ЗАЙЦЯСЬ ИСЯК И ТЯЧИ

Сонь колганза васенце лятфнематне муфт Мордовия Республикань  центральнай государственнай архивста. 1647 кизонь судебнай описьса азондови зиянонь колга, кона лиссь «Зайцево» именияса. Стане жа улихть лятфнемат тя велень эряйхнень колга «Пензенская десятня 1696», «Атемарская десятня 1669-1671» делопроизводственнай документса.

Мес велесь лемтьф Зайцякс? Тянь коряс улихть лама мяльхть-арьсемат. Краеветтнень валснон коряс, велеть лемоц тиевсь «Сайця» дохристианскяй кунардонь пингонь ломанень лемста. Лия исследовательхне арьсихть, велети лемсь ладявсь  служивай ломаттнень Зайцефнень фамилияснон эзда, конат азорондасть ня модатнень лангса. Тяда башка, синць зайцяряйхне азонкшнихть эрь кодама легендат. И вов фкясь эздост:

Кунара-кунара, «шаржу» кизотнень пингста, тя аймакса кассь оцю вирь. Тяза сашендсь охотендама—нумолонь лангс—козя рузаля. Сонь мялезонза  тусть  аф аньцек пукшу нумолхне, но и тястонь вирьса касы эчке и сери шуфттне. Сон кармась маластонь велетнень эзда сивотькшнема таза мокшалят—вирень керыхть. Васенда вирень керыхне эрясть модань кудняса—времянкаса. Но козялясь ульсь ломанць ёню и ёжу. Сон лац пандсь сивотьфненди покодеманкса, штоба вирень керыхне рамальхть кядьстонза кудонь путомс шочкт. Сяс, пингонь ётазь, модас пялева кяшф куднятнень вастс кеподсть шуфтонь кутт. Тяфта кочкавсь-пуроптовсь мокшень велесь. Козялясь макссь велети Зайцево лем, сяс мес велеть эвондаманцты, сонь койсонза, туфталкс ульсь нумолсь. Пингта меле ни мокшетне велеснон лемдезь эсь лацост—Зайцякс (Сайцякс).

Кода няйсаськ, велеть историяц тушенды кунардонь пинкненди. Но ся, мезсь ванфтовсь эряфкшу ломаттнень мялямсост Зайцять колга, ушеткшни XIX векть пестонза. Кепотьксонди, 1880 кизоня Зайцяса ульсь пяк оцю пожар. Тя лиссь кизонда. Сембе ломаттне, сиреда и шабада башка, покодсть паксяса. Эсь урмаса сяряди фкя алять ёрдаф  цигарка пенц эзда крьвязсь кудботмоц. Куттне велеса путфтольхть пяк маласа фкя-фкянди, сяс эсток палсь нильгемоньшка куд. Пожарда меле, нюрьхкяня пингонь ётазь, велеряйхне ушедсть строяма одукс. Тяни куттнень путозь сяда ичкозиня фкя-фкянь эзда, а кемоньшка куд вельф кадондсть кели проулкат, сяс велесь кувалгодсь-келемсь. 1960 кизотнень, мзярда нолдасть велети ведь, трассань шувомста мушендсть палф тёст. Тя  лятфнесь ся вии пожарть колга.

зярда Сибири строяфоль машинань кись, лама зайцяряй (велеть пялешкац) тусть вербовкас коре тоза эряма. Туфталкс ульсь ся, што семьятне пяк оцюфтольхть, комозьшкань ломань эрясть марса, а строямс ашель коза. Фкя ширеса шуди Кранжей ляйнясь, омбоце ширеса—карафт, ведсь ичкозель. Сибири туф мокшетне кармасть эряма Тюменскяй областьса. Но тостонь ломаттне аф пяк мяль вельде васьфтезь ширде сайхнень. Мархтост тюрендсть. Сяс кой-кона зайцяряйхне мрдасть меки эсь шачема велезост.

Васенце мировой войнаса врагть каршес тюрсь Зайцяста лама мокшень аля. Эряфкшу веляряйхне содайхть ся пингть колга эрь кодама случайхть. Кепотьксонди, лятфнесазь колма браттнень, конат сявфольхть воявама. Фкясь эздост, Иван Матвеевич Циликин, повсь пленц Пруссияв. Но теенза кафта пленнай  ялга мархта удалась ворьгодемс. Няйсть лама нужа. Мзярс щамсна ульсть пленнаень, савсь кяшендемс, молемс аньцек веть. Но киснон лангс токатькшнесть пара ломатть, конат лездсть щамса, симнезь-аннезь. Тяфта мокшалясь мянь Пруссияста ялга пачкодсь эсь шачема велезонза.

 Васенце мировой войнаса ульсь казьф «Георгиевский Крест» орденца зайцяряйсь Е.Т.Петряков. Сонь колганза велеряйхне лятфнихть тячемс. Егор Трофимович ульсь ранендаф и ащесь госпитальса. Оцязорсь Николай II ётась госпитальге и казендезень геройхнень. Егор Трофимович серьс ёмланяль, осалняль, сянкса офицерхне виздсть няфтемс сонь оцязорти, кле, кода стане, герой, а серьс-ронгс аф што кодама. Сяс вастозонза орденонь получама ладясть оцю аля. А мзярда оцязорсь тусь, казнеть максозь азоронцты.

айця велеса ульсь церькав, сон строяфоль 1917 кизоня. Васенце настоятелькс ульсь батюшкась Григорий, шачемас коре Ковылкинскяй райононь Сире Борку велеста. А 1937 кизоня церькавсь сёлкфоль. Эздонза тисть сёронди колхознай склад. 1962 кизоня церькавсь калафтфоль. Велеряйхнень мялямс лядсь седиень ацергофты ся картинась.  Председателькс ся пингть работась В.Т.Акашев. Пингта меле сон каендась: «Зайця велети мон мезевок кальдяв ашень тие, церькавть калафтомда башка».

Революцияда   меле     НЭП-ть пингста кой-кона Зайцяряйхне козякодсть. Мастеровой мокшалятне строясть суронь пянгодема васта (просорушка). Зайцяв суронь тяляма сашендсть мянь омба велеста. Ульсть торгавайхтьке эряйхнень ёткса, синь  якальхть алашаса Москуву сиволень мишендема. Кирдсть лама жувата, касфнесть сёра. И тяса ушедсь раскулачиваниясь. Лама семья вихца кучфоль Сибири и Казахстану. Синь паршисна ётасть колхозу, а кудсна арсесть изба-читальнякс, лавкакс, школакс. 

1931 кизоня Зайця велеса пуроптфоль «Мазы пакся» колхоз, председателькс кочкафоль Ф.Е.Перякин. Модась ломаттнень кядьста сявфоль и арась марстоннекс. Кой-кит ащесть каршек тянди. Колхозу ашесть сува Е.Г.Кисняшкин, Ф.Г.Кисняшкин, И.Р.Кисняшкин, П.А.Петрякова.

Колхозонь пуроптомста ламос якафневсь Кранжей ляйть фталда модать коряс тевсь. 1917 кизоти молемс сон ульсь Варана велень помещиконь кядьса. Помещиксь мизе тя модать Варанань церькавти. А революцияда меле модась ётась Варанань крестьяттненди. Мзярда колхоснень ёткса тиендевсть межат, кафта шабра велетнень ёткса ня модатнень инкса лиссть сялондомат. Штоба лоткафтомс сялондоматнень, тердсть Краснослободскяй земельнай комитетста ломань. Модань ункстамань шиня ушесь кельмоль. Зайцяряйхне макссть ункстайти варягат, коза путсть ярмак. Ну и модань ункстайсь максозе паксять сяда оцю пяльксонц  Зайцянь колхозу. 1946 кизоня тя межать вакска видесть церят, конатнень эзда кассть тумонят. Тя тумонь налсь тячемс мазопнесы велень панда прять и лятфни эряйхненди тя случайть колга.

еликай Отечественнай войнать пингста Зайця велеса, кода и странаньконь лия уженянзон эса, народсь ульсь сизеф, вачеда. Пицесть кшит тума лопаста, марожста. Колхозонь паксяста тунда кочксесть эендаф модамарьхть. Войнав сявондезь Зайця велеста служама кондясти сембе алятнень. А ламоц аватне, кода войнать пингста, стане и войнада меле, тушендсть торфонь таргама. Кой-кит примасть участия Смоленскяй областьса советскяй солдатонь калмамаса (захороненияса), войнаса калафнеф постройкатнень урядамаса.

Войнада меле эряфсь велеса саворне ушедсь латцевома. Кассть иттне, конат покодсть ряцок оцюфнень мархта. Стака тефне тиендевсть алашаса, но эздост ульсь кржа.  Сяс ломаттне кильнезь букатнень,  усксесть шужярьхть, культивировандасть мода. Пингонь ётазь ушедсь эвондама техника: сёронь лядема-тяляма агрегатт, гусеничнай тракторхт, грузовой машинат. Хуш тя техникась  тёждялгофнезе покодемать, но сяка лама савсь тиендемс кядьса.

1951 кизоня колма велетне: Сире Потьмась («16 партсъезд» колхозсь), Сире Лепиюсь («Од ки» колхозсь) и Зайцясь («Мазы пакся» колхозсь) шоворсть А.А.Ждановонь лемса  фкя хозяйствас. Кизода меле тя колхозти ульсь примаф Матвеевка рузонь велень «Красное Знамя» колхозсь.  Центральнай усадьбакс ульсь Зайця велесь. Ся пингть школаса тонафнесь 380 шаба, велеса тёжянть малава ломанель. Строяфоль пилорама, ток, правлениянь здания, фельдшерско-акушерскяй пункт, почта, птицеферма, клуб.

1955 кизоня вели нолдафоль радио. 1962 кизонь 11 декабрьста Зайцясь ульсь сувафтф электропередачань государственнай линияти.

1964 кизоня Зайця велесь, кона инголе ульсь Рыбкинскяй районца, сувась Краснослободскяй району.

1970 кизотнень ломаттне кармасть цебярьгофнемост эряма вастснон. Шужярень вельхкс мархта ташта куттнень вастс кеподсть кирпицьста и шуфтста строяф кутт.

ячи велеса асфальтонь ки, куттненди нолдаф ведь, природнай газ. Зайця велесь сувси Ефаевскяй велень поселенияв. А паксянза, луганза сувсихть   «Мокша» ООО-нь агропромышленнай объединенияв. Велеса ули ФАП, библиотека, почта. Калафтф церькавть  вастс строяви Михаил Архангелонь лемса од храм. Велеса эряй кодгемонть малава ломань. Виде, кизонда ломаттнень лувкссна касонды. Сашендыхть велеряйхнень шабасна, уноксна. Сашендыхть и сят, кинь шачфтысна-касфтысна ашет шиса. Тядянь-алянь куттнень петнесазь, стройсесазь одукс.  Паксятнень лангса, конат лама киза ашесть витцев, кассь туста вирь.  Зайцяряйхне эряфснон лангс аф пеняцяйхть. Главнай заботасна, кода и сембонь—шабаснон колга.

Т.Петрова.