Сембонди сатни седиень лямбоняц

Тячи «Мокшаваня» рубрикасонк пара мяльса содафтсаськ лувиеньконь Саранскяйса эряй-ащи мокшавать, лямбе седи ломанть Алена Викторовна Лазаревать мархта.
Тячиень героиняньке заняф аф теждя, но тяка пингть пяк эрявикс тевса. Кафкса кизода ламос ни сон работай педагогокс-библиотекарькс Ялгинскяй идень кудса-интернатса. Алёна Викторовна пяк кельгсыне шабанятнень. А лиякс аш кода, иттненди кельгомафтома аш кода покодемс тяфтама учрежденияса. Лазаревась лятфнесы: «Мзярда васенцеда аськолдань «кудть» порогонц вельфке, няине тястонь эряйхнень пичефкста-ризфта пяшксе сельмоснон, седиезе люпштавсь. Сяшкава ужялькс няевсть синь тейне, аноколень сембонь сявомс эсь ширезон». Мокшавась машты мушендомс кит-ятт родителень заботафтома лятф шабанятненди, сятненди, кинь васькафтозь, кадозь эряфса инь мала ломаньцна—тядясна-алясна. Алёна Викторовна макссесы теест седиень лямбонянц, кельгсыне-ужяльнесыне синь  кода эсь родной иднянзон. Эрть ктмордасы, азы лямбе валня. Синцьке идень кудонь-интернатонь воспитанникне пяк кельгсазь Лазаревать, усковихть теенза. Сембода ёмланятне, конатненди аньцек-аньцек топодсь колма кизонят, нльне лемнесазь сонь тядякс. А оцюфненди Лазаревась ащи цебярь корхни ялгакс, советонь максыкс, пара тевс водендайкс. Мзярда лисенди стане, што шабатнень сявондьсазь семьяс, Алена Викторовнанди уленди стака явомс мархтост, сяшкава тонаткшни теест. Но омба ширде кеняртькшни инксост и озонкшни Шкабавазти, штоба ладяволь вастсна од семьяса.
Тяниень пингть Ялгинскяй идень кудса-интернатса эряй 57 шаба. Алёна Викторовна тонафты эсост эрь кодама тевс. Сембода лияда башка старандай шарфтомс мяльснон национальнайти. Тястонь библиотекать видеса сон пуроптсь мокшэрзянь кудботма лаца национальнай уженя, коса ули кода содафтомс атяньконь-бабаньконь сядынгольдень эряфснон-ащефснон мархта. Аноклакшни васедемат Мордовиянь писательхнень и поэттнень мархта, тонафни иттнень мархта стихотвореният, морот. Несколька кизода инголе А.В.Лазаревась пуропнесь идень кудса дуэт—«Ялганят», кона няфнезе прянц республикаса ётафневи эрь кодама иласа, конкурсса, занцесь призовой вастт.
Кода азозе педагогсь, идень кудонь эряйхне сатнихть аф ёмла сатфкст спортса, синь примсихть участия пялькстомаса аф аньцек эсь республикасонк, но и эздонза ширеса. Тяфта, эсь воспитанниконзон мархта Алёна Викторовна ульсь соревнованияса Оренбургса, Волгоградса, Казаньца, Самараса и лама лия вастса. Кизонь пингть шабанятне эсь педагогснон мархта пара мяльса ваймосихть лагерьса.
Шачемас-касомас коре тячиень героиняньке Татарстан Республикань Тетюшскяй райононь Киртели мокшень велеста. Мзярда теенза ульсь колма кизонят, семьясна ётась эряма Ульяновскяй области. Алёна Викторовнань тядянза-алянза мокшет. Тядяц, Надежда Филипповна, профессияс коре педагог, эряфоньберьф работцесь школаса, тяни сон пенсияса. Аляц, Виктор Викторович, кода корхнихть, тячивок стройса, работай Ульяновскяй «Авиастар» заводса, коса тиендихть самолетт. Мзярда героиняньке шумордазе школать, акац, кона эрясь Саранскяйса, тердезе тонафнема Мордовияв. «Ошсь кельговсь тейне эстокиге,—азозе Алёна Викторовна.—Мон кода тядянь-алянь кудс повонь, сяшкава лямбе и пара ульсь тяса». Содамошит Алёна Лазаревась пуропнесь М.Е.Евсевьевонь лемса МГПИ-нь (тяни МГПУ) дефектологиянь и психологиянь факультетса. Сяльде  пединститутонь филологическяй факультетса аделазе магистратурать. А пингонь ётазь работавок лиссь од специалистти—идень кудса. «Арьсян, павазу ся ломанць, кона шобдава пара мяльса сашенды работама вастозонза, а илять стане жа кепотьф мяльса эряскоды куду. Тейне тянь ширде удалась»,—азозе героиняньке.
А кудса Алёна Викторовнань учендсазь кельгома мирдец и кафта цёранза. Михаил Семёнович мокшаля. Сон Рузаевскяй райононь Мокшень Пишля велеста. Цёранза Лазаревать кафцьке творческяй ломатть. Оцюсь, Сергей, аделазе музыкальнай школать-интернатть, тяни тонафни Н.П.Огаревонь лемса МГУ-нь Национальнай культурань институтса. А аф кунара сонь тердезь морсема «Умарина» морамань и кштимань ансамбляв. Ёмлась, Александр, стане жа тонафни музыкальнай школаса, морай баянца. Кода мярьгсь Алёна Викторовна, цёранзон эса пяшкодевсть сонцень сембе мяленза-арьсеманза. И Сергей, и Александр лац содасазь мокшень кяльть, сяс мес сон най кайги семьясост. «Эсь мархтон тядяне-аляне, атяне-бабане фалу корхнесть мокшекс, шабакскиге тонафтомазь кельгомс родной валть, тякоти тяни мон водендакшнесайне эсь идненге»,—азозе Алёна Викторовна.
Ётка пингтонза тячиень героиняньконь хуш и уленди кржа, но стак ащекшнезь сонь мзярдовок аф ётафнесы. Мокшавась пяк кельгсы пидеманц-стряпшаманц. Сембода лияда башка семьянцты кельговихть модамарень пярякатне. «Пицесайне синь бабазень рецептонц коряс,—азозе Алёна Викторовна.—Сиренясь аноклакшнель тяфтама танцтиня эрь недляшиня и тя ульсь тейнек оцю праздникокс. Миньцонк синь лемневихть «пря мархта прякакс».
…Улихть ломатть, конат сембе эряфснон пингста арсихть примеркс лиятненди. Эздост ули кода тонафнемс прянь вятема, тевонь тиема, идень касфтома и стак тов. Синь ёткозост ули кода сувафтомс тячиень героиняньконь. Фалу весяла, эрьгав, паронь арьси, улема, кяжиякшнемовок ёфси аф машты. Корхнят-тият мархтонза и лад арси седиезт, сон, мярьгат, шинь сюролданя лаца эжнесыне вакссонза ащихнень. Сембонди сатни Алёна Викторовнань седиень лямбоняц.
О.ЕВДОКИМОВА.