Поиск по сайту: 
 

Архив
 апрель 
 2021 
пн вт ср чт пт сб вс
   1234
567891011
12131415161718
19202122232425
2627282930  

 
 

 

Тема дня

Артём Здуновонь Старошайговскяй районца улеманц колга

МР-нь Оцюнять аф лама пингс тевонзон тиендисна Артём Здунов 30 январьста рабочай поездка мархта якась Старошайговскяй району. Республикань руководительсь васенда ульсь «Новотроицкая» агрофирмаса.
Кода азондозе республикань руководительти агрофирмать директороц Владимир Спирин, предприятиять велень хозяйствань угодиянь  площаденза кассть  3 тёжятть гектарста 8 тёжятть гектархненди молемс, сёрода урятцеви—1,5 тёжянь тоннаста сявомок 14,8 тёжянь тоннати молемс, урожайсь—фкя гектарста 12 центнерста сявомок 41 центнерти молемс. Животноводстваса марнек петьфт-одкстоптфт животноводческяй уликс помещениятне Новотроицкое и Сире Шайгав велетнень эса, строяфт ангархт и 400 траксонди потямань зал мархта карда. Жуватань марстонь лувкссь—3600 лама пря. Фкя траксста потьневи 8750 литра лофца кизоти. Тяниень пингть хозяйствась арась чёрно-пёстрай траксонь пляманди касфнемать коряс репродукторкс.
Тяни велень предприятияса работай 146 ломань, средняй зарплатась—30 тёжянь цалковай, дояркатне получайхть 42 тёжянень цалковай. Новотроицкяйса Артём Здунов ванозень социальнай центрать, ульсь велень библиотекаса, корхнесь тястонь эряйхнень мархта.
Сяльде Артём Здунов якась Мельцаны вели, коса «Эконатура» ООО-са ванозе медицинскяй маскань и антисептиконь нолямать. Предприятиясь тифоль 2020 кизонь мартста. Тяса работай 17 ломань, велети тя аф кржа.
Сире Шайгав велеса Артём Здунов васендакиге ванозе Культурань од центрать, кона панжезень кенкшензон ётай кизоть песта. Культурань тя объектсь отвечай тяниень пингонь сембе вешфксненди. Васенце этажса ули кинозал, хореографическяй класс, библиотека. Омбоце этажса—300 вастонди концертнай зал и лама лия мезе.
Республикань руководительсь тяфта жа содафтсь райцентрать социальнай инфраструктуранц мархта, ванозе паркть, ФОК-ть.
Сяльде Артём Здунов якась Сире Теризморга вели, коса ванозе сембе республикати содаф Национальнай культурань центрать. Тяса оцю мяльса ванозе музейно-этнографическяй комплексть и седи ваксста примазень казненди мокшень карьхнень, конатнень эсь кядьсост кодазь тястонь мастерхне.
Сире Теризморга велеса Артём Здунов стане жа ванозе Пивкиттнень лама идень семьяснон крестьянско-фермерскяй хозяйстваснон. Фермерсь азондозе республикань руководительти, мезьста ушедозе тевонц. 2007 кизоста сявомок арьсесь кадомс школаса работанц и водендамс эсь подсобнай хозяйстванц. Тячиень шити модадонза 400 гектар, сёра касфты 280 гектарть лангса. 2020 кизоня сёрода урядась 908 тонна, урожайсь—32 центнер гектарста. Семботь тиендьсазь эсь вийсост, мирттне-рьвятне Пивкиттне касфтыхть вейхкса итть: сисем цёрат и кафта стирьхть.
Артём Здунов ванозе сёронь ванфтомань вастть, ремонтнай мастерскойхнень, корхнесь оцю, фкя-фкянь мархта ладяй семьянь члеттнень мархта. Азома сявок, республикань руководительсь Пивкиттнень шири сась аф шавонь кятть, а казне мархта.
Тумстонза Артём Алексеевич мярьгсь,  кле, кда эрявксты кодамовок лезкс, пшкядеда,  лезттама.
Сире Теризморгаса республикань руководительсь стане жа якась ваномонза «Хорошее дело» ООО-нь животноводческяй комплексть.

04.02.2021 №4
 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин