Виктор Миронович Макушкин

Седиень оцю ризфонь марязь пачфнесаськ, што 81-це кизонц лангса стакаста сярядемда меле тусь эряфста мокшень содаф учёнайсь, филологическяй наукань докторсь, профессорсь, Мордовия Республикань наукань Заслуженнай деятельсь, республикань Госсобраниянь депутатсь Виктор Миронович Макушкин, ломанць, кона седиге кельгозе Родинанц, эсь шачема-касома мокшэрзянь краенц и сонь народонц.
Виктор Миронович Макушкин шачсь 1940 кизонь 30 декабрьста Кадошкинскяй райононь Паево велеса. Шумордамок тястонь средняй школать 1958 кизоня, поступай тонафнема Мордовскяй госуниверситетонь филологическяй факультету. Вузть аделамда меле эстокиге примави тязк аспирантурав. 1966 кизоня араласы наукань кандидатонь диссертациянц, а 1985 кизоня—докторскяйть.
Виктор Мироновичень эряфонц оцю талекац кемоста сотфоль Российскяй Федерациянь тя фкя инь оцю вузть—Н.П.Огарёвонь лемса Мордовскяй госуниверситетть мархта. Васенда ульсь ассистентокс, сяльде—мокшэрзянь кялень и литературань кафедраса преподавателькс, филологическяй факультетонь деканонь заместителькс. Аф кржа киза ульсь университетса тонафнемань тевть коряс проректоркс.
Самай тя вастса сембода лац няфтевсь Виктор Мироновичень организаторонь асувоц, ломаттнень мархта работама маштомац, фалу вешендемань киса ащемац. Аф стак 1992 кизоня именна теенза, В.М.Макушкинонди, максфоль оцю довериясь и честсь улемс вятикс, ректоркс М.Е.Евсевьевонь лемса государственнай педагогическяй институтса. Кеветие киза сон тя пяк важнай и ответственнай вастсоль. Тя пингста лама одня, интереснай сувафтф пединститутть эряфс, лама тиф сянкса, штоба касфтомс сонь авторитетонц и престиженц, штоба сон сембоса отвечаль тячиень вешфксненди.
Содаф учёнайть-литературоведть оцю путксоц мокшэрзянь литературоведенияти. 1976 кизоня нолдазе «Начало пути» васенце книганц. Авторсь няфтезе, кода шачсь-кассь минцень национальнай литератураньке. 1984 кизоня лиссь «Обретение зрелости» омбоце книгац. Тяса няфтезе, кода касондсь и  эзрайготкшнесь родной кяльса-валса лисенди литературась.
Учёнайсь сёрмадсь 100-да лама научнай статья, учебникт, программат мокшень литературать коряс.
Кода научнай руководитель аноклась наукань 20 кандидат и 3 докторхт. Сон лама вий и эрьгя макссесь сянкса, штоба лездомс мокшетненди и эрзятненди ванфтомс и виияфнемс родной кяльснон, культураснон, койснон-обуцяснон.
В.М.Макушкин лац содафоль и кода общественнай деятель. Сон аф кржа киза ульсь республикань Госсобраниянь депутатокс.
Оцю сатфксонзон инкса Виктор Миронович казьфоль «Знак Почёта» и Почётонь ордеттнень мархта, «Почётный работник высшего профессионального образования Российской Федерации» мяштьса каннемань знакса, Российскяй Федерациянь Образованиянь и наукань министерствань  Почётнай грамотаса и Благодарностьса, лама лия оцю казнеса.
Меколи азсаськ: Виктор Миронович Макушкинонь—мокшень содаф учёнайть и общественнай деятельть, афкуксонь патриотть, мокшэрзянь народть достойнай цёранц минь мзярдонга аф юкстасаськ, сон фалу ули мялямсонк и седисонк.
Ялганза.