НАЦИОНАЛЬНАЙ КУЛЬТУРАТИ КЕЛЬГОЗЬ

Ковылкинскяй районца фкявок ила аф ётни Сире Сомай велеста Раиса Кубасовать участияфтома. Сонь национальнай щамса няканзон содасазь марнек Россияса.

Ашезь арьсекшне машты кядь мокшавась, што художественнай творчествань предметтнень—мокшэрзянь някатнень и костюпнень вельде сонь лемоц кармай содаф аф аньцек Мордовияса. Тяни синь  мазопнесазь народнай искусствань ламоц кельгихнень кудснон. Тядянц, Евдокия Ефимовнать, и щаванц уроксна ашесть ёта шавос. Синь тонафтозь сонь мокшэрзянь национальнай костюмонь, коняфксонь стама. Ваномок мокшэрзянь кунардонь и тяниень пингонь предметтнень лангс—сельмоце аф явфтови, сембось пиндолды ёмла ожнаса и лама тюсонь лентанятнень мархта. Эвондай мяльце эстокиге  рамамс.

Образованияс коре Раиса Васильевна—агроном. Культурав сась  хозяйствань председателень  вастста. Мокшавась  кассь Евдокия Ефимовна и Василий Петрович Липатофнень лама идень семьяса. Аляц кулось 37 кизоса. Тядяц, кона работась 55 киза фермаса, авозенц Мариять мархта кеподсь пильге лангс вете итть. Тонафтозь трудти и кядьтефненди. Раиса шумордазе велень 8 кизонь школать, меле—Рыбкинскяй средняй школать. Тяни теенза—83 киза.

Кода и кизос коре ламоц ялганза, тусь столицав павазонь вешема. Поступась легкай промышленностень техникуму, но ваймось вешсь улемс сяда маласа алянь кудти. Сявозе техникумонь приёмнайста экзаменационнай листкять и ётась Краснослободскяй совхозу-техникуму, самок родной вели тонафнемать шумордамдонза меле диплом мархта специалистокс. «Якстерь знамя» колхозса агрономонь васта ашель, стирсь ушедсь работама кассиркс.

—Кенярдень, што карман работама родной велеса, тядязень ваксса,—лятфни Раиса Васильевна.—Тяса содафтонь велень цёрать Тимофей Кубасовонь мархта. Тядязень мяльс сон тусь. Налхкоме весяла свадьба. Касфтоме кафта стирьхть, тяни касыхть идьсна, уноксна. Ширезон инжикс сашендыхть, монга Москуву ширезост сидеста якан.

Эряфоньке, кода содаф, аф сетьме и тиендьсыне сонцень шарксонзон. Сире Сомай велеста Р.В.Кубасовать ётафтозь главнай агрономкс Рыбкинав. Сяда тов апак учсек тиевсть полафткст: Ковылкинскяй райононь велень хозяйствань управлениять руководствац направленияс коре кучезе сонь «Староаллагуловский» СХПК-в. Но од председательти татаронь велеса ашезь сав ламос работамс, районца фкя-фкянь мельге срадондсть хозяйстватне—тя ульсь ётай веконь 90-це кизотнень песта.

—Пичедень, ашине сода, мезьс кярьмодемс. Советскяй Союзса тяфта воспитандамазь, што аш кода аф работамс. Мрдань Сире Сомай вели. Ушедонь работама клубса культорганизаторкс. Вов тяфта мон, диплом мархта агрономсь, повонь культурав,—пеедезь азонды Раиса Васильевна.—И мзярдовок ашень каенда, што тяса муйне вастозень.

Валмуворксса корхтави, коса шачсь, тоса и кондястсь. Кемготува киза Раиса Кубасовась—Старосамаевскяй кудть «Культурно-досуговой Центр Рыбкинского сельского поселения» МБУК-ть филиалонц культорганизатороц. Велень клубста, пингть вешфксонзон мяльса кирдезь, сон арась тястонь эряйхненди пингонь ётафтомань кудкс. Азоравац тялонь пингть потмосонза тиендсь лямбе. Марнек стенать келес повфтаф пяк оцю баннерть лангса—«Марлюня» фольклорнай ансамбльсь, конань мархта организатороц ётазень Мордовиянь ламоц велетнень, выступандась Саранскяйса и Москуса. «Марлюнять» сатфксснон колга азондыхть ламоц диплопне и грамотатне, конат ускфт народнай творчествань смотратнень и фестивальхнень эзда. Сиредсть сонь артистонза, кой-кит ашет ни шиса, аньцек художественнай панноть лангса синь сембе пингс лядсть одкс.

Раиса Васильевна нинге шабакс тиендсь мокшэрзянь национальнай костюпт—кунардонь и тяниень пингонь. Сон оцю мяль шарфни, васендакиге, народнай декоративно-прикладной творчествати, мокшэрзянь карксонь ёмла ожнаста мазоптоматнень, мокшэрзянь костюмть тиеманцты. Мархтост наряжакшнесыне артисттнень и някатнень.

Сон аф весть ульсь декоративно-прикладной творчествань выставкань участницакс аф аньцек Мордовияса, но и Россиянь ламоц региоттнень эса, «Шумбрат, Мордовия!» Народнай творчествань республиканскяй фестивальхнень, Москуса Мордовиянь Шитнень и «Шумбрат!» национальнай праздникнень, Саранскяйса «ТЕВ» народнай промыслань и ремеслань VII Всероссийскяй выставкать, «О чём поёт гончарный круг» народнай творчествань Межрегиональнай фестивалень (Пензенскяй областень Спасск ошсь), Мокшэрзянь народть Российскяй государствань нароттнень мархта ладязь эрязь 1000 кизонь топодеманцты лемтьф мероприятиятнень (Оренбург ошсь) и ламоц лиятнень эса. Кафксть ульсь «Волга—река мира. Диалог культур волжских народов» этно-культурнай экспедициянь членкс. Комозьда ламоксть лувондовсь муниципальнай, республиканскяй, всероссийскяй, межрегиональнай и международнай фестивалень и выставкань лауреатокс и дипломантокс. Тя сембось корхтай велень культработникть сатфксонзон колга. Лама киза работаманкса Р.В.Кубасова казендевсь Почётнай грамотаса,  медальса.

Велень зрнянь кядь мастерицась оцю мяльса аноклакшни велень эряйхненди культурно-массовай пуромкст, ётафни васедемат, терни инжихть— Ковылкинскяй районнай Культурань кудста, лия велетнень эзда самодеятельнай артистт. Эряй и работай кепотьф мяльса, кеняртьфнемок ломаттнень кядьтевонц мархта.

Пётр САМСОНКИН.