Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ТЯФТАМА ЛОМАТТНЕ АФ ЮКСНЕВИХТЬ

Государственнай и общественнай содаф деятельсь, историческяй наукань кандидатсь,    МАССР-нь и РСФСР-нь Заслуженнай учительсь,   Великай Отечественнай войнань участниксь,   МАССР-нь просвещениянь министрсь Виктор Васильевич Кирдяшкин шачсь  1920 кизонь 31 декабрьста Ельниковскяй райононь Оцю Мокшень Пошаты велеса   учителень  семьяса.  Рана лядсь   тядяфтома,  семьясост ульсть кафкса итть, сон—инь оцюсель. Комозце кизотнень   мокшень велеса эряфсь ульсь пяк стака, эсь кшинц ёмластокиге  сатнезе сонць,  кода маштсь. А кда ни тон оцюсь семьяса, андомс сави аф аньцек эсь пряце, но и ёмлатненге. Школатневок ульсть ашуфт. Кепотьксонди, единай трудовой школав Мордовиянь Наркомпроссь получась фкя карандаш кодгемонь   тонафниенди, фкя пера комсь кафтува  тонафниенди, фкя чернильница сяда  иденди. Вов сяс, мзярда ни Кирдяшкин ульсь ответственнай тевонь вятикс, васендакиге, пичедсь школатнень, тонафнихнень и учительхнень колга, но тя пингти ульсь нинге ламос. 

 

 

Школать шумордамда меле, аф ваномок  стакатнень-сталмотнень лангс,  ёрась тонафнемс сяда тов, улемс алянц лаца учителькс. Аляц, Василий Герасимович Кирдяшкин, аделась Москуса мокшэрзянь учителень  курст и работась Мордовскопошатскяй школаса математикань учителькс, директороль.  Виктор Васильевич  ёразе  поладомс  учителень тевть. Поступась  Темникавонь педагогическяй училищав, коса лац тонафнеманкса  получазе васенце казненц—Почётнай грамотать, эста нинге ашельхть медальхть. Фкя киза кенерсь работамс математикань учителькс Пурдошанскяй райононь Мордовско-Коринскяй сисем кизонь школаса. Теенза эста ульсь аньцек 18 киза.  Ёню, афкуксонь учительть лангс шарфтсть мяль  и кучезь  ответственнай работас тайга шири. Велеса, коза сась сон, эрясть кулакт, конатнень сявозь праваснон, тяса эрявсь тонафнемс аф аньцек  иттнень, но и синь   шачфтыснон-касфтыснон. Од учительсь эстокиге макссь кеме вал работамс тоса, коза кучсазь. 1939  кизоня тусь  Красноярскяй краень Чибитскяй  средняй школав, но ламос эрямс ичкоздень вастса ашезь сав,  1940 кизоня   сявфоль Якстерь Армияв,  коса и служась 1946 кизоти молемс. Великай Отечественнай войнань участник, ниле кизот  старшинась Кирдяшкин ульсь  стрелковай дивизиянь  взводонь командиронь помощникокс. Сонь ротац аралазень  японскяй захватчикнень эзда Курильскяй острофнень.

 

Войнать аделамда меле, мрдамок шачема-касома шири,  Виктор Васильевич  кочкафоль Пурдошкань  ВЛКСМ-нь райкому секретарькс.   Эряфонь оцю сатфкс мархта работамс теенза аф стакаль. Тевонза тусть  видеста, но содамошитне ашесть сатне, сяс эрявсь тонафнемс сяда тов.   1949 кизоня сонь прважазь Мордовиянь обкомть видеса областной партийнай кафта кизонь школав. Сяка ёткть  макссь экзаметт и педагогическяй институту, оценканза ульсть аньцек «ветет».  Аф ламос ульсь Пурдошкань райкомонь сельхозотделонь заведующайкс, а  1951 кизоста сявомок 1960 кизоти самс  работась Атяшеваса, райкомса идеологиять коряс  секретарель.  1950  кизотнень ушетксста кепсевсть  партийнай лозункт, примафтольхть историческяй решеният, семботь эрявсь ётафтомс эряфс. И колмогемонь кизоса од секретарсь эсь тевонзон  тиендезень  оцю мяльса. 1953 кизоня Кирдяшкинонь ётафтозь  Атяшевав исполкомонь председателькс, апак тик тевда  ульсь пяк лама: ашельхть кит,  цебярь школат, велень хозяйствась юмафоль-арафоль, сембось аньцек ушеткшнесь. Работамс сашендовсь шинек-венек, эрявсь улемс ломаттнень ёткса, тонафтомс эряма, строяма. И Виктор Васильевич  тиендсь стане, кода мярьгондсь совестец. Улемок ни  райононь оцюнякс, шумордазе Н.П.Огарёвонь лемса Мордовскяй государственнай университетть и поладозе тонафнеманц Москуса ЦК КПСС-ть видеса Высшай партийнай школаса, коса Кирдяшкин  и аралазе кандидатскяй диссертациянц.

 

1961 кизоня кочкафоль Мордовиянь просвещениянь министркс. 

 

В.В.Кирдяшкинонь колга, кона 26 киза ульсь оцюнякс  республиканскяй образованияса, корхтасть, што сон «аф кабинетонь министр». Афкукс, сон пяк сидеста арнесь райоттнень эзга,  лама корхнесь учительхнень мархта и эсь лездыензонды  фалу  макссесь мяльхть-арьсемат, тонафтсь эсост содама и шарфнема мяль сембе афсатыкснень лангс.

 

Виктор Васильевич лама тись народнай просвещениять виияфтомаса,   ярмаконь ширде тефнень кемокстамаса, оцюфт  сатфксонза  тонафнемать цебярьгофтомаса.  Республикаса сонь пингстонза  строяф и панчф тонафнемань 500 васта, коза сувсесть спортивнай и актовай залхт, столовайхть, тонафнемань мастерскойхть и лабораторият. Мольсь оцю вийса и кудонь строямась,  мзяра учителень семья сатсь од эряма васта. Аньцек Атяшевскяй райононь Алово велеса, аф фкя кизоста, ульсь путф 26  куд, афкуксонь  ульця, тяфта ащесть тефне ламоц райоттнень эса.

 

Малаткшнесь ся пингсь, мзярда  республикась ульсь анок марстонь средняй образованиянь ётамати. Тянь сюнеда иттненди, конат эрясть ичкоздень велева, Виктор Васильевичень эняльдеманц  коряс, велень школатнень видеса панчсевсть интернатт тонафнихненди. Тя тевсь ульсь пяк пара, сон сявсь лама вий, эрьгя и пинге, но сатфксне няфтезь эсь пряснон: тонафнихнень содамошисна ульсть сяда крхкат ингольденнеть коряс.

 

1972 кизоня Кирдяшкинонди максфоль историческяй наукань кандидатонь учёнай степень. 1973 кизоня Мордовскяй книжнай издательстваса нолдафоль сонь «Мордовия на пути к всеобщему среднему образованию» книгац, коса тонафнемань  тевса азондови стакатнень-сталмотнень, афсатыкснень и  лия туфталхнень  колга, няфтьф, мзяра вий и эрьгя тя тевти путнихть мокшэрзянь тонафтыхне, народнай образованияса работайхне.

 

Виктор Васильевич ламоксть кочксевсь КПСС-нь Мордовскяй областной комитетонь членкс,  МАССР-нь Верховнай Советонь депутатокс, ульсь Мордовия Республикань Оцюнять видеса ветеранонь Консультативнай советса.

 

Максф оцю питне и сонь сатфксонзонды: РСФСР-нь Заслуженнай учительсь казьф Ленинонь, Октябрьскяй Революциянь, Трудовой Якстерь Знамянь, «Знак Почёта», Отечественнай войнань II степенень ордеттнень мархта, медальса и  Почётнай грамотаса.

 

Тёжятть ломань, конат  содазь Виктор Васильевичень, лятфнесазь сонь панжадонь седихть и паронь арьсезь. Ломанць  ульсь пяк вешфксу, васендакиге эстеенза, сон маштсь  корхтама   оцю тефнень колга пеетькшнезь,  вешемс и кошардомс тяфта, штоба киньге аф обжамс.

 

Тя ломанць  пяк кельгозе  шачема ширеть,  кда васьфневсть велеряйхнень ки пряса  прябалат, лезнесь,  фалу сувсесь  школав, содазень сембе учительхнень.  Ельниковскяй райононь  Оцю Мокшень Пошаты велень  школась каннесы сонь лемонц.

 

МР-нь  А.С.Пушкинонь лемса Национальнай библиотекаса национальнай и краеведческяй отделса кочкаф и ванфтови лама материал В.В.Кирдяшкинонь эрямань кинц и тонафнемаса оцю тевонь вятеманц колга.

 

 
Сёрмадозе А.С.Пушкинонь  лемса Национальнай библиотекань  национальнай и краеведческяй литературань отделонь библиотекарсь Р.Аугустинавичус.  

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022