«МОНЬ МОРДОВИЯЗЕ» КОНКУРСС ЗАЯВКАТ МАКССЬ 6 ТЁЖЯНЬДА ЛАМА ЛОМАНЬ

Шавшиста, 20 апрельста, Мордовиянь Технопаркса ётафтовсь пресс-конференция, коса тифтольхть итокт «Монь Мордовиязе» республиканскяй кадровай конкурсс заявкань примамати. Пуромксса ульсть Мордовиянь Оцюнять аф лама пингс тевонзон тиендисна А.А.Здунов, проектть Наблюдательнай советонц председателец Н.В.Долматова, Мордовия Республикань Правительствать эзда РФ-нь Федеральнай Собраниянь Федерациянь Советонь членць, проектть Наблюдательнай Советонц членоц С.И.Кисляк, проектть оценочнай мероприятиянь блоконц вятиец Д.Е.Лисицын. Стане жа пресс-конференцияса примась участия проектс регистрировандаф участницась Анастасия Гришнева.

«Монь Мордовиязе» республиканскяй кадровай конкурсть заявочнай кампаниянц колга корхтамста А.А.Здунов азозе, што конкурсса участвовандаманкса заявкат макссь 6047 ломань. Синь ётксост аф аньцек Мордовиянь, но и Российскяй Федерациянь лия региононь и нльне омба масторонь эряйхть. Участникнень ламошкасна—90 процентсна—нят Мордовиянь эряйхть или сят, кит шачсть-кассть республикасонк, а тяни эряйхть ширеса эздонза. Но улихть и стама ломатть, конат кодавок аф сотнефт Мордовиять мархта, но синь няйсазь республиканьконь эстеест касомань-вииякшнемань вастокс, коса ули кода педа-пес панжемс-няфтемс эсь маштомошитнень и сатомс сатфкст. Сембоц конкурсонь участникнень ёткса представительхть Мордовиянь 156 населённай пунктста, Россиянь 56 регионцта и омба масторонь 5 странатнень эзда.

Пресс-конференциять пингста азфоль, што конкурсс заявкат макссть аф фкя лацонь кизоса ломатть. Лама отта, улихть и сяда опытнайхть. Стане жа азфоль, што участникнень ёткса лама авада—тя конкурсс регистрировандафнень 45 процентсна. «Тейне-арам, тя пяк пара,—азозень эсь мялензон-арьсеманзон Н.В.Долматова.—Улихть сферат, коса инь цебярь руководителькс фалу ульсть аватне, кепотьксонди, здравоохраненияса, образованияса и эряфонь кой-кона лия ширетнень эса».

Конкурсонь организаторхне азозь, што финалисттнень кочкамста васендакиге мяльс сявови участникнень управленческяй маштомошисна, оржа ёньцна, а стане жа мяльсна виень апак ужяльть трудендамс Мордовиять панчфокс панжеманкса. Кода мярьгсь республикань вятись, вешфксне кармайхть фкя лацоннет сембонди.

—Улихть специалистт, конат тейнек тяниень пингть пяк эрявихть. Нят финансистт, промышленнай сфераса управленецт, вии экономистт, инвестициянь водендамать коряс специалистт. Стане жа  эрявихть сят, кинди вийс коре тиемс содафокс любой брендть  или маркать, мяльса кирдеви Мордовиять, кода туристическяй центрань, виияфнемац,—азозе А.А.Здунов.

«Монь Мордовиязе» республиканскяй кадровай конкурссь ушетфоль тяддень 3 мартста. Шумордамс сонь арьсекшневи июньцта. Конкурссь ётафтови эряфс «Россиясь—возможностень страна» АНО-ть ширень кирдеманц пингста, конань вятьсы странань Президентсь В.В.Путин. Тяниень пингть шумордама лангса заявочнай кампаниять омбоце пяльксоц—эссень примамась. Сяда тов ётафтови дистанционнай тестирования. Сембе, кит лисихть финалти, улихть сувафтфт управленческяй кадрань региональнай резервати. А инь цебярьхне ёткстост тердевихть работама управленецекс эрь кодама сфераса и нльне республикань правительстваса.

О.ЕВДОКИМОВА.