МАСЛАНЦЯТЬ ПАЧАНЗА ФАЛУ ВАИХТЬ

Масланцясь—сембонди содаф праздник, кона моли недяля и эрь кизоня уленди Великай постта инголе. Кирдемок мяльса, мзярда ули Очижись, Масланцясь полафнесы числанц. 2021 кизоня, тядде, сон ушеды 8, а шумордави 14 мартста (Прощёнай недляшиня). Тя праздниксь сувси славянскяй странатнень эса ванфтф инь кунардонь праздникнень ёткс. И катк кой-конашкада юмафтозе смузенц, народсь странасонк сонь  сембе сяка кельгсы и оцю мяльса учендсы эрь кизоня.

Масланцясь явондови кафта пяльксова: Тяйня (понедельникста сявомок вержити молемс) и Кели (шуваланяста сявомок недляшити молемс). Тя недялять эрь шинц ули эсь лемоц и смузец.

Понедельниксь—Васедема. Тя шиня васьфневи Масланцясь. Ломаттне тиендихть шужярьста Масланцянь чучела, гуляндамань васттнень эса—ловонь пандонят и крепостть. Нинге тя шиня аноклакшнихть ярхцамбяльхть праздничнай шрати. Азораватне пицихть-панцихть пачат. Инголи васенце пачать максселезь ашу ломаттненди, штоба синь лятфталезь кулоф раднятнень лемснон. Рьвянятне тя шиня яксихть эсь тядяснонды-аляснонды инжикс.

Шавшись—Заигрыш. Шавшиста ушеткшнихть Масланцянь гуляндаматне: ломаттне  курькснихть пандонятнень лангста, нурдса и нурдоняса, инголи оцюнек-ёмланек озсельхть карусельхненди. Тяда башка, ашезь юксне рьвянянь ладямань-ваномань тевть: од ломаттне яксесть инжикс и кочксельхть эстеест пола. Лувондовсь, кда ладясак сай пингонь рьвять Масланцяста, свадьбась вчёк Краснай горканди сави.

Вержись—Лакомка. Тя шиня сембе пицихть-панцихть пачат и якайхть инжикс. Офне якайхть пачада ярхцама авозьбабаснон ширес, а авозьбабатне, кода маштыхть, няфнесазь, што овснон пяк кельгсазь, анокт ваномс мяльснон.

Шуваланясь—Разгуляй. Тя шиня и ушеткшни Кели Масланцясь. Инголи тя шиста сявомок ламотне кадондозь эрь шинь тевснон и ушеткшнесть весялготкшнема: тюрсть мокшендаса, ётафнесть пялькстомат и конкурст, шарондсть хороводса, морсесть весяла морот, щашендозь инь мазы нарядснон.

Пяденцясь—Авозьбабань  иляднят. Пяденцяста инжиень кельги, васьфни ломанькс няфнезь эсь пряснон офне: ширезост пачада ярхцама сашендсть авозьбабасна и вятнезь мархтост ялгаснон.

Ёткшись—Аклянь кудса ащемат (посиделки). Тя шиня мирдть раднянза яксесть оттнень шири инжикс. Рьвяняти эряви пидемс-панемс пачат и каванямс раднятнень. Тя шиня акляти казендихть казне рьвянять раднянзон эзда.

Недляшись—Прощёнай недляши. Тя шиня аделсеви Масланцянь недялясь. Сембе анцихть фкя-фкянь кядьста прощения, эняльдихть простямс сембонкса. Недляшиста илять плхневи Масланцять чучелац.

Православнай календарьса Масланцяти мярьгондихть Сырнай недяля. Пингстонза аф мярьгондеви ярхцсемс сивольда. Сяс сон лувови ни Великай постти эсь лацонь ушедомакс или анокламакс.

Улихть Масланцять мархта сотф приметат. Азсаськ кой-конатнень эздост.

Кда Масланцянь каршеня лямбе, моли пизем, сёксенда ули лама панкта, а кда кельме—кизонда пси аф ули и урожайсь ули козя.

Ков сяда лама пача Масланцяста пидихть-панихть кудса, тов сяда лама козяши ули тя кудса, а кда азоравась пиди-пани кржа пача, эста и козяши  ся кизоня аф ули.

Кда Масланцяста моли лов, ули люкшянь козя урожай.

Кда Масланцянь пачатне улихть ляпт, эчкт, танцтихть,  кизось ули цебярь (урожайть мяльса кирдезь), а кда педихть, аф танцтихть—цебярь учендомс аш месть.

Кие Масланцяста инжихть аф васьфти и аф каваняй, ся кизоньберьф ашуяй.

Масланцяста лиянь простяйсь нолдай эряфозонза лама мезе од и цебярь.

Сай недялять, 8 мартста, ушеды Масланцясь. Тядде васенце шиц—Васедемась—савсь Авань международнай шити. Сяс эрь азоравати ули кода няфтемс пидемаса-панемаса маштомошинц. Сай Масланцясь, а мархтонза и ваи пачанза.

             Материалть аноклазе

Т.Альшина.