«КАСФТЫЕНЬКЕ, ТОНАФТЫЕНЬКЕ»

 «Од веле» (тяниень «Мокшень правда») газетась лисендемань васенце кизостокиге кармась пуропнемост эсь перьфканза мокшень асу од ломаттнень. Ламотне синь эздост варчсезь вийснон стихонь, моронь, рассказонь сёрмадомаса, рузонь аф оцю произведениянь мокшекс ётафтомаса.

Газетаса сидеста васьфневсть И.Г.Черапкинонь, Ф.И.Петербургскяень, Л.П.Кирюковонь, В.И.Ардеевонь фамилиясна. Сембода активнаель тя тевса Л.П.Кирюков. Леонид Петрович ётафнесь рузонь текстт мокшень кяльс, аф кржа поэтическяй произведения сёрмадсь сонцьке.

1926 кизоста сявомок «Од велесь» ушедсь устнай народнай творчествань кочкама. Васенда народнай моротне и теест нотатне печатлакшневсть газетаса, меколи редакциясь кармась нолямост синь башка приложениякс. А 1928 кизоня устнай поэзиянь ся произведениятне, конатнень кочказь редакциянь сотрудникне и печатлакшнезь газетаса, нолдафтольхть «Мокшеть моронза» книгаса. Тоза сувась 160-шка произведения.

Тя пингти газетась кемоста ни стясь пильге лангс, цебярьгодсь содержанияц и техническяй оформленияц, сонь эсонза участвовандама эрь кизоня сашендсть од вийхть. Вяре ни азф авторхненди прибавасть М.И.Безбородов, А.И.Кочетков (псевдонимоц Мокшони), Я.М.Пинясов, М.А.Бебан. Мокшень од литературась кармась касома стама вишкста, што теенза газетать страницанзон эса кармась улема тесна. Савсь кеподемс кизефкссь сянь колга, штоба газетада башка нолямс теенза питнефтома приложения—литературно-художественнай и общественно-политическяй журнал. Тя кизефкссь курокста ванфоль, и 1928 кизонь мартста сявомок ушедсь лисендема «Валда ян» эрь ковонь журналсь.

Тяка жа кизоть кучкаста, Мордовскяй национальнай округть тиемдонза меле, «Од веле» газетась и «Валда ян» журналсь Пензаста ётафтфтольхть Саранскяи. Тя сядонга эреклафтозе велень корреспонденттнень творчестваснон. Народти ни содаф поэттнень, прозаикнень, журналисттнень ёткс шоворькшнесть од и од лепт—Л.Макулов, И.Чумаков и П.Левчаев, И.Чудайкин и П.Клещунов, И.Васькин и Е.Пьянзин, Л.Бажанов и Г.Игнатьев, Ф.Руськин и А.Майоров и лама, лама лият.

Тячиень номерса макссаськ мокшень содаф писательхнень Яков Пинясовонь, Леонид Макуловонь и Иван Чумаковонь лятфнемаснон мокшень газетаньконь колга.

Кда кизефтелемазь, кие тейне лездсь лисемс эряфонь кить лангс и макссь творческяй пацят, мон мярьголень: родной газетаньке, сонь цебярь вайме работниконза.

Васенце заметказе «Од велеса» лиссь 1926 кизоня, мзярда тейне ульсь аньцек 13 киза. Эстоньбере арань велень корреспондентокс.

Весть велезонк сась «Од веле» газетать редакторонц заместителец Сергей Борисович Леонтьев. Сон ламос, кода цебярь наставник, корхнесь мархтон, азондозе кодама кизефксонь коряс эряви сёрмадомс.

—А главнайсь, эряви тонафнемс,—мярьгсь сон.—Наряжак и аде Саранскяи.

Мон тунь Сергей Борисовичень мархта и ушедонь Саранскяйса педтехникумса тонафнема. Тяса содафтонь Бажанов ялгать мархта, поэттнень Безбородовонь, Ардеевонь, Карасёвонь и лия литераторхнень и газетань сотрудникнень мархта. Синь лездсть печатламс монь васень стихонень, няфнезь творческяй васенце афсатыксонень.

Ётась мзярошка пинге и монь примамазь «Од веле», тяниень «Мокшень правда» газетав сотрудникокс.

Эстоньбере ётась лама киза, но мон редакциянь работать лувондыне и лувондса, кода инь родной тевонь. Мон сембе тя пингть газетав тяшнень заметкат, статьят, очеркт, стихт и расскаст. И аф эльбядян, кда азса, што тейне кемоста лездсь эряфонь кизень мумс и макссь творческяй пацят минь родной «Мокшень правда» газетаньке и сонь цебярь коллективоц. Оцюдонга оцю спасиба теест.

Леонид Макулов

Лама сёксе васьфнень эсь эряфсон. Но сембодонга мяляфтовикс тейне ульсь 1924 кизоннесь. Эста мон тонафнень Саранскяй педтехникумса. Фкя шиня оцю переменать пингста ширезонк сувась сери, стройнай аля. Щаф равжа пальтаса, хромовай кямоса, картузонц алда няевсть акшаза, кудряв шяяренза. Сон нажядсь малазонк, кармась кизефнема кие кодама райононь, велень. Минь васенда таярдоме эздонза, ашеськ сода, мезенди кизефнесамазь, и ащеме апак каштортт. Но курок шарьхкодеськ, пелемс аш мезьда, сяс фкя-фкянь ётазь ушедоме азондома кие коста.

—А мон Сире Синдрувонь,—мярьгсь сон.—Фамилиязе Петербургский, лемозе Федор Иванович. Кандонь теенть симонця. Таргась портфельстонза газета и венептезе тейнек. Иван Куданкин ёткстонк сембода отькорьсель, сон сявозе газетать, келептезе. Миньге варжакстоме ся шири, морафтоськ: «Од веле».

—Ялгат! Эсь кяльсонк!—ювадсь Куданкин.—Тя ва симонця!

Эстоньбере мон седишкада кельгине «Од веле» газетаньконь. Кармань тяшнема заметкат студенческяй эряфоньконь квалма, а мзярда улендень велеса—велень эряфть колга.

1927 кизоня сидеста якань редакцияв. Эста редакторкс ульсь Никита Степанович Шестов, теенза заместителькс—Сергей Борисович Леонтьев, а секретарькс—Степан Григорьевич Потапкин. Синь цебярь ялгакс васьфнезь эрь корреспондентть. А 1929 кизоня педтехникумть аделамда меле монга кармань работама «Од веле» газетать редакцияса. Сяка кизоня печатлафоль «Сокась пеняцяй» стихотворениязе.

Кизоста кизос толгаясь-почкиясь газетаньке, а мархтонза касоме, пуроптоме вийхть миньге.

Иван Чумаков

Мокшэрзянь печатти ушедыкс ащи «Якстере теште» газетась. Кодак сон кармась лисендема, перьфканза пуромсть литературнай вийхне. Мокшень и эрзянь стихотворениятне, расскасне, пьесатне васенцеда эвондасть тя газетать страницанзон эса. Эрь мокшень и эрзянь писательть творческяй биографияц ушедсь «Якстере теште», «Од веле», «Эрзянь коммуна», «Мокшень правда», «Эрзянь правда» газетатнень эзда. Ня газетатне тейнек, писательхненди, арасть родной тядякс, конат ванцть эрь аськолксоньконь мельге и кельгозь касфтомазь.

«Од веле» газетав работама мон сань 1931 кизонь майста. Ся пингста тяса работасть М.Бебан, Я.Пинясов, М.Безбородов, кона маштсь мяленьконь кеподема творческяй работати. Мокшень литератураса инголи молись кеняртькшнесь одс ушеды сёрмадыть сатфксонзонды.

Тейне савсь работамс лама редактор мархта. Нят Л.Е.Бажанов, С.Б.Леонтьев, Н.С.Шестов, Ф.С.Руськин и лиятне. Сембе синь макссесть кели ки мокшень литераторхненди, конатнень произведениясна лисендсть газетаса.

Мокшень газетаса писательхнень участиясна арась традициякс. Сембе цебярсь, мезе сёрматкшнесть поэттне и прозаикне, васендакиге лисендсть сонь страницанзон эса. Сон ащесь трибунакс мокшень писательхненди.