Родной кяльснон аф юкснесазь

Мокшетне и эрзятне эряйхть оцю странаньконь эрь кодама уженясонза и омба масторсовок. Касфни мяль, мес Мордовиять эзда шири тумдост мелевок синь аф юкснихть эсь унксснон колга, аф виздьсазь эсь национальностьснон, пара мяльса корхнихть мокшекс и эрзякс, лама тиендихть сянкса, штоба родной кяльсна ванфневоль. А нинге ширеса эряй мокшэрзятне сидеста ётафнихть национальнай илат, коса морсекшнихть мокшень и эрзянь морот, каванякшнихть национальнай ярхцамбяльса. Апак юкстаколь тядде и Родной кялень Международнай шись, кона койс коре васьфневи 21 февральста.
Землякнень мархта лямбе васедема тя шиня пуроптсь-ётафтсь Санкт-Петербургса и Ленинградскяй областьса «Шумбрат» мокшэрзянь культурать ширенц кирнеманц и виияфнеманц коряс фондсь. Коронавирусонь пандемиять пингста тяфтама пуромкст ашельхть кунара. Шись ётась мялень салайста, ваймонь эждезь. Кайгсть родной кяльса стихт и морот. Виктор Родькин седиень токазь лувсь мокшекс стихотвореният, Анастасия Лакирева морась мокшень морот.
Пуромфне пара мяльса ванозь национальнай литературань выставкать. Тяса няфтьфтольхть мокшень и эрзянь кяльса лисенди газетатне и журналхне, книгатне. Ульсь ётксост и минь «Мокшень правда» газетаньке. Ленинградскяй областень мокшетненди кельгови изданиясь, синь най шнашендыхть эсонза. Кда кульсазь-тисазь, што ширезост сайхть ломатть Мордовияста, синь най эняльтькшнихть пачфтемс мархтост «Мокшень правдать». А мзярда синць улендихть историческяй родинасост, стане жа аф тушендыхть тяста родной кяльсост лисенди газетафтома.
Васедемань участникне пидесть-панцть национальнай ярхцамбяльхть—капстань лям, суронь пачат, кургонят и лама мезе лия.
Инжикс васедемаса ульсь А.Д.Хайдаров—«УМИД» Узбекистанонь соотечественникнень Санкт-Петербургскяй обществаснон президентоц. Алиджан Джахангирович аноклась и каванязень сембонь танцти узбекскяй пловса, конань пидемста тевс нолдафоль Мордовиянь боранонь сивольсь.
Васедемас поздравления и казне мархта сашендсь Ирина Мирнова—Санкт-Петербургса марийскяй землячествать вятиец. Сон макссь «Шумбрат» фондть архивс мокшень и эрзянь кяльса книгат. Эряви азомс, Фондть архивса уликс литературать аф весть ни нолязь тевс землякне научнай работань сёрмадоманкса.
Тяфта, Андрей Алёшкинонь «Коза тусть мокшэрзятнень шкайсна» книгац арась юркс Екатерина Огаревать «Ведятя» азксонцты, кона маластонь пингть лиси фкя литературнай журналса. Вов и тяни Ирина Мирновать вельде, стих мархта фкя книгать Екатерина Огаревась кочказе, штоба анокламс национальнай поэттнень стихотворенияснон ётафтомаснон коряс работанц тиеманкса. Вов тяфтама ялгаксшинь, лама национальностень васедема лиссь.
Пуромксть шумордамста сембе марса моразь «Мани ши» и «Эряк, монь Мордовиязе!» моротнень.
…Саратовса Родной кялень Международнай шиня пуроптфоль «круглай шра», коза сашендсть Саратовскяй областень национально-культурнай автономиянь лидерхне. Регионца тяниень пингть эряй 160 лама народонь представитель. Пуромксса корхтафоль  мировой культурати родной кяльть путксонц колга, азфтольхть мялень салай фактт масторлангонь нароттнень кяльснон историяснон эзда, национально-культурнай автономиятне и объединениятне полафтсть регионца родной кяльхнень ванфнемаснон и виияфнемаснон коряс опытса. Мокшэрзятнень лемста «круглай шраса» ульсь Саратовскяй областень «Шумбрат» национально-культурнай центрать председателец В.И.Кривошеева.
 Илать лемс нолдафоль и онлайн-челендж. Эсонза участиянь примаманкса эрявсь национальнай костюмса щафста сёрмадомс видеос стихотворения, пшкядема или поздравления родной кяльса и лихтемс тя роликть социальнай сетьтненди.
О.Сергеева.