«РЕСПУБЛИКАНЬ КЕМОНЬ МУНИЦИПАЛИТЕТТНЕ ЛЯДОНДЫХТЬ «ЯКСТЕРЬ» ЗОНАСА»

Мордовиянь Оцюнять аф лама пингс тевонзон тиендисна Артём Здунов 26 майста видеосвязень режимса етафтозе коронавируснай инфекциять профилактиканц и келемоманцты каршек ащемать коряс региональнай оперативнай штабть очередной заседаниянц. Корхтафоль тяниень пингонь эпидемиологическяй ситуациять, COVID-19-ть каршес вакцинациять мольфтеманц, здравоохранениянь региональнай системать работанц, санитарно-эпидемиологическяй вешфкснень пяшкотькшнемаснон мельге контрольть колга.

Региононь вятись азозе, што мекольдень недялять коронавирусть мархта ситуациять коряс оцю полафткст ашесть эвонда—эрь шиня мушендови 30-ть малава од сяряди. «Ули койка-вастонь резерва—тянь мельге ванома фалу, кда эрявксты, эсь пингстонза примсемат дополнительнай мерат, но 10 муниципалитеттне республикаса лядондыхть «якстерь» зонаса»,—китькстазе Мордовиянь Оцюнять аф лама пингс тевонзон тиендисна.

Ня райоттнень эса сярядемать коряс недяляньберьфонь показательхне ламода сяда оцюфт среднереспубликанскяй значениятнень коряс—тя Большеигнатовскяй, Ельниковскяй, Большеберезниковскяй, Старошайговскяй, Атюрьевскяй, Зубово-Полянскяй, Краснослободскяй, Ковылкинскяй, Рузаевскяй и Инсарскяй райоттне. Недяляньберьф инь оцю касома сатф Краснослободскяй и Зубово-Полянскяй райоттнень эса.

Кода азозе вице-премьерть тевонзон тиендисна Галина Лотванова, ковиднай госпиталень режимса работайхть республикань пчксемань 5 учреждениятне, стационарса ащихть 496 ломань, апак заняк койкань фондсь—23 процент.

Сяда тов мольфтеви коронавирусть каршес вакцинациясь, и муниципалитеттне тяса работайхть аф фкя лаца: васенце вастса ащи Дубенскяй районць, ламода лядонды Ромодановскяйсь. Оперштабса корхтасть туфталхнень колга, конат шоряйхть отькорьста вакцинациять мольфтеманцты, и путсть задачат касфтомс прививочнай кампаниянь темпнень тя тевса фталу лядонды муниципалитеттнень эса.

Азфоль, што кизонь пингть коронавирусса сярядемать коряс ситуациясь эряви кирдемс сядонга кеме контроль ала. Кода азозе МР-ть эзга главнай санитарнай врачсь Татьяна Харитонова, Роспотребнадзорсь ушедсь ванондомост ошть маласа и школатнень видеса лагерьхнень, эсост должетт улемс кожфонь рециркуляторхт, араламань средстват и термометрат, а кизонь шумбрашинь петемань кампаниять ушедоманцты учреждениянь сембе сотрудникне должетт улемс обследовандафт COVID-19 урмать и кишечнай инфекциянь срхкафнихнень лангс. Шабатнень безопасностьсна—васенце вастса!

Стане жа заседанияса примаф решения кувалгофтомс кафетнень, рестораттнень и кизонь верандатнень работаснон фкя частта—01:00 частти молемс, кда кармайхть пяшкотькшневома безопасностень мератне.