ОТТНЕ—МИНЬ НАДИЯМА ВАСТОНЬКЕ

Кода-бди Саранскяйса васьфтине содафозень, Старошайговскяй районцта мокшавать М.И.Бикеевать. Мария Ивановна шачсь-кассь и эряй Лемдяй велеса. Шабакскиге теенза кельговсь сембе минценнесь, мокшеннесь. Ломанць сон асу, арась сюреса сёрмадомань тевса оцю мастеркс, теенза максф Мордовия Республикань культурань Заслуженнай работниконь лем. Няйсайть тя мастерицать мархта аноклаф мокшень панархнень, нардаматнень-меснень и седице пяшкоди кенярдемада. Сембось салси мяль, эрь вещась содави эсь тюсонц мархта.

Корхтазевоме мархтонза национальнайть колга. Тячиень эряфса мокшавать кеняртьфнесы ся, мезе тиендеви кяленьконь, культураньконь ванфтоманкса-эреклафтоманкса. Тяни ни, кле, ламоц од ломаттне аф сёпондсазь эсь национальностьснон, няк, ошсовок аф виздихть корхтамаснон родной кяльса. Значит, кяленьке аф юмай-арай.

—Да и омба масторста сафневок тяни старандайхть мархтонк корхтамс минь кяльсонк,—пеедезь азонды Бикеевась.—Аф кунара ширесон ульсть ломатть мянь Францияста и… вай авакай!—синьге мархтон корхтасть мокшекс. Тя ли аф честь тейнек. Сонь мяленц коряс, минценнесь, роднойсь мзярдонга аф эряви юкснемс, тейнек эряви улемс родонь-плямань мяляфтыкс.

И Мария Ивановнань мархта аш кода аф согласиндамс, сонь видец. Аш месть сёпондомс, аф кржась эздонк копорь пяльде шарфнесть ни эсь культураснонды, а кой-конат нльне виздсть тядянь-алянь кяльса корхтамаснонга. Тяни валом-валом положениясь петневи, полафни кяльти, культурати, койхненди-обуцятненди малаткшнемась. Ламотне лац шарьхкотькшнесазь сянь, што сембось ащи эсь эздонк, нацияньконь судьбац эсь кядьсонк. И башка мяль тяни шарфневи оттнень лангс. Вдь синь—оттне, минь надияма вастоньке, вандыень шиньке. Мокшень и эрзянь кяльхне тяни тонафневихть вузса и школава. Нинге садикнень эса иднятне тонафневихть стихонь, азкскянь, ёфкскянь азондома, мокшекс и эрзякс сиде моронянь морама и стак тов. А кода аф лятфтамс «Шумбрат, Мордовия!» фестивальть. Мекольдень XXIII-це фестивальса азфоль, што отборочнай сембе этапнень мяльс сявозь, творческяй смотраса выступандась пцтай сяда тёжятть ломань. Кеняртьфти, што марстонь лувксть эзда нильгемонь процентсь ульсть итть. Тянь ширде аф кржа тиендеви и лия пара тев.

Ванат тячиень снимкаста мокшень стирнятнень лангс и дивандамацти певок аш. Сембе мазыхть, а щамснон эзда сельмотне аф явфтовихть. Семботь эзда няеви, што синь пяк мялезост эсь нарядсна, мялезост минцень национальнай коеньке-обуцяньке. Вов самай тяфтама од ломаттне лездыхть тейнек нацияньконь сонцень шамаликонц ванфтомаса, кялень и культурань сярятьфоньконь лоткафтомаса, ваймонь козяшиньконь касфтомаса.

И.САРГИН.