Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

«Тон инь цебярСят»

Галина Васильевна Борисова оцю стаж мархта руководитель, эсь коллективонц сон пуроптозе колмогемоньда лама кизода инголе и тянемс труженицатне кирдьсазь сери планкать.
Шачсь Галина Васильевна Пензенскяй областень Наровчатскяй райононь Александровка велеса. Тядяц и аляц вете идьснон  касфтозь трудонь кельгикс, эряфкшу ломанень уважандайкс. Кудонь сембе хозяйствась, а жуватада кирдсть ся пингть лама, кирдсь идень лафтуфнень лангса.
Аляц, Василий Тимофеевич, Великай Отечественнай войнань участниколь, ламоксть ранендафоль, казьфоль орденца и медальса. Колмогемоньшка киза водителель, шары лангса ётась аф фкя сяда вайгяльбе. Тядяц, Мария Терентьевна, велень труженицаль.
1970 кизоня Гурофнень семьясна ётась эряма Ковылкинав, коса рамасть куд. Галина тя пингть тонафнесь кемонце  класса. Родной эсь велесонза кемонь класст  ашельхть, сяс средняй школать савсь шумордамс Вилейкаса. Эрясь щаванц и щятянц ширеса.
Получамок аттестат средняй образованиять колга, Галя поступай Саранскяй кооперативнай техникуму «Технология приготовления пищи» специальностьс коре. Ся пингста, кода тяштьфоль трудовой книжказонза фкя сяка тяштькссь, ушедсь трудовой киц общепитонь Ковылкинскяй объединенияса поваркс. Тя ульсь 1974 кизоня.
Сатфть лангс Галина Васильевна ашезь лотка. Работанц мольфтезе сяда тов, а документонзон максозень «Товароведение продовольственных товаров» заочнай отделенияти. Тя пингть ушедсь сонь профессиональнай ширде касомац. Организаторонь асувонза сяда келиста панжевсть производствань заведующаень вастса. Тя работань стама участкась, конань вельде кирди марнек коллективсь. Тевонц тиендезе маштозь. Аф стак, мзярда 1987 кизоня стясь кизефкссь Ковылкинскяй общественнай питаниянь директорть путоманц колга, тя вастти кочкафоль Галина Васильевна  Борисова. Сон пильгонек-прянек ваясь работати.
Г.В.Борисовать хозяйствац аф ёмлаль. Общепитти сувсесь 49 предприятия, лиякс азомс, столовайхть ульсть ошень пцтай сембе учреждениятнень эса. Сувсесть тяза школьнай 5 столовайхть да нинге Ковылкинскяй строительнай техникумть столоваец. Работникнень лувкссна пачкотькшнесь 230 ломанти. Кепотьксонди, штоба тонафнихненди пидемс танцти обед, эрь кизоня аноклакшневсь 15 тоннати молемс модамарь, колмонь тонна шурьхкя, пурьхкя, якстеряпс. Школьнай менюса фкя-фкянь полафнесть сиволень и лофцонь блюдатне.
Улемок общественнай питаниянь предприятиянь руководителькс, Галина Васильевнанди савсь пяк курокста одукс ладямс эсь работанц. Эрявсь ваномс тячиень шинь кизефкснень: лувомс продукциять питненц, товархненди и услугатненди питнень ладямать, финансовай отчётностть тиеманц и стак тов. Сон эрь кизоня макссесь  специалисттненди экономическяй кизефкснень коряс эрявикс консультацият.
Работати творческяйста малаткшнемась, профессионалкс улемась отмечафт лама казнеса. Потребкооперацияса лама киза седикс-ваймокс работаманкса Г.В.Борисовать грамотаса и благодарностьса  аф весть казендезе райононь и республикань руководствась. Теенза максфоль федеральнай оцю казне—«Российскяй Федерациянь потребительскяй кооперациянь ветеран» лем. Сон Мордовия Республикань торговлянь Заслуженнай работник.
Эряфонь кочкаф киц мялезонза.  Потребкооперациясь арась теенза эряфонь пяльксокс. Галина Васильевна мяляфтсыне сембе работниконзон,  эрть инкса сяряди ваймоц. А ломаттне тяза кочкавсть трудонь кельгихть.
Стака прябалакс Г.В.Борисовати и марнек коллективти арась эпидемиологическяй обстановкась, кона  сотф коронавирусть мархта. Ограничительнай мератне ашесть ёта и общественнай питаниянь сферать вакска. Лезкс макссь государствась—предприятиясь получась кафта миллиотт цалковай субсидия. Ня средстватне тусть работникненди заработнай платань пандомс, мезсь лездсь ванфтомс предприятиять коллективонц.
Эсь раднянзонды и мала ломанензонды Галина Васильевна ляткшни цебярьдонга цебярь тядякс и бабакс. Макссемок теест пефтома кельгоманц, сон ширдестка тянь получсесы. Сай унокоц Кира, паласы, сетьмоста мярьги: «Тон монь инь цебярсь». И сетьми семботь инкса ризнай седиец, сельмонзон эса эвондайхть павазонь сельмоведнят,    пеедезеви. И тага ваймоц пяшкоди цебярьс верондамати. Ёфси аф кунара ульсь Г.В.Борисовать шачема шиц. Сонь оцю мяльса поздравляндазь мала ломаненза и ялганза.
Василий Илькаев.
Снимкаса: Г.В.Борисова.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022