—мярьгсь С.А.Видясова.
Эрь кизоня Девинскяй лувоматнень эса примсихть участия Сире Теризморгань школаса тонафтыхне и тонафнихне. Мокшень кялень учительсь Н.Н.Чернова азондсь сянь колга, што школаса вов ни лама киза кода  тиф «Девинскяй уголоксь», коса ванфтовихть И.М.Девинонь эрь кодама паршиенза, эсь кядьса казьф книганза, а тяфта жа фотографиянза, конат сявфт семейнай альбомстонза. Шабатне лувозь И.Девинонь мокшень кяльса войнать колга, шачема ширети лемтьф стихотворениянзон.
Васенцеда Девинскяй лувоматнень эса примасть участия поэтть мала ломаненза: цёрац и уноконза.  Синь пара мяльса азондозь эсь лятфнемаснон И.М.Девинонь колга.
Поэтсь ульсь фалу весяла, эряфонь кельги ломань. Сон кельговсь сембонди: велеряйхненди,  ялганзонды.
Эсь мялензон-арьсеманзон поэтть шабакспингонц колга азозень Сире Теризморга велень эряйсь Н.А.Ямашкина.
И.М.Девин пяк кельгозе шачема-касома веленц—Сире Теризморгать. А сембодонга пяк—кунардонь пингонь мокшень моротнень.
Сире Теризморгань народнай хорсь моразе И.М.Девинонь кельгома моронц. Шумордавсь пуромкссь «Панжи, панжи лайме порась» мороть мархта, конанди музыкать сёрмадозе поэтть землячкац Нина Васильевна Кошелева.
Илья Максимович Девин кунара ни аш шиса, но лемоц сонь мзярдовок аф юкстави. Аф нардави колганза мялямсь, мзярс ломаттнень ваймос пачкотькшни валоц. А тяфтама лувоматнень вельде сон кармай эреклакшнема нинге сяда пяк.
Илья Девинонь творчестванц колга тяшневихть исследовательскяй работат, конатнень инкса макссевихть премият. Казендевихть сятненди, кие сембодонга пяк шарфты мяль поэтть творчестванц тонафнеманц лангс. Оцю мяль Девинскяй лувоматнень лангс шарфни Мордовскяй (мокшень и эрзянь) народть межрегиональнай общественнай организацияц. Сонь лезксонц вельде тяддень октябрь ковста тиф И.М.Девинонь бюстоц.
В.Пронина,
А.С.Пушкинонь лемса
национальнай
библиотекать главнай
библиотекарец.