ЭРЯФОНЬ КОЗЯ КИ

Мокшень содаф литературоведти, критикти, педагогти, филологическяй наукань докторти, профессорти, наукань Заслуженнай деятельти Виктор Миронович  Макушкинонди топодсь 80 киза.

Мезе тят корхта, а эряфсь сявсы сонценнеть. Мярьгат, аньцек тячи шачеть и лама нинге сави тиемс. А пингсь содай ётаманц. Тяфта, аф марязь, пачкодсь  юбилеенцты  Виктор Миронович.

Сон ётась кувака эряф, ашезь вешенде тёждя кит и тёждя тефт, фалу ащесь видешить инкса.

Шачсь В.М.Макушкин 1940 кизонь 30 декабрьста Кадошкинскяй райононь Паёво велеса (Пою велеса). Шабакс пингоц ётась войнань стака кизотнень. Шумордазе средняй школать 1958 кизоня, поступась тонафнема Н.П.Огарёвонь лемса Мордовскяй государственнай университетонь филологическяй факультету. Аделазе аспирантурать и лядсь работама  университету.  1966 кизоня  аралазе наукань кандидатонь диссертациять, а докторскяйть—1985 кизоня. Васенда ульсь ассистентокс, сяльде—мокшэрзянь кялень и литературань кафедраса преподавателькс, филологическяй факультетонь деканонь заместителькс, советскяй литературань кафедрань заведующайкс,  Мордовскяй государственнай университетса тонафнемань тевть коряс проректоркс. И эрь вастсонза няевсть Виктор Мироновичень ёнец, смузец, тевонь тиемста сиземань аф содамац.

1992 кизоня В.М.Макушкин кочкафоль М.Е.Евсевьевонь лемса Мордовскяй государственнай педагогическяй институтти ректоркс.

Содаф учёнайть-литературоведть сембе эряфоц сотф наукать мархта, лама киза макссь кельгома тевонцты, сонь оцю путксоц мокшэрзянь литературоведенияти. 1976 кизоня  учёнайсь нолдазе «Начало пути» васенце книганц.  Авторсь  няфтезе, кода шачсь-кассь минцень национальнай, эсь кяльса-валса сёрматф литератураньке, кодама сотксса сон сотф фольклорть и рузонь кой-кона произведениятнень мархта. Ся пингть, мзярда В.М.Макушкин сёрмадсь книганц эса,  литературоведениясонк лувондовсь, што мокшэрзянь литературась ушедсь поэзияста. Виктор Миронович ашезь ту каршек тя мяльти, но сяка сёрмады: «Катк мокшэрзянь литературань прозась комозце кизотнень аф сяшкава вииель, кода поэзиясь, но мокшень, эрзянь васень сёрмадыхне варчсезь вийснон и поэзияса, и прозаса, и драматургияса. Сяда ламоль лирикада; тянди, маряк, лездсь народонь устно-поэтическяй творчествась, сембодонга пяк—моронь жанратне». Учёнайть валонзон коряс, ся  пингонь поэзияньке вииель сянь ширде, конашкава оцю мяль шарфневсь мокшэрзятнень историяснон, обуцяснон, арьсемаснон лангс.  В.М.Макушкин васенцекс шарфтсь  мяль и няфтезе, кода шачсь литературасонк сингорямань-рахсемань стихотворениясь, стихса фельетонць, баснясь. Ванондовсь книгаса  и драматургиясь—сатфксонек, афсатыксонек-мезнек. Литературоведенияса тя васенце исследованиятне, коса сембе ширде ванондови мокшэрзянь прозать касомац, васенце писательхнень творчестваснон вииямасна.

1984 кизоня учёнайть лиссь «Обретение зрелости» омбоце книгац. «Самай комозце кизонь прозаса,—сёрмады В.М.Макушкин,—мокшэрзянь литературась сембода пяк няфтезе реализмань смузьвиенц». Авторсь сашенды мяльс: колмогемонце кизотнень самс литератураньке сатомшка вииель и темань, и жанрань коряс; сон няфтезе и сяньге, кода эзрайготкшнесть прозань жанратне—азкссь, повестсь, романць.

В.М.Макушкинонь исследованияса  оцю васта занци Великай Отечественнай войнань кизонь  прозась.  Войнань и войнада мельдень литературась тись  оцю аськолкс реализмань койхнень кемокстамаснонды, од вийса кармась козякофтомост художественнай форманзон. Кода азозе литературоведсь Г.Горбунов, «Виктор Макушкинонь «Обретение зрелости» монографияц—марнек мордовскяй литературоведениять няевикс пяльксоц».

Учёнайсь сёрмадсь 100-да лама научнай  статья,   учебникт,  программат мокшень литературать коряс.  Лия авторхнень мархта  марса нолдафтольхть  «Мордовия» энциклопедиясь,  «История мордовской советской литературы» и «История мордовской литературы» книгатне.

Профессорть вятеманц  ала аралафоль 20 кандидатскяй и 3 докторскяй диссертацият. Педагогическяй институтста эзрайготф учёнайхне тячи работайхть и госуниверситетса, и кооперативнай институтса, и лама лия вастова. Виктор Миронович  тонафнесь сядот студент, конатнень эзда лиссть мокшень литературань цебярь учительхть и конат тянемс пара мяльса лятфнесазь сонь кода пара вайме, ёню и смузю ломанень. В.М.Макушкинонди сидеста нежетькшнесть лезксонкса  студенттне и работас коре ялганза. Сонь валоц, мяленза-арьсеманза ульсть пяк питникс,  ашезь пеле сталмода и ломаттненге тонафтсь сталмотнень пачк ётама.

Кеветие киза  В.М.Макушкин ректороль пединститутса, лама пара тев тись ломаттненди. Кода ректор сон маштсь арьсема вандыень шить колга, тиендезе семботь, штоба тонафтомань кужесь  аф аньцек Мордовиянь эряйхнень, но и лия масторонь ломаттнень ванфса заняль няевикс васта,  коса ули сембось, штоба сатомс кеме содамошит.

Оцю сатфксонзон инкса Виктор Миронович Макушкин  казьф  «Знак Почёта» орденца, «Почётный работник высшего профессионального образования Российской Федерации» мяштьса каннемань знакса,  Российскяй Федерациянь Образованиянь и наукань министерствань Почётнай грамотаса и Благодарностьса. Сон—Мордовия Республикань наукань Заслуженнай деятель.

Профессорть  эряфонц и творческяй кинц колга лама сёрмадсть   мокшэрзянь содаф учёнайхне Н.Зиновьев, Г.Горбунов, В.Демин, С.Девяткин и ламотне лиятне. Синь статьясна лисендсть «Мордовия» энциклопедияса, «Мордовия, XX век: культурная элита», «Валда тяштень пусмо», «История Мордовии в лицах»  книгатнень эса,  мокшэрзянь журналхнень и  газетатнень эса.

А.С.Пушкинонь лемса Национальнай библиотекаса национальнай и краеведческяй отделса  кочкафт и ванфтовихть содаф литературоведть научнай сембе трудонза: книганза, статьянза, учебниконза, программанза, а стане жа колганза материалсь. Учёнайть сембе  работанза  арасть «шра лангонь книгакс», конатнень оцю мяльса кизефнесазь лувиеньке. Тя лама кизонь козя и эрявикс материал, кона лезды исследованиянь сёрмадомста писательхненди, специалисттненди-исследовательхненди, вузонь преподавательхненди, школань учительхненди, студенттненди, сембонди, кит кельгсазь мокшэрзянь литературать.

Р.Аугустинавичус,

А.С.Пушкинонь лемса Национальнай библиотекань национальнай и краеведческяй литературань ведущай библиотекарь.