Мария Пивкина: «Сире Теризморгав седиезе уски фалу»

Мокшэрзятнень этническяй культураснон эсь лацонь ширец—тя национальнай илатне, койхне-обуцятне, моротне, кштиматне. Сембось тя ули Г.И.Сураевонь-Королевонь лемса «Келу» фольклорнай ансамбльть творчестваса. Сонь репертуароц козя и аф фкя лацонне. Ансамбльсь кеме соткст кирди финно-угорскяй нароттнень мархта. Коса афоль сав улемс «Келути», фалу пяк маштозь, мялень салазь няфнесы мокшэрзятнень кунардонь национальнай культураснон. А конашкава мазыхть щамсна!
«Келу» ансамбльса морсихть асу, эсь тевонь лац содай-машты ломатть, конатнень седисна палы сембе минценнети пси кельгомаса. Ётксост МР-нь Народнай и Заслуженнай артистт, но улихть и од морсихть, конат тяни ни няфнихть морамань-кштимань тевса оцю маштомоши. Фкясь синь ёткстост од мокшавась Мария Пивкина. Аф кунара артисткась ульсь минь редакциясонк, коса пара мяльса отвечась корреспондентоньконь кизефксонзон лангс.
—Мария, эрь азонтт аф лама эсь колгат, коса шачеть, касыть серьцень, кит тядятне-алятне?
—Шачемас коре мон Старошайговскяй райононь Сире Теризморга велеста. Касонь простой мокшень семьяса. Тядязе, Светлана Фёдоровна, работай библиотекаса, алязе, Виктор Иванович, покоди Национальнай культурань центраса, сон вятьсы «Лаймоня» идень фольклорнай коллективть. Тядязе-алязе ёмластокиге тонафтомазь кельгомс эсь родной кяленьконь, культураньконь, марямс гордость нацияньконь инкса. Аф ёмла путкс тянди путсь щавазе, Нина Михайловна Кадеровась. Республикасонк сон содаф ламотненди. Аф фкя киза щавазе вятезе Национальнай культурань центрать, морсесь Сире Теризморгань народнай хорса.
—Лисенди, моронь-музыкань кельгиень семьяса касфат. Тонцьке, улема, кунара ни сотфат морамань тевть мархта?
—Морсян ёт мяляфтса эсь прязень. Алязе пяк цебярь баянист, музыкати кельгомась васендакиге максовсь сонь эздонза. А вайгяльсь, шять, ётась щавазень эзда. Шабакс сидеста якселень щавазень мархта работама вастозонза, панжадонь куркт кулхцонкшнень мокшень моротнень эса. Котоце класста сявомок ушедонь морсема «Лаймоня» ансамбльса. Сире Теризморгать келес кулевсть вайгяленьке. Да аф аньцек шачема уженясонк кулендемазь, но и лама лия вастова: улендеме гастрольса, эрь кодама фестивальса Москуса, Нижняй Новгородса. Мяляфтса, кода 2003 кизоня «Лаймоняньке» сяськсь Москуса морамань конкурсса. Ансамблень солисттненди максфтольхть путёвкат «Орлёнок» идень лагери. Тосовок оцю мяльса морсеме, няфнеськ мазыдонга мазы мокшень щамоньконь. Аф весть няфнеськ пряньконь «Шумбрат, Мордовия!» Народнай творчествань республиканскяй фестивальса, лисендеме конкурсть финалозонза.
Школать аделамста мон ни содайне, кодама тев мархта мялезель сотнемс эряфозень сяда тов. Аттестатонь получамда меле эстокиге максыне кагоднень Н.П.Огарёвонь лемса МГУ-нь Национальнай культурань институту. Поступань «Музыкальное искусство» отделенияв. Тияк кармань морсема «Мани ши» коллективса, кона эста пуроптфоль Культурань центрать видеса.
—«Келуть» мархта кода сотневсь эряфце?
—Ансамбльть колга васенцеда содань нинге школаса тонафнемста. Велеса явондови буклеттнень эзда няине мокшень мазы щамса щаф аватнень—«Келуть» стирензон, кармань кизефнемонза щавазень коллективть колга, а монць тияк арьсень: вов ба повомс синь ёткозост. Сяс тячи маряса прязень павазуста, мес лисендян сценать лангс Мордовиянь фкя инь содаф коллективть лувксса. Тядде топоди кефкие киза, кода шоворень «Келути».
—Тя пингста, улема, коса аньцек ашезь сашендов улемс ансамбльть мархта?
—Тя афкукс тяфта. Улендеме Севернай Кавказса,  Ижевскяйса, Москуса, Сызраньца, Самараса, Ульяновскяйса, Пензаса, Нижняй Новгородса. И тя спискась стаки можналь кувалгофтомс.
—А кона гастрольхне арасть тейть инь мяляфтовикс?
—Сембода пяк тусь мялезон Севернай Кавказса улеманьке. Васендакиге мес примафтолеме лямбоста. А нинге сяс, мес тяса пяк козяста няфтьф национальнальнай ширесь. Коза ба афолень моле, най шарфнян мяль тя аймакса эряй ломаттнень культураснон, национальнай щамснон, ярхцамбяльснон, койснон-обуцяснон лангс, тя сембось  салсесы мялезень. Севернай Кавказсь—культурань ширде козя регион. Тястонь эряйхнень мазыхть костюмсна, танцтихть ярхцамбяльсна, а конашкава токай седи алянь лама вайгяльса морамасна! Миньге морсетяма лама вайгяльса, сяс пара ульсь кулхцондомс, кода тиендьсазь тянь синь, а кода минь.
 —«Келуть» репертуароц пяк козя. А тейть кона моротне сяда кельговихть?
—Койсон, кальдяв морот аш. Сембось ащи сянь эзда, кода сонь морасак. Кда нолдасак мороть седицень пачк, эста ваныське примасы сонь лац. Но мокшень моротне тейне сембе сяка сяда малат.
—Аф фкя киза ни морсят, сяс, улема, лац содасак, кодамокс эряви улемс артистти, штоба шарфтомс эсь лангозонза ваныть мяленц?
—Васендакиге мяляфтома: сценать лангс фалу лисендема цебярь мяльса. Ся, кепотьф артистть мялец или колаф, теждяста шарьхкотькшневи ваныти. Мзярда шамасот налхки весяла мзолфкясь, пиндолдыхть сельмотне, эста залса озсефневок весялгодыхть.
—Мария, тон фалу лац няеват. Шять, ули мазышинь кодамовок секретце?
—Сюкпря! Мазышить ванфтомаса ламось ащи сянь эзда, мезьда тон ярхцсят. Сяда лама сивондема белковай ярхцамбяльда, перень сёрода. Юкстамат бургерхне-месне. А нинге эряви фалу ваномс шама киськть мельге. Тейне кельгови корейскяй косметикась. Тяда башка, нолясайне тевс эсь кядьса тиф маскатнень. Азса эздост фкять, шять, сон кондясти «Мокшень правдать» лувиензонды. Маскась аноклави кофеста и медьста (сявомс фкя лацонь пяльксса). Можна каямс эзонза аф лама шампунь, штоба араль сяда шонгаркс. Тя маскась тиендеви баняса. Вадема сон парендаф шама киськть лангс.
—Ётка пингцень мезьса занцесак?
—Кельгса спортть. Лама пингта ётафнян спортивнай залса.
—Коса кельгсак ваймосемацень, Саранскяйса улихть кельгома васт-тне?
—Ошеньке минь пяк мазы, тяса лама вастта, коса можна якамс-шяямс, васедемс ялгатнень мархта. Мялезон Тысячелетиянь площадсь, сядонга пяк кизонда, мзярда тяса ушеткшни шавома фонтанць. Пара мяльса улендян музейса. Койсон, лац строяф-тиф Музейно-архивнай комплекссь, мялень салай козя выставкат фалу пуропневихть С.Д.Эрьзянь лемса музейса. Кизонь пингть кельгса ваймосемс моряса.
—Шачеть-касоть велеса, тяни эрят ошса. Коса сяда парста марясак пряцень?
—Ошень эряфсь цебярь, но велень ломанть седиец най уски шачема уженязонза. Вов и монга, аньцек эвондакшни пингозе, эряскодан Сире Теризморгав. Саян вели, ётнян ульцяванк и бта идькс пингозон мртцян. Тяса фалу сяда лямбе и валда.
—Сюкпря, Мария, мес сашендоть ширезонк инжикс, муть пинге корхнемс. Сатфкст тейть творчестваса и эряфса!
О.ЕВДОКИМОВА.